 |
ພິທີເຊັນສັນຍາການຮ່ວມມື ລະຫວ່າງບັນດາບໍລິສັດສະໜັບສະໜູນສະໂມສອນ ມາສດ້າ ຈີບີ ເອັບຊີ ເຂົ້າຮ່ວມທຸກລາຍການ ຂອງ ສຕລ ຄັ້ງນີ້ ຈັດຂຶ້ນ ໃນວັນທີ 26 ມິຖຸນາ ນີ້ ທີ່ສູນບໍລິການລູກຄ້າ ມາສດ້າ ບ້ານສີໄຄ ເມືອງສີໂຄດຕະບອງ ນະຄອນຫຼວງວຽງຈັນ, ເຂົ້າຮ່ວມໃນພິທີ ມີທ່ານ ທິບພະເນດ ແກ້ວມະນີວົງ ປະທານສະໂມສອນ ມາສດ້າ ຈີບີ ເອັບຊີ ພ້ອມດ້ວຍຄະນະບໍລິຫານງານ, ບັນດາຜູ້ໃຫ້ການສະໜັບສະໜູນ, ຄະນະຄູຝຶກ ແລະ ນັກກິລາທຸກຮຸ່ນເຂົ້າຮ່ວມ.
ໂອກາດນີ້, ທ່ານ ທິບພະເນດ ແກ້ວມະນີວົງ ໃຫ້ຮູ້ວ່າ. ສະໂມສອນບານເຕະມີນັກກິລານັບແຕ່ຮຸ່ນ 8 ປີ ຂຶ້ນໄປ ແລະ ຜ່ານມາກໍເຄີຍສົ່ງນັກກິລາເຂົ້າຮ່ວມແຂ່ງຂັນໃນລາຍການຕ່າງໆທັງພາຍໃນ ແລະ ຕ່າງປະເທດ ແລະ ກໍສາມາດສ້າງຜົນງານໄດ້ຢ່າງຫຼວງຫຼາຍ ໂດຍສະເພາະໃນປີນີ້ ກໍໄດ້ສົ່ງນັກກິລາຫຼາຍຮຸ່ນເຂົ້າຮ່ວມແຂ່ງຂັນລາຍການຂອງ ສຕລ ຈັດຂຶ້ນ ຫຼາຍລາຍການ ແລະ ກໍມີແນວທາງທີ່ຊັດເຈນ ທີ່ນັກກິລາພວກເຮົາສາມາດສ້າງຜົນງານທີ່ພົ້ນເດັ່ນ ແລະ ກໍເຊື່ອວ່ານັກກິລາພວກເຮົາຈະສາມາດສ້າງຜົນງານໄດ້ຕາມເປົ້າໝາຍທີ່ວາງໄວ້.
ສຳລັບການສະໜັບສະໜູນ ຂອງບັນດາພາກສ່ວນຕ່າງໆໃຫ້ແກ່ສະໂມສອນມາສດ້າ ຈີບີ ເອັບຊີ ເຂົ້າຮ່ວມທຸກລາຍການຂອງ ສຕລ ໃນຄັ້ງນີ້ີມີທັງໝົດ 5 ພາກສ່ວນ ປະກອບມີບໍລິສັດ ມາສດ້າ ລາວ, ບໍລິສັດ ພາພອນ ສະປອດແວຣ ຈໍາກັດຜູ້ດຽວ, ບໍລິສັດ ວາຣີ ຈໍາກັດ (ຜູ້ຜະລິດ ແລະ ຈຳໜ່າຍນໍ້າດື່ມ ວາຣີ, ບໍລິສັດ Nar Labs asia, VIP Fitness ແລະ ກຸ່ມບໍລິສັດ ນິກສັນ ພັດທະນາບໍ່ແຮ່ ຈໍາກັດ.
(ຂ່າວ-ພາບ: ສົງການ ພັນແພງດີ)
ຄໍາເຫັນ