 |
ພິທີມອບເຄື່ອງຊ່ວຍເຫຼືອດັ່ງກ່າວ ຈັດຂຶ້ນໃນວັນທີ 13 ສິງຫາຜ່ານມາ ໂດຍໃຫ້ກຽດເຂົ້າຮ່ວມຂອງ ທ່ານ ບຸນຄົງ ພິມມະສອນ ກຳມະການພັກແຂວງ, ເລຂາພັກຄະນະບໍລິຫານງານເມືອງ, ພ້ອມດ້ວຍພາກສ່ວນທີ່ກ່ຽວຂ້ອງ, ອົງການຈັດຕັ້ງບ້ານ ແລະ ປະຊາຊົນຜູ້ທີ່ໄດ້ຮັບຜົນກະທົບເຂົ້າຮ່ວມ.
ໄພນໍ້າຖ້ວມກະທັນຫັນຄັ້ງນີ້ ໄດ້ສ້າງຄວາມເສຍຫາຍໃຫ້ແກ່ປະຊາຊົນທັງສອງບ້ານ ລວມທັງ ໝົດ 56 ຄອບຄົວ. ໃນນັ້ນ, ບ້ານນໍ້າດີ ໄດ້ຮັບຜົນກະທົບຈຳນວນ 28 ຄອບຄົວ (ມີ 184 ຄົນ), ເຊິ່ງມີຄອບຄົວທີ່ຖືກຜົນກະທົບໜັກ 5 ຄອບຄົວ ( 29 ຄົນ); ຂະນະດຽວກັນ ຢູ່ທີ່ ບ້ານປ່າປົວະ ກໍມີຄອບທີ່ໄດ້ຮັບຜົນກະທົບຈຳນວນ 28 ຄອບຄົວ (112 ຄົນ).
 |
ເພື່ອເປັນການຕອບສະໜອງ ແລະ ບັນເທົາທຸກແກ່ປະຊາຊົນທີ່ກຳລັງປະສົບຄວາມຫຍຸ້ງຍາກ, ຫຼາຍພາກສ່ວນຈຶ່ງໄດ້ລະດົມທຶນຮອນ ແລະ ເຄື່ອງໃຊ້ທີ່ຈຳເປັນ ລົງມອບໃຫ້ແກ່ຄອບຄົວຜູ້ປະສົບໄພ ໂດຍມີບໍລິສັດລາວໂທລະຄົມມະນາຄົມມະຫາຊົນ ສາຂາແຂວງຫຼວງນໍ້າທາ ມອບເຄື່ອງຊ່ວຍເຫຼືອໃຫ້ແກ່ປະຊາຊົນທັງສອງບ້ານ, ມອບຢູ່ບ້ານນໍ້າດີ: ໝີ່ 28 ແກັດ ແລະ ນໍ້າດື່ມ 28 ແພັກ, ພ້ອມທັງມອບເງິນສົດໃຫ້ 5 ຄອບຄົວ ທີ່ຖືກຜົນກະທົບໜັກ ຄອບຄົວລະ 1 ລ້ານກີບ ແລະ ມອບເຄື່ອງອຸປະໂພກຈຳນວນໜຶ່ງ. ນອກຈາກນີ້, ຍັງໄດ້ມອບນໍ້າດື່ມ 10 ແພັກ, ຊາ ແລະ ກາເຟ ໃຫ້ແກ່ຄະນະບ້ານ ລວມມູນຄ່າ 15 ລ້ານກວ່າກີບ ແລະ ມອບຢູ່ບ້ານປ່າປົວະ ມີໝີ່ 28 ແກັດ ນໍ້າດື່ມ 28 ແພັກ ພ້ອມນັ້ນຍັງໄດ້ ມອບນໍ້າດື່ມ 10 ແພັກ, ຊາ ກາເຟ ໃຫ້ແກ່ຄະນະບ້ານ ລວມມູນຄ່າ 13 ລ້ານກີບ; ລັດວິສາຫະກິດນໍ້າປະປາ ສາຂາແຂວງຫຼວງນໍ້າທາ ມອບນໍ້າດື່ມ 28 ແພັກ ແລະ ໝີ່ 28 ແກັດ ໃຫ້ຄອບຄົວຜູ້ຮັບຜົນກະທົບຢູ່ບ້ານນໍ້າດີ ລວມມູນຄ່າ 5 ລ້ານກວ່າກີບ; ສະມາຄົມນັກທຸລະກິດແມ່ຍິງ ແຂວງຫຼວງນໍ້າທາ ນຳເອົານໍ້າດື່ມ ແລະ ໝີ່ ໄປມອບໃຫ້ປະຊາຊົນທັງສອງບ້ານ (ບ້ານນໍ້າດີ ແລະ ບ້ານປ່າປົວະ) ລວມມູນຄ່າ 4 ລ້ານ 6 ແສນກີບ. ຄະນະຄຸ້ມຄອງໄພພິບັດຂັ້ນແຂວງ ກໍຄື ພະແນກແຮງງານ ແລະ ສະຫວັດດີການສັງຄົມແຂວງ ນຳເອົາເຂົ້າຈ້າວຈຳນວນ 3 ໂຕນ 360 ກິໂລ ມອບໃຫ້ ບ້ານນໍ້າດີ 1 ໂຕນ 400 ກິໂລ ແລະ ບ້ານປ່າປົວະ 1 ໂຕນ 960 ກິໂລ; ອົງການກາແດງ ແຂວງຫຼວງນໍ້າທາ ມອບຊຸດເຄື່ອງບັນເທົາທຸກສຸກເສີນ ຈຳນວນ 56 ຖົງ ລວມມູນຄ່າທັງໝົດ 56 ລ້ານກວ່າກີບ ໂດຍມອບໃຫ້ບ້ານນໍ້າດີ 28 ຖົງ ແລະ ບ້ານປ່າປົວະ 28 ຖົງ (ລວມເປັນມູນຄ່າ 28 ລ້ານກວ່າກີບ ຕໍ່ໜຶ່ງບ້ານ), ພ້ອມກັນ ເມືອງຫຼວງນໍ້າທາ ກໍໄດ້ມອບນໍ້າດື່ມ ໃຫ້ບ້ານນໍ້າດີ ແລະ ບ້ານປ່າປົວະ ບ້ານລະ 20 ແພັກ; .ທັງນີ້ ກໍເພື່ອເປັນການບັນເທົາທຸກໃຫ້ແກ່ຜູ້ທີ່ໄດ້ຮັບຜົນກະທົບໄພນໍ້າຖ້ວມ ກັບຄືນສູ່ສະພາບປົກກະຕິໂດຍໄວ.
ຂ່າວ: ຫຼວງນ້ຳທາ
ຄໍາເຫັນ