 |
ພາຍຫຼັງໄດ້ຮັບຟັງການລາຍງານຫຍໍ້ ການຈັດຕັ້ງປະຕິບັດວຽກງານຊາວໜຸ່ມ ຈາກທ່ານ ນາງ ຈໍາປາທອງ ອິນທະວົງສາ ເລຂາຄະນະບໍລິຫານງານຊາວໜຸ່ມແຂວງ, ທ່ານ ທອງລີ ສີສຸລິດ ກໍໄດ້ມີຄໍາເຫັນໂອ້ລົມ ເພື່ອເປັນທິດທາງໃນການຈັດຕັ້ງປະຕິບັດ ເຮັດໃຫ້ວຽກງານຊາວໜຸ່ມໄດ້ມີການຫັນປ່ຽນໄປສູ່ບາດກ້າວອັນໃໝ່.
1. ສ້າງ “ພູມຄຸ້ມກັນທາງແນວຄິດ” ໃຫ້ຊາວໜຸ່ມເນື່ອງຈາກວ່າວຽກງານສຶກສາອົບຮົມການເມືອງແນວຄິດ ເປັນວຽກທີ່ສໍາຄັນ ແລະ ອະອຽດອ່ອນ ດັ່ງນັ້ນຕ້ອງນໍາໃຊ້ຮູບການທີ່ທັນສະໄໝ ໂດຍສະເພາະການນໍາໃຊ້ AI ແລະ ນໍາໃຊ້ທ່າແຮງນັກໂຄສະນາໜຸ່ມ ທີ່ມີຊື່ສຽງໃນສື່ສັງຄົມອອນລາຍ ມາເປັນກໍາລັງແຮງໃນການສຶກສາອົບຮົມ ແລະ ແທດເໝາະກັບ ຈິດຕະສາດຂອງຊາວໜຸ່ມ, ຕ້ອງສ້າງຊາວໜຸ່ມໃຫ້ມີຄວາມຮູ້, ມີສະຕິ, ຮັກຊາດ, ຮັກຮີດຄອງປະເພນີ ແລະຮູ້ເທົ່າທັນຂ່າວສານບິດເບືອນ ໃນສື່ອອນລາຍ.
2. ເປັນເຈົ້າການສະກັດກັ້ນຢາເສບຕິດ ແລະ ປະກົດການຫຍໍ້ທໍ້ ຈາກຮາກຖານ ລົງເຖິງໂຮງຮຽນ, ກຸ່ມບ້ານ ແລະ ຊຸມຊົນ ໂດຍເປົ້າໝາຍຄື “ບ້ານ ແລະ ໂຮງຮຽນປອດຢາເສບຕິດ.
3. ເຮັດໃຫ້ “4 ບຸກ” ກາຍເປັນວິຖີຊີວິດຂອງຊາວໜຸ່ມ ຄໍາວ່າ 4 ບຸກ ບໍ່ໃຫ້ຢຸດຢູ່ປ້າຍ ຫຼື ໃບຍ້ອງຍໍເທົ່ານັ້ນ ຕ້ອງມີການຕີລາຄາ, ປະເມີນຜົນ ແລະ ຍ້ອງຍໍຜູ້ທີ່ກ້າຄິດ, ກ້າເຮັດ, ກ້າຮັບຜິດຊອບ ແລະ ສ້າງຜົນງານຈິງ.
4. ເຮັດໃຫ້ “3 ດີ 4 ຮູ້” ຂອງເຍົາວະຊົນ ເຂົ້າສູ່ຊີວິດຈິງ ຕ້ອງປະສານກັບໂຮງຮຽນ ແລະ ຄູ-ອາຈານ ເພື່ອແລກປ່ຽນຂໍ້ແຂ່ງຂັນໃຫ້ເປັນຂະບວນການຈິງຂອງນັກຮຽນ ແລະ ເຍົາວະຊົນ.
5. ຜັນຂະຫຍາຍແຜນ 5 ປີ ໃຫ້ເປັນ “ແຜນທີ່ເຮັດຈິງ" ຕ້ອງເລີ່ມຈາກຮາກຖານ ບ້ານ, ສະຖາບັນ, ໂຮງງານ, ເຂດເສດຖະກິດ ແລະ ດ່ານຊາຍແດນ ພ້ອມສ້າງພະນັກງານສືບທອດໃຫ້ຮູ້ພາສາຕ່າງປະເທດ, Digital, AI ແລະ ວິຊາສະເພາະ.
6. ສ້າງວຽກໃຫ້ຊາວໜຸ່ມ ໂດຍໃຊ້ທ່າແຮງຂອງແຂວງ ຕ້ອງສ້າງຖານຂໍ້ມູນແຮງງານຢ່າງເປັນລະບົບ ຮ່ວມກັບພະແນກແຮງງານ ແລະ ສະຫວັດດີການສັງຄົມ ແລະ ຜູ້ປະກອບການ ໂດຍໃຫ້ມີການຝຶກຊາວໜຸ່ມໃຫ້ກົງກັບວຽກທີ່ຫົວໜ່ວຍທຸລະກິດມີຄວາມຕ້ອງການ, ນໍາໃຊ້ທ່າແຮງຂອງສະມາຄົມນັກທຸລະກິດໜຸ່ມແຂວງ ຫັນເປັນສັນຍາສອງສົ້ນ ໂດຍການຮ່ວມມືກັບ ສະຖາບັນຕ່າງໆ ເພື່ອກຳນົດຕຳແໜ່ງງານ ແລະ ຄວາມຕ້ອງການຂອງແຮງງານໃນຂະແໜງການ ເພື່ອການຕັດສິນໃຈແຕ່ເບື້ອງຕົ້ນ ຂອງຊາວໜຸ່ມ ວ່າຮຽນຈົບແລ້ວຈະໄປເຮັດວຽກຢູ່ໃສ.
7. ຜັນຂະຫຍາຍເນື້ອໃນບົດບັນທຶກຮ່ວມມື MOU ຂອງສູນກາງຊາວໜຸ່ມນໍາໄປຈັດຕັ້ງໃຫ້ມີຜົນສໍາເລັດຕົວຈິງ ໂດຍສະເພາະ MOU ຮ່ວມກັບ ກະຊວງກະຊິກຳແລະ ສິ່ງແວດລ້ອມ ເພື່ອກຳນົດການປູກ-ການລ້ຽງແບບໃໝ່ ທີ່ບໍ່ມີຄວາມສ່ຽງທັງໃນລະດູແລ້ງ ແລະ ລະດູຝົນ ເພື່ອສ້າງເປັນໂຄງການຕົວແບບ ໂດຍນໍາໃຊ້ຮູບແບບການປູກ-ການລ້ຽງທີ່ທັນສະໄໝ ເພື່ອຫຼຸດຜ່ອນຜົນກະທົບຈາກໄພພິບັດທາງທຳມະຊາດ ຕິດພັນກັບວາລະແຫ່ງຊາດ ວ່າດ້ວຍການແກ້ໄຂຄວາມທຸກຍາກຂອງປະຊາຊົນ ຕິດພັນກັບວຽກງານ 3 ສ້າງ ເນັ້ນກຸ່ມຜະລິດ-ສະຫະກອນຊາວໜຸ່ມ, ຝຶກອາຊີບກະສິກຳຍືນຍົງ, ການສ້າງມູນຄ່າ-ແປຮູບ, ຕະຫຼາດນັດກະສິກຳຊາວໜຸ່ມ ແລະ ອາສາສະໝັກອະນຸລັກສິ່ງແວດລ້ອມ.
ຂ່າວ: ກອງຄໍາ
ຄໍາເຫັນ