ເລຂາທິການໃຫຍ່ ເນັ້ນວຽກງານພະນັກງານຍາມໃດກໍເປັນກົກເຄົ້າຂອງທຸກວຽກງານ

ສະຫາຍ ທອງລຸນ ສີສຸລິດ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດ, ຄວາມເອົາໃຈໃສ່, ຄວາມບຸກບືນສູ້ຊົນ ຂອງຄະນະຈັດຕັ້ງສູນກາງພັກ, ຄະນະພັກແຕ່ລະຂັ້ນ ໂດຍສະເພາະແມ່ນ ຜູ້ທີ່ຮັບຜິດ ຊອບວຽກງານຈັດຕັ້ງ ໃນທົ່ວປະເທດ ຍາດຜົນງານມາໄດ້ ໃນ 5 ປີ ຜ່ານມາ ແລະ ໄດ້ເນັ້ນໃນຊຸມປີຕໍ່ໜ້າໃຫ້ ສືບຕໍ່ຍົກສູງບົດບາດການນຳພາທີ່ເຂັ້ມແຂງຂອງພັກ, ສ້າງພັກໃຫ້ປອດໃສ, ເຂັ້ມແຂງ, ໜັກແໜ້ນ ຮັບປະກັນການກໍາອໍານາດຂອງພັກໄວ້ຢ່າງໝັ້ນຄົງ, ວຽກງານພະນັກງານ ຍາມໃດກໍເປັນກົກເຄົ້າຂອງທຸກວຽກງານທີ່ສໍາຄັນໃນທຸກການເຄື່ອນໄຫວຂອງພັກຂອງລັດ, ເປັນປັດໄຈຕັດສິນຜົນສໍາເລັດ ຫຼື ປະລາໄຊຂອງການປະຕິວັດ, ແນວທາງດ້ານພະນັກງານຂອງພັກ ຖືເປັນວຽກໃຈກາງທີ່ຕ້ອງໄດ້ນໍາພາຊີ້ນໍາຢ່າງເປັນລະບົບຕໍ່ເນື່ອງ, ຕອບສະໜອງໃຫ້ໄດ້ ຄວາມຮຽກຮ້ອງຕ້ອງການ ຂອງການພັດທະນາໃນແຕ່ລະໄລຍະ. ສະນັ້ນ, ຄະນະພັກທຸກຂັ້ນ ຕ້ອງເອົາໃຈໃສ່ຢ່າງຈົດຈໍ່ທີ່ສຸດ, ຮອບຄອບທີ່ສຸດ ຕໍ່ວຽກງານພະນັກງານ-ລັດຖະກອນ, ການສ້າງແຜນກໍານົດພະນັກງານນໍາພາຄຸ້ມຄອງຂັ້ນຍຸດທະສາດຂອງພັກ ກໍຄື ຢູ່ແຕ່ລະຂັ້ນ, ສືບຕໍ່ປັບປຸງກົງຈັກການຈັດຕັ້ງ ຕາມທິດ “ກະທັດຮັດ, ຫັນເປັນທັນສະໄໝ ແລະ ມີປະສິດທິຜົນ”, ໃນຕໍ່ໜ້ານີ້, ຕ້ອງສືບຕໍ່ປັບປຸງ, ກໍ່ສ້າງກົງຈັກລັດ ດ້ວຍການສັບຊ້ອນ, ບູລະນະການຈັດຕັ້ງໃຫ້ເຂັ້ມແຂງ, ສາມາດຍົກສູງປະສິດທິຜົນໃນການຄຸ້ມຄອງເສດຖະກິດ, ຄຸ້ມຄອງສັງຄົມ ແລະ ບໍລິການສັງຄົມໃຫ້ເຂັ້ມແຂງ, ມີຄວາມສາມາດໃນການປ້ອງກັນຊາດ-ປ້ອງກັນຄວາມສະຫງົບ ຮັບປະກັນໃຫ້ແນວທາງ, ນະໂຍບາຍຂອງພັກ ໄດ້ຮັບການປະຕິບັດຢ່າງຖືກຕ້ອງ, ທັງຮັບປະກັນສິດຜົນປະໂຫຍດຂອງປະຊາຊົນ ໄດ້ຢ່າງແທ້ຈິງ, ສືບຕໍ່ສຸມໃສ່ການສ້າງຕັ້ງ 621 ຕາແສງໃນທົ່ວປະເທດໃຫ້ສໍາເລັດຕາມແຜນການ ພາຍໃນປີ 2027 ແລະ ສາມາດເຄື່ອນໄຫວປະຕິບັດພາລະບົດບາດ, ສິດ ແລະ ໜ້າທີ່ ຢ່າງຕັ້ງໜ້າ, ກາຍເປັນບ່ອນອີງຂອງຮາກຖານ, ເປັນບ່ອນບໍລິການຮັບໃຊ້ ແກ້ໄຂບັນຫາຕົວຈິງຂອງປະຊາຊົນ ແລະ ເປັນບ່ອນຜັນຂະຫຍາຍແນວທາງຂອງພັກລົງສູ່ຮາກຖານ, ອັນສຳຄັນ, ຕ້ອງຮັບປະກັນໃຫ້ພະນັກງານປະຈຳຕາແສງ ກໍາແໜ້ນ "4 ຮູ້" ຕາມຄໍາສອນຂອງ ປະທານ ໄກສອນ ພົມວິຫານ:“1). ຮູ້ນຳພາດ້ານການເມືອງ-ແນວຄິດ, 2). ຮູ້ຈຳແນກມິດ-ສັດຕູ, 3). ຮູ້ຊີ້ນຳການພັດທະນາເສດຖະກິດ, 4). ຮູ້ຊີ້ນຳວຽກງານວັດທະນະທຳ - ສັງຄົມ”, ໃຫ້ຖືສໍາຄັນວຽກງານແຂ່ງຂັນ ແລະ ຍ້ອງຍໍ ເພື່ອຍູ້ແຮງຂະບວນການແຂ່ງຂັນຮັກຊາດ ແລະ ພັດທະນາ ໃນກົງຈັກ ພັກ - ລັດ ກໍຄື ທົ່ວສັງຄົມໃຫ້ຟົດຟື້ນຂຶ້ນຕື່ມ ແລະ ເສີມຂະຫຍາຍຄຸນຄ່າຂອງນາມມະຍົດຕ່າງໆໃຫ້ສູງຂຶ້ນ, ຂຸດຄົ້ນທ່າແຮງແຫ່ງຫົວຄິດປະດິດສ້າງ ແລະ ການປະກອບສ່ວນຂອງມະຫາຊົນ ໃຫ້ໄດ້ດີຂຶ້ນ, ຈັດຕັ້ງດຶງດູດເອົາບຸກຄົນ-ນິຕິບຸກຄົນເຂົ້າຮ່ວມໃນຂະບວນການແຂ່ງຂັນ, ເຮັດໃຫ້ດີ, ເຮັດໃຫ້ຫຼາຍ, ປະຢັດ, ທັນເວລາ ນັບມື້ນັບຫຼາຍ, ເພື່ອກະກຽມໃຫ້ແກ່ການດໍາເນີນກອງປະຊຸມໃຫຍ່ 3 ຂັ້ນຂອງພັກ ແລະ ກ້າວໄປສູ່ການກະກຽມໃຫ້ແກ່ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XIII ຂອງພັກ ແຕ່ຫົວທີ, ໃຫ້ຄະນະຈັດຕັ້ງສູນກາງພັກເປັນເສນາທິການໃຫ້ກົມການເມືອງສູນກາງພັກ ຮີບຮ້ອນກວດກາຄືນບັນດານິຕິກຳ, ມະຕິ, ຄຳສັ່ງ, ຄຳແນະນຳ ຕ່າງໆ ອັນໃດຈະສ້າງຂຶ້ນໃໝ່, ອັນໃດຈະປັບປຸງໃຫ້ຄົບຖ້ວນ ແລະ ຖືກຕົວຈິງກວ່າເກົ່າ ໃນເງື່ອນໄຂທີ່ໄດ້ມີການປັບປຸງກົງຈັກການຈັດຕັ້ງຂັ້ນສູນກາງ ແລະ ຂັ້ນທ້ອງຖິ່ນ ລວມທັງກົນໄກ, ແບບແຜນນໍາພາ ແລະ ວິທີເຮັດວຽກອັນໃໝ່; ໃຫ້ມີການແຕ່ງຕັ້ງຄະນະຊີ້ນໍາ ແລະ ອະນຸກໍາມະການຕ່າງໆເພື່ອກະກຽມຢ່າງເປັນເຈົ້າການ, ບໍ່ໃຫ້ວຽກໄປຂ້ອນໄລຍະທ້າຍ ຄືຜ່ານມາ.
(ຂ່າວ-ພາບ: ສຳນານ)