ແຫຼ່ງທ່ອງທ່ຽວທຳມະຊາດນໍ້າຕົກຕາດສຽງລື ເມືອງບົວລະພາ ແຂວງຄຳມ່ວນ ໄດ້ຮັບການສຳປະທານ ແລະ ພັດທະນາ ໂດຍກຸ່ມບໍລິສັດ ສາຍພູຫຼວງ ໃນເນື້ອທີ່ 33 ເຮັກຕາ, ໃນມູນຄ່າການລົງທຶນທັງໝົດ 12 ລ້ານກວ່າໂດລາ ແລະ ມີໄລຍະການສຳປະທານ 40 ປີ ຊຶ່ງເປັນຮູບການລົງທຶນພາຍໃນ 100%. ໂດຍໄດ້ເຊັນບົດບັນທຶກຄວາມເຂົ້າໃຈ (MOU) ວ່າດ້ວຍການສຶກສາ-ສຳຫຼວດ ແລະ ພັດທະນາ ໃນປີ 2018 ທາງບໍລິສັດກໍໄດ້ດຳເນີນການສຶກສາ-ສຳຫຼວດຄວາມເປັນໄປໄດ້ບັນດາໜ້າວຽກຕ່າງໆໂດຍໄດ້ແບ່ງເປັນແຕ່ລະເຂດໃນການພັດທະນາ ແລະ ແຕ່ລະໄລຍະປະກອບມີ: ໄລຍະການປຸກສ້າງສະຖານທີ່ຮອງຮັບ ແລະ ສູນບໍລິການ, ກໍ່ສ້າງສູນຂໍ້ມູນດ້ານການທ່ອງທ່ຽວ, ການຕິດຕັ້ງອຸປະກອນ ແລະ ສິ່ງອຳນວຍຄວາມສະດວກໃນການທ່ອງທ່ຽວ, ໄລຍະການດຳເນີນການບໍລິການ ແລະ ການດຳເນີນກິດຈະການອື່ນໆທີ່ຕິດພັນກັບການພັດທະນາສະຖານທີ່ທ່ອງທ່ຽວ ແບບອະນຸລັກທຳມະຊາດໃນເຂດນໍ້າຕົກຕາດສຽງລື ແລະ ໄດ້ນຳສະເໜີຂໍອະນຸມັດຈາກບັນດາອົງການລັດທີ່ກ່ຽວຂ້ອງເພື່ອດຳເນີນກິດຈະການ.
ເນື່ອງຈາກໄລຍະ 2 ປີຜ່ານມາ ແມ່ນໄດ້ປະສົບບັນຫາການລະບາດຂອງພະຍາດໂຄວິດ -19 ເຮັດໃຫ້ທາງບໍລິສັດບໍ່ສາມາດດໍາເນີນກິດຈະການໄດ້. ປັດຈຸບັນທາງບໍລິສັດແມ່ນກໍາລັງຂຸ້ນຂ່ຽວໃນການດໍາເນີນກິດຈະການປັບປຸງກໍ່ສ້າງພື້ນຖານໂຄງລ່າງ ເພື່ອຮອງຮັບໃຫ້ແກ່ການທ່ອງທ່ຽວ ໂດຍສະເພາະແມ່ນການກໍ່ສ້າງເສັ້ນທາງເຂົ້າສູ່ແຫຼ່ງທ່ອງທ່ຽວຕາດສຽງລື, ການຈັດສັນພື້ນທີ່ເພື່ອສ້າງຈຸດບໍລິການ ແລະ ພື້ນຖານໂຄງລ່າງດ້ານກິດຈະກໍາອື່ນໆ ທີ່ຕິດພັນກັບການບໍລິການ-ການທ່ອງທ່ຽວ.
ທ່ານ ອຳພອນ ບຸນຍາລາດ ປະທານກຸ່ມບໍລິສັດ ສາຍພູຫຼວງ ໄດ້ລາຍງານຄວາມຄືບໜ້າໃນການພັດທະນາແຫຼ່ງທ່ອງທ່ຽວດັ່ງກ່າວ ໃນວັນທີ 12 ທັນວາ ຜ່ານມາວ່າ: ປັດຈຸບັນແມ່ນກຳລັງກໍ່ສ້າງພື້ນຖານໂຄງລ່າງທີ່ມີຄວາມຈຳເປັນ ເພື່ອຕອບສະໜອງກັບເປົ້າໝາຍທີ່ການນໍາຂັ້ນແຂວງໄດ້ກຳນົດໃຫ້ມີການເປີດແຫຼ່ງທ່ອງທ່ຽວໃໝ່ ຈຳນວນ 2 ແຫຼ່ງ ເພື່ອຕ້ອນຮັບປີທ່ອງທ່ຽວລາວ 2024 ຊຶ່ງປະກອບມີ ຂຸນກອງແລງ ເມືອງຫີນບູນ ແລະ ຕາດສຽງລື ເມືອງບົວລະພາ ໃນນີ້ແມ່ນເລັ່ງໃສ່ປັບປຸງເສັ້ນທາງເຂົ້າຫາຈຸດບໍລິການ ໃຫ້ຄວາມສະດວກ ແລະ ກໍ່ສ້າງເສັ້ນທາງຍ່າງເຂົ້າຫາຕາດ, ການກໍ່ສ້າງຮ້ານອາຫານ, ຫ້ອງນໍ້າສະອາດ, ກໍ່ສ້າງຂົວອູ່ ແລະ ສິ່ງອຳນວຍຄວາມສະດວກອື່ນໆ ຊຶ່ງຄາດວ່າຈະໃຫ້ສຳເລັດ ພ້ອມທັງເປີດໃຫ້ບໍລິການແກ່ນັກທ່ອງທ່ຽວ ໃນລະຫວ່າງເດືອນພຶດສະພາ ຫາ ເດືອນມິຖຸນາ 2024 ເພາະເປັນໄລຍະທີ່ມີນໍ້າຫຼາຍ ເຮັດໃຫ້ນໍ້າຕົກຕາດມີຄວາມສວຍງາມທີ່ສຸດ.
ທ່ານ ອຳພອນ ບຸນຍາລາດ ໄດ້ໃຫ້ລາຍລະອຽດຕື່ມວ່າ: ສຳລັບການເປີດໃຫ້ບໍລິການໃນຊ່ວງທຳອິດແມ່ນຈະເນັ້ນໃຫ້ການບໍລິການທາງດ້ານຮ້ານອາຫານ, ຫ້ອງນໍ້າ ແລະ ຍ່າງຂົວອູ່, ຍ່າງຊົມນໍ້າຕົກຕາດ, ມີທັງຕົ້ນໄມ້ໃຫຍ່ຫຼາຍຊະນິດ ແລະ ສັດປ່າຈຳນວນໜຶ່ງ ທີ່ຍັງຄົງຄວາມອຸດົມສົມບູນຂອງທຳມະຊາດໃນບໍລິເວນດັ່ງກ່າວ. ພິເສດຖ້າຢາກຈະມານອນພັກຜ່ອນ ກໍຈະມີເຕັ້ນໃຫ້ບໍລິການໃຫ້ນັກທ່ອງທ່ຽວ ໄດ້ນອນພັກສຳຜັດກັບບັນຍາກາດທີ່ສົດຊື່ນ, ສູດອາກາດສົດ, ເບິ່ງແສງຕາເວັນຂຶ້ນຫວ່າງກາງພູຜາໃນຍາມເຊົ້າ ຟັງສຽງນົກ ແລະ ສັດປ່າຫຼາຍຊະນິດ ທີ່ມີສຽງຮ້ອງປະສົມປະສານກັບສຽງນໍ້າຕົກຕາດຢ່າງໜ້າອອນຊອນ ແລະ ແຜນການໃນຕໍ່ໜ້າຈະໄດ້ກໍ່ສ້າງເຮືອນພັກ, ຣີສອດ, ມີກິດຈະກຳຂີ່ສາຍສະລິງ, ຈຸດຖ່າຍຮູບຕາໜ່າງໃຍແມງມຸມໜ້ານໍ້າຕົກ ແລະ ສິ່ງອຳນວຍຄວາມສະດວກຕ່າງໆ ເພື່ອໄວ້ຄອຍບໍລິການນັກທ່ອງທ່ຽວ.
ຂ່າວ-ພາບ: ກອງຄຳ
ຄໍາເຫັນ