ລວມຍອດຜະລິດຕະພັນພາຍໃນຂະຫຍາຍຕົວສະເລ່ຍໃນລະດັບ 4.24%

ສະຫາຍ ສອນໄຊ ສີພັນດອນ ກຳມະການກົມການເມືອງສູນກາງພັກ ນາຍົກລັດຖະມົນຕີ ແຫ່ງ ສ ປ ປ ລາວ ໄດ້ສເໜີຮ່າງບົດສະຫຼຸບຕີລາຄາ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX (2021-2025) ແລະ ແຜນພັດທະນາເສດຖະກິດ-ສັງຄົມ ແຫ່ງຊາດ 5ປີ ຄັ້ງທີ X (2026-2030) ຕໍ່ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກ ປະຊາຊົນ ປະຕິວັລາວ ໃນວັນທີ 6 ມັງກອນນີ້ ຊຶ່ງໄດ້ຍົກໃຫ້ເຫັນວ່າ: ໃນໄລຍະ 5 ປີ ຜ່ານມາ ໄດ້ສຸມໃສ່ປະຕິບັດມາດຕະການຕ່າງໆ ເພື່ອຟື້ນຟູເສດຖະກິດ ໂດຍສຸມໃສ່ຊຸກຍູ້ການຜະລິດ ແລະ ການບໍລິການ ໃຫ້ສືບຕໍ່ຂະຫຍາຍຕົວ ເປັນຕົ້ນ ການເປີດປະເທດຄືນໃໝ່ພາຍຫຼັງການລະບາດພະຍາດໂຄວິດ-19, ການຊຸກຍູ້ສົ່ງເສີມການຜະລິດ ເພື່ອທົດແທນການນໍາເຂົ້າ ແລະ ສົ່ງອອກ ຕິດພັນກັບການປ່ອຍສິນເຊື່ອ ເພື່ອຟື້ນຟູເສດຖະກິດ, ການປະຕິບັດໂຄງການທົດລອງແຮ່ທາດ, ການສົ່ງເສີມການທ່ອງທ່ຽວ, ການປັບປຸງການບໍລິການຂົນສົ່ງພາຍໃນ ແລະ ຕ່າງປະເທດ ແລະ ອື່ນໆ ເຮັດໃຫ້ເສດຖະກິດສືບຕໍ່ຂະຫຍາຍຕົວ ຢ່າງຕໍ່ເນື່ອງ, GDP ຂະຫຍາຍຕົວສະເລ່ຍໃນລະດັບ 4.24% ຊຶ່ງບັນລຸຄາດໝາຍທີ່ວາງໄວ້ 4% ຂຶ້ນໄປ.
ພ້ອມດຽວກັນນີ້, GDP ຕໍ່ຫົວຄົນ ບັນລຸໄດ້ 2,138 ໂດລາ (ແຜນການ 2,880 ໂດລາ) ແລະ GNI ຕໍ່ຫົວຄົນ ບັນລຸໄດ້ 1,985 ໂດລາ (ແຜນການ 2,280 ໂດລາ); ໃນນັ້ນ, ຂະແໜງກະສິກຳ ຂະຫຍາຍຕົວສະເລ່ຍ ກວມ 19.4% ຂອງ GDP (ແຜນການ: ຂະຫຍາຍຕົວ 2.5% ແລະ ກວມ 15.3%), ຂະແໜງອຸດສາຫະກຳ ຂະຫຍາຍຕົວສະເລ່ຍ 4.7%, ກວມ 32.5% (ແຜນການ ຂະຫຍາຍຕົວ 4.1% ແລະ ກວມ 32.3%), ຂະແໜງບໍລິການ ຂະຫຍາຍຕົວສະເລ່ຍ 4.5%, ກວມ 36.6% (ແຜນການ: ຂະຫຍາຍຕົວ 6% ແລະ ກວມ 41.3%), ຂະແໜງພາສີ-ອາກອນ ຜະລິດຕະພັນ ຂະຫຍາຍຕົວສະເລ່ຍ 3.8%, ກວມ 11.5% ຂອງ GDP (ແຜນການ 5.8% ແລະ ກວມ 11.7% ຂອງ GDP); ດ້ານການຜະລິດ ແລະ ການບໍລິການ ມີການຂະຫຍາຍຕົວດີ, ພົ້ນເດັ່ນ ແມ່ນການຜະລິດເຂົ້າ ປະຕິບັດໄດ້ 18.9 ລ້ານໂຕນ ສະເລ່ຍ 3.7 ລ້ານໂຕນຕໍ່ປີ (ແຜນການ 3.5-4 ລ້ານໂຕນຕໍ່ປີ), ຜະລິດພືດເປັນສິນຄ້າ ໄດ້ 9.5 ລ້ານໂຕນຕໍ່ປີ (ແຜນການ 7.4 ລ້ານໂຕນຕໍ່ປີ), ການຜະລິດເຂົ້າ, ຊີ້ນ, ໄຂ່ ແລະ ປາ ສາມາດຕອບສະໜອງຄວາມຕ້ອງການຂອງຕະຫຼາດພາຍໃນໄດ້ໂດຍພື້ນຖານ ແລະ ສົ່ງອອກຜະລິດຕະພັນກະສິກຳ ແລະ ປ່າໄມ້ ໄດ້ 7,8 ຕື້ໂດລາ, ສະເລ່ຍ 1.5 ຕື້ໂດລາ ຕໍ່ປີ ລື່ນຄາດໝາຍ 31.49% (ແຜນ 1.2 ຕື້ໂດລາ); ມູນຄ່າການຜະລິດພະລັງງານໄຟຟ້າ ໄດ້ 262,848.19 ຕື້ກີບ, ເທົ່າກັບ 186.58% ຂອງແຜນ (ແຜນການ 140,879.6ຕື້ກີບ), ເພີ່ມຂຶ້ນສະເລ່ຍ 26.96% ຕໍ່ປີ, ມູນຄ່າການຜະລິດແຮ່ທາດ 179,755.35 ຕື້ກີບ, ບັນລຸໄດ້ 320.36% ຂອງແຜນ (ແຜນການ 56,111 ຕື້ກີບ) ຫຼື ເພີ່ມຂຶ້ນສະເລ່ຍ 39.26% ຕໍ່ປີ; ມູນຄ່າ ການຈໍລະຈອນສິນຄ້າ ໄດ້ 410,269.82 ຕື້ກີບ ເທົ່າກັບ 96.71% ຂອງແຜນ (ແຜນການ 424,227.52 ຕື້ກີບ) ເພີ່ມຂຶ້ນສະເລ່ຍ 9.97% ຕໍ່ປີ, ສາມາດຂົນສົ່ງສິນຄ້າໄດ້ 60.32 ລ້ານໂຕນ, ເພີ່ມຂຶ້ນສະເລ່ຍ 19.26% ຕໍ່ປີ ແລະ ການຂົນສົ່ງໂດຍສານ ສາມາດບັນລຸໄດ້ 484.7 ລ້ານເທື່ອຄົນ, ເພີ່ມຂຶ້ນສະເລ່ຍ 6.15% ຕໍ່ປີ.
ນອກນີ້, ກໍໄດ້ຕັ້ງໜ້າປັບປຸງກົນໄກ, ລະບຽບການ ແລະ ຫັນເປັນ ທັນສະໄໝ, ຄຽງຄູ່ກັບການຂະຫຍາຍຖານລາຍຮັບ, ເພີ່ມທະວີການກວດກາ ແລະ ຕ້ານການຮົ່ວໄຫຼ ຂອງງົບປະມານ, ມອບຄວາມຮັບຜິດຊອບໃຫ້ທ້ອງຖິ່ນຫຼາຍຂຶ້ນ ແລະ ອື່ນໆ ເຮັດໃຫ້ສາມາດເກັບລາຍຮັບ ງົບປະມານໄດ້ເກີນແຜນ 5 ປີຊ້ອນ, ໃນ 5 ປີ ມີລາຍຮັບງົບປະມານທັງໝົດ 251,910 ຕື້ກີບ, ເທົ່າກັບ 140% ຂອງແຜນ ຫຼື ເທົ່າກັບ 18.65% ຂອງ GDP (ແຜນການ 17% ຂອງ GDP); ລາຍຈ່າຍປະຕິບັດໄດ້ທັງໝົດ 233,515.02 ຕື້ກີບ ເທົ່າກັບ 123% ຂອງແຜນ ຫຼື ເທົ່າກັບ 17.29% ຂອງ GDP (ແຜນການ 18% ຂອງ GDP) ແລະ ເກີນດຸນງົບປະມານ 18,394.33 ຕື້ກີບ ເທົ່າກັບ 1.4% ຂອງ GDP (ແຜນຂາດດຸນບໍ່ໃຫ້ກາຍ 2% ຂອງ GDP); ໄດ້ປະຕິບັດມາດຕະການຕ່າງໆ ເພື່ອແກ້ໄຂໜີ້ສິນສາທາລະນະ ເຮັດໃຫ້ລະດັບໜີ້ສິນຫຼຸດລົງ ຈາກ 112% ຂອງ GDP ໃນປີ 2022 ມາເປັນປະມານ 88% ຂອງ GDP ໃນປີ 2025, ໄດ້ເອົາໃຈໃສ່ຄຸ້ມຄອງເງິນຕາດ້ວຍມາດຕະການຕ່າງໆ ເປັນຕົ້ນການດໍາເນີນນະໂຍບາຍເງິນຕາແບບປະສົມປະສານ (ບາງໄລຍະຜ່ອນຄາຍ ແລະ ບາງໄລຍະ ຮັດກຸມ), ປະຕິບັດນະໂຍບາຍອັດຕາແລກປ່ຽນຕາມກົນໄກຕະຫຼາດ ທີ່ມີການຄຸ້ມຄອງຂອງລັດ ທີ່ມີຄວາມຍືດຍຸນກວ່າເກົ່າ, ໄດ້ປັບປຸງກົນໄກການຄຸ້ມຄອງການແລກປ່ຽນເງິນຕາຕ່າງປະເທດ ແລະ ເຂັ້ມງວດການຄຸ້ມຄອງເງິນຕາຕ່າງປະເທດໃຫ້ຜ່ານທະນາຄານຫຼາຍຂຶ້ນ ແລະ ອື່ນໆ ເຮັດໃຫ້ອັດຕາເງິນເຟີ້ຫຼຸດລົງ ຈາກ 22.96% ໃນປີ 2022 ມາເປັນ 8.3% ໃນປີ 2025 (10 ເດືອນ) ສະເລ່ຍ 5 ປີ ຢູ່ໃນລະດັບ 17.9% (ແຜນການ: ສະເລ່ຍບໍ່ເກີນ 6%), ອັດຕາແລກປ່ຽນເງິນກີບທຽບໃສ່ເງິນໂດລາ ສະເລ່ຍອ່ອນຄ່າ 15.16% (ແຜນການ ±5%) ແລະ ຄັງສຳຮອງເງິນຕາຕ່າງປະເທດເພີ່ມຂຶ້ນ.
(ຂ່າວ: ສໍານານ, ພາບ: ຕຸໄລເພັດ)