ຫຼວງພະບາງ-ແຂວງກວາງນິ່ງ ສືບ​ຕໍ່​ຮັດ​ແໜ້ນ​ການຮ່ວມມື

ໂອກາດດັ່ງກ່າວ ສະຫາຍ ບຸນເລື່ອມ ມະນີວົງ ໄດ້ຕາງໜ້າໃຫ້ການນໍາ ແລະ ປະຊາຊົນບັນດາເຜົ່າ ໃນທົ່ວແຂວງຫຼວງພະບາງ ສະແດງຄວາມຍິນດີຕ້ອນຮັບຢ່າງອົບອຸ່ນ ຕໍ່ຄະນະຜູ້ແທນແຂວງກວາງນິ່ງ ທີ່ມາເຄື່ອນໄຫວ ຢ້ຽມຢາມ ແລະ ເຮັດວຽກ ຢູ່ແຂວງຫຼວງພະບາງ ເປັນການປະກອບສ່ວນອັນສຳຄັນ ເຂົ້າໃນການພົວພັນຄູ່ຮ່ວມມື ຮອບດ້ານ ລະຫວ່າງ ແຂວງຫລວງພະບາງ ກັບ ແຂວງກວາງນິ່ງ ໃຫ້ນັບມື້ແໜ້ນແຟ້ນ, ເຂົ້າສູ່ລວງເລິກກວ່າເກົ່າ, ພ້ອມທັງລາຍງານສະພາບລວມຈຸດພິເສດ ຂອງແຂວງຫຼວງພະບາງ ໂດຍຫຍໍ້ໃຫ້ຄະນະຜູ້ແທນແຂວງກວາງນີ່ງຮັບຮູ້ ແລະ ຕີລາຄາສູງຕໍ່ບັນດາຜົນງານ ທີ່ຄະນະພັກ-ຄະນະນະນຳ ແລະ ປະຊາຊົນແຂວງກວາງນິ່ງ ໄດ້ຮ່ວມມືກັນຈັດຕັ້ງປະຕິບັດ ບົດບັນທຶກຊ່ວຍຈໍາທີ່ທັງສອງແຂວງ ໄດ້ລົງນາມຮ່ວມກັນໃນໄລຍະຜ່ານມາ, ໂດຍສະເພາະແມ່ນການຊ່ວຍກໍ່ສ້າງຊັບພະຍາກອນມະນຸດ ແລະ ພັດທະນາພື້ນຖານໂຄງລ່າງ ດ້ານການສຶກສາ ແກ່ແຂວງຫຼວງພະບາງ, ທັງມີແຜນຈະສືບຕໍ່ໃຫ້ການຊ່ວຍເຫຼືອຕື່ມໃນຕໍ່ໜ້າ, ຖືເປັນການປະຕິບັດແນວທາງການຮ່ວມມືຂອງສອງພັກ, ສອງລັດ ທີ່ເລຂາທິການໃຫຍ່ ທອງລຸນ ສີສຸລິດ ແລະ ເລຂາທິການໃຫຍ່ ໂຕເລິ່ມ ໄດ້ຕົກລົງຮ່ວມກັນໃນເມື່ອບໍ່ດົນມານີ້.

ໂອກາດດຽວກັນ ສະຫາຍ ກວານ ມິ່ງ ເກືອງ ໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ຈາກການນຳ ແລະ ປະຊາຊົນແຂວງຫຼວງພະບາງ, ພ້ອມທັງລາຍງານສະພາບລວມ, ທ່າແຮງດ້ານເສດຖະກິດ ຂອງແຂວງກວາງນິ່ງ ໃຫ້ການນຳແຂວງຫຼວງພະບາງຮັບຮູ້ ໂດຍຫຍໍ້ ແລະ ຕີລາຄາສູງຕໍ່ການຮ່ວມມືຂອງແຂວງກວາງນິ່ງ ກັບແຂວງຫຼວງພະບາງ ເຊິ່ງເປັນແຂວງທີ່ມີທ່າແຮງຄ້າຍຄືກັນ ເປັນຕົ້ນມີສະຖານທີ່ມໍລະດົກໂລກ, ການພັດທະນາການທ່ອງທ່ຽວ ແລະ ອື່ນໆ, ພ້ອມນັ້ນ ສະຫາຍໄດ້ເຫັນດີເປັນເອກະພາບ ຕໍ່ການສະເໜີຂອງເລຂາພັກແຂວງຫຼວງພະບາງ ທີ່ຈະຊຸກຍູ້ໃຫ້ການນຳ ແລະ ວິຊາການທັງສອງແຂວງ ໄດ້ມີການໄປມາ-ແລກປ່ຽນບົດຮຽນກັນໃນຕໍ່ໜ້າ, ທັງຈະສືບຕໍ່ຊ່ວຍບຳລຸງ-ກໍ່ສ້າງ ພະນັກງານການນຳ ແລະ ນັກສຶກສາແຂວງຫຼວງພະບາງ ຕາມບົດບັນທຶກຊ່ວຍຈຳ ທີ່ລົງນາມຮ່ວມກັນ, ພ້ອມນັ້ນ ສະຫາຍໄດ້ສະເໜີໃຫ້ການນຳແຂວງຫຼວງພະບາງ ຊ່ວຍຊຸກຍູ້ໃຫ້ຂະແໜງອຸດສາຫະກຳ ແລະ ການຄ້າທັງສອງແຂວງ ໄດ້ມີການແລກປ່ຽນ ການວາງສະແດງ ແລະ ຈຳໜ່າຍສີນຄ້າ ຜະລິດຕະພັນທີ່ເປັນເອກະລັກຂອງທັງສອງແຂວງໃນໂອກາດທີ່ເໝາະສົມ ແລະ ຈະສືບຕໍ່ຊຸກຍູ້ບັນດານັກລົງທືນ ເຂົ້າມາສຶກສາ ທັງລົງທືນພັດທະນາແຂວງຫຼວງພະບາງ ໃນຕໍ່ໜ້າ.

ຂ່າວ-ພາບ: ທະນູສີນ ອິດທິພົນ