ມາດຕະການ ກົນໄກຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ X

 

 

ການສ້າງເສດຖະກິດເອກະລາດເປັນເຈົ້າຕົນເອງຄື: ຊຸກຍູ້ທຸກພາກສ່ວນເສດຖະກິດໃຫ້ເຂົ້າຮ່ວມ ແລະ ປະກອບສ່ວນຢ່າງແຂງແຮງໃນການຍູ້ແຮງການຜະລິດ ແລະ ບໍລິການຕາມທ່າແຮງບົ່ມຊ້ອນຂອງຊາດ, ຂອງທ້ອງຖິ່ນ, ສົ່ງເສີມການນໍາໃຊ້ຜະລິດຕະພັນລາວ “ລາວຜະລິດ ລາວໃຊ້”ແລະ ສົ່ງເສີມການສົ່ງອອກໃຫ້ຫຼາກຫຼາຍ, ຈໍາກັດການນໍາເຂົ້າສິນຄ້າຟຸ່ມເຟືອຍ ແລະ ສິນຄ້າທີ່ສາມາດຜະລິດ ແລະ ຕອບສະໜອງຄວາມຕ້ອງ ການພາຍໃນໄດ້; ປັບປຸງການຄຸ້ມຄອງງົບປະມານຂອງລັດໃຫ້ມີປະສິດທິພາບສູງຂຶ້ນ ດ້ວຍເຄື່ອງມືທັນສະໄໝ, ປັບປຸງ, ສ້າງ ແລະ ປະຕິບັດກົດໝາຍ ແລະ ລະບຽບການຢ່າງເຂັ້ມງວດ, ຫຼຸດຜ່ອນການຍົກເວັ້ນພາສີອາ ກອນທີ່ບໍ່ສອດຄ່ອງກັບກົດໝາຍ, ຂະຫຍາຍຖານລາຍຮັບໃໝ່ໃຫ້ກວ້າງຂວາງເຊັ່ນ: ອາກອນຊັບສິນຢູ່ເຂດຕົວເມືອງໃຫຍ່, ອາກອນສິ່ງແວດລ້ອມ ແລະ ອື່ນໆ. ຮັບປະກັນການຈັດສັນລາຍຈ່າຍເຂົ້າໃນວຽກງານບຸລິມະສິດສໍາຄັນ ໂດຍສະເພາະວຽກງານສຶກສາ ແລະ ສາທາລະນະສຸກ, ເພີ່ມທະວີການປະຕິບັດນະໂຍບາຍປະຍັດມັດທະຍັດ ແລະ ຕ້ານການຟຸ່ມເຟືອຍໃຫ້ມີປະສິດທິຜົນສູງ, ຄຸ້ມຄ້ອງໜີ້ສິນສາທາລະນະຕາມຍຸດທະສາດການຄຸ້ມຄອງໜີ້ສິນສາທາລະນະຢ່າງເປັນລະບົບ ແລະ ມີປະສິດທິຜົນສູງ; ເພີ່ມຄວາມຮັບຜິດຊອບ ແລະ ສິດອຳ ນາດໃຫ້ທ້ອງຖິ່ນຫຼາຍຂຶ້ນ ໃນວຽກງານການເງິນ ແລະ ການລົງທຶນ ເພື່ອສ້າງແຮງຈູງໃຈໃນການພັດທະນາເສດຖະກິດ-ສັງຄົມຂອງທ້ອງຖິ່ນຕົນໃຫ້ດີຂຶ້ນ ແລະ ເປັນເຈົ້າການຫຼາຍຂຶ້ນ; ດໍາເນີນນະໂຍບາຍເງິນຕາ ແລະ ນະໂຍບາຍອັດຕາແລກປ່ຽນຢ່າງມີປະສິດທິພາບ, ຫຼຸດຜ່ອນການນໍາໃຊ້ເງິນຕາຕ່າງປະເທດ, ກຳນົດນະໂຍບາຍ ແລະ ເຄື່ອງມືເພື່ອຈູງໃຈ ແລະ ສົ່ງເສີມໃຫ້ຜູ້ສົ່ງອອກໃຫ້ນໍາເງິນຕາມາຜ່ານລະບົບທະນາຄານ; ສ້າງສະພາບແວດລ້ອມທີ່ເອື້ອອໍານວຍ ເພື່ອດຶງດູດການລົງທຶນພາກເອກະຊົນພາຍໃນ ແລະ ການລົງທຶນໂດຍກົງຈາກຕ່າງ ປະເທດດ້ວຍການປັບປຸງກົນໄກໃຫ້ທັນສະໄໝ, ວ່ອງໄວ ແລະ ໂປ່ງໃສ, ປະຕິຮູບນະໂຍບາຍສົ່ງເສີມການລົງທຶນ, ດຶງດູດການລົງທຶນທີ່ຫຼາກຫຼາຍ ແລະ ມີຄຸນນະພາບ, ເຮັດແທ້ທຳຈິງ, ຖ່າຍທອດເຕັກນິກ ແລະ ເຕັກໂນໂລຊີ, ສ້າງກົນໄກໃໝ່ການເຂົ້າເຖິງການເງິນສີຂຽວ, ສ້າງເງື່ອນໄຂສະດວກການເຂົ້າເຖິງແຫຼ່ງທຶນຂອງຈຸນລະວິສາຫະກິດ ແລະ ວິສາຫະກິດຂະໜາດນ້ອຍ ແລະ ກາງ; ເພີ່ມທະວີການຫັນເປັນອຸດສາຫະກຳ ແລະ ທັນສະໄໝ, ຫັນເປັນດີຈີຕອນ, ນໍາໃຊ້ ແລະ ພັດທະນາວິທະຍາສາດ, ເຕັກໂນໂລຊີ ແລະ ນະວັດຕະກຳ ຫຼື ການປະດິດສ້າງໃໝ່ ເພື່ອຍົກສູງປະສິດທິພາບ ແລະ ປະສິດທິຜົນຂອງການຜະລິດ ແລະ ບໍລິການ, ການເອື້ອອໍານວຍຄວາມສະດວກດ້ານການລົງທຶນ, ການຄ້າ ແລະ ການທ່ອງທ່ຽວ.

ສໍາລັບກົນໄກຈັດຕັ້ງປະຕິບັດຄື: ລັດຖະບານໄດ້ອອກດໍາລັດໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ X (2026-2030) ໃຫ້ບັນດາຂະແໜງການຂັ້ນສູນກາງ ແລະ ທ້ອງຖິ່ນໃນການຈັດຕັ້ງຜັນຂະຫຍາຍໃຫ້ເປັນອັນລະອຽດ, ມີປະສິດທິພາບ ແລະ ປະສິດທິຜົນສູງສຸດ; ບັນດາລັດຖະມົນຕີ, ປະທານຄະນະກຳມະການປົກຄອງນະຄອນຫຼວງວຽງຈັນ, ບັນດາແຂວງ ຕ້ອງຍົກສູງຄວາມຮັບຜິດຊອບໃຫ້ຫຼາຍຂຶ້ນ ໂດຍຫັນບັນດາຄາດໝາຍ, ແຜນວຽກຈຸດສຸມໃຫ້ເປັນອັນລະອຽດຕາມພາລະບົດບາດຂອງຕົນ ແລະ ກຳນົດແຜນເງິນ ແລະ ແຜນຄົນໃນແຕ່ລະວຽກງານໃຫ້ຊັດເຈນ ແລະ ຈັດຕັ້ງປະຕິບັດໃຫ້ມີປະສິດທິຜົນສູງ; ເພີ່ມທະວີການປະສານງານຢ່າງເປັນເຈົ້າການ ລະຫວ່າງພາກລັດດ້ວຍກັນ (ສາຍຕັ້ງ ແລະ ສາຍຂວາງ), ພາກລັດກັບເອກະຊົນ ແລະ ຄູ່ຮ່ວມພັດທະນາໃນການຈັດຕັ້ງປະຕິບັດ ແລະ ການຊຸກຍູ້ຕິດ ຕາມແຜນພັດທະນາເສດຖະກິດ-ສັງຄົມຢ່າງເປັນລະບົບ; ເສີມຂະຫຍາຍພາລະບົດບາດຂອງທຸກອົງການຈັດຕັ້ງຂອງລັດ, ແນວລາວສ້າງຊາດ, ສະຫະພັນນັກຮົບເກົ່າ, ບັນດາອົງການຈັດຕັ້ງມະຫາຊົນ, ບັນດາອົງການຈັດຕັ້ງທາງສັງຄົມ, ພາກເອກະຊົນ, ທຸລະກິດທັງພາຍໃນ ແລະ ຕ່າງປະເທດ ແລະ ປະຊາຊົນບັນດາເຜົ່າເຂົ້າຮ່ວມໃນການຈັດຕັ້ງຜັນຂະຫຍາຍແຜນພັດທະນາເສດຖະກິດ-ສັງຄົມແຫ່ງຊາດຢ່າງເປັນເອກະພາບ ແລະ ມີຜົນສໍາເລັດ; ກະຊວງການເງິນຮ່ວມກັບທຸກຂະແໜງການ ແລະ ທ້ອງຖິ່ນ ຊຸກຍູ້, ຕິດຕາມ ແລະ ປະເມີນຜົນການ ຈັດຕັ້ງປະຕິບັດໃນແຕ່ລະໄລຍະຕາມຂອບແຜນການ 5 ປີ ແລະ ລາຍງານສະພາບການຈັດຕັ້ງປະຕິບັດແຜນພັດທະນາໃນແຕ່ລະໄລຍະ ໂດຍການນໍາໃຊ້ເຄື່ອງມືໃນການຄຸ້ມຄອງລະບົບຕິດຕາມ ແລະ ປະເມີນຜົນຢ່າງມີປະສິດທິພາບ ແລະ ປະສິດທິຜົນ.