 |
ພິທີດັ່ງກ່າວໄດ້ຜ່ານບົດສະຫຼຸບການເຄື່ອນໄຫວຝຶກອົບຮົມໂດຍຫົວໜ້າສະຖາບັນຄົ້ນຄວ້າ ແລະ ຝຶກອົບຮົມ ຊຶ່ງໄດ້ຍົກໃຫ້ເຫັນເຖິງຄວາມສຳຄັນຂອງການຈັດຝຶກອົບຮົມໃນຄັ້ງນີ້ ແມ່ນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ V ຂອງອົງຄະນະພັກສານປະຊາຊົນສູງສຸດ, ມະຕິກອງປະຊຸມໃຫຍ່ຜູ້ພິພາກສາ ຄັ້ງທີ XII ແລະ ແຜນຍຸດທະສາດແຫ່ງການພັດທະນາຊັບພະຍາກອນມະນຸດ ຂອງສານປະຊາຊົນສູງສຸດ ໂດຍສະເພາະແມ່ນແຜນງານທີ 2 ໂຄງການທີ 3 ວ່າດ້ວຍການຈັດຝຶກອົບຮົມຂັ້ນພື້ນຖານເພື່ອສ້າງ ແລະ ພັດທະນາທັກສະໃນການປະຕິບັດໜ້າທີ່ວິຊາສະເພາະ ຂອງພະນັກງານສານປະຊາຊົນ ຊຶ່ງຫຼັກສູດໃນຊຸດນີ້ຈະໃຊ້ເວລາທັງໝົດ 20 ວັນ ໂດຍເນັ້ນໃສ່ການສຶກສາຄົ້ນຄວ້າທັງພາກທິດສະດີ ແລະ ພາກປະຕິບັດຕົວຈິງ ເປັນຕົ້ນແມ່ນການກວດກາຄໍາຮ້ອງຟ້ອງ, ຄໍາແກ້ຟ້ອງ, ການປະກອບສໍານວນຄະດີ, ການກະກຽມ ແລະ ບັນທຶກໃນທີ່ປະຊຸມສານ.
 |
ທ່ານ ໄພວີ ສີບົວລິພາ ໄດ້ມີຄຳເຫັນໂອ້ລົມ ຊຶ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມຊົມຕໍ່ຄະນະຮັບຜິດຊອບຝຶກອົບຮົມ ແລະ ຄູ-ອາຈານ ໄດ້ສຸມໃສ່ເຮັດສຳເລັດຕາມກຳນົດ ແລະ ເນັ້ນໃຫ້ຜູ້ສຳເລັດຝຶກອົບຮົມຄັ້ງນີ້ ຈົ່ງພ້ອມກັນນໍາເອົາບົດຮຽນໄປຈັດຕັ້ງປະຕິບັດເຂົ້າໃນໜ້າທີ່ວຽກງານຕົວຈິງ ເພື່ອສ້າງຄວາມເຊື່ອໝັ້ນ ແລະ ໄວ້ເນື້ອເຊື່ອໃຈຈາກປະຊາຊົນຕໍ່ລະບົບຕຸລາການຢ່າງແທ້ຈິງ.
(ຂ່າວ: ສປສສ)
ຄໍາເຫັນ