ໂຄງການທີ 1 ເຊັນມອບໂດຍ ທ່ານ ສົມລາສີ ຈະເລີນນີດ ຜູ້ອໍານວຍການ ບໍລິສັດ ຈະເລີນນີດກໍ່ສ້າງ ຈໍາກັດຜູ້ດຽວ ໃນນາມຜູ້ຮັບເໝົາກໍ່ສ້າງ ໂຄງການຟື້ນຟູ - ສ້ອມແປງຊົນລະປະທານຫ້ວຍເດືີ່ອ ຮັບໂດຍ ທ່ານ ຄຳພະຈັນ ວົງຊະນະ ຫົວໜ້າກົມຊົນລະປະທານ ທ່ານ ແສງອາລຸນ ສຸລິຍະວົງ ຫົວໜ້າພະແນກກະສິກຳ ແລະ ສິ່ງແວດລ້ອມ ນະຄອນຫຼວງວຽງຈັນ ໂຄງການທີ 2 ມອບໂດຍ ທ່ານ ວິໄລສັກດ໌ ລາຊາຣັກ ຜູ້ອໍານວຍການບໍລິສັດ Southern Stone ສໍາຫຼວດອອກແບບ ແລະ ກໍ່ສ້າງຈໍາກັດ ໃນນາມຜູ້ຮັບເໝົາໂຄງການຟື້ນຟູ - ສ້ອມແປງຊົນລະປະທານຫ້ວຍໝາກຮຽວ ຮັບໂດຍ ທ່ານ ຄຳພະຈັນ ວົງຊະນະ ຫົວໜ້າກົມຊົນລະປະທານ ທ່ານ ແສງອາລຸນ ສຸລິຍະວົງ ຫົວໜ້າພະແນກກະສິກຳ ແລະ ສິ່ງແວດລ້ອມນະຄອນຫຼວງ ໂດຍການເຂົ້າຮ່ວມເປັນສັກຄີພິຍານຂອງ ທ່ານ ນາງ ຈັນທະຄອນ ບົວລະພັນ ຮອງລັດຖະມົນຕີ ກະຊວງກະສິກຳ ແລະ ສິ່ງແວດລ້ອມ ພ້ອມດ້ວຍປະທານອົງການປົກຄອງເມືອງ ຫາດຊາຍຟອງ, ຮອງຫົວໜ້າກົມ, ຮອງຫົວໜ້າພະແນກກະສິກຳ ແລະ ສິ່ງແວດລ້ອມ ນະຄອນຫຼວງວຽງຈັນ ແລະ ພາກສ່ວນທີ່ກ່ຽວເຂົ້າຮ່ວມເປັນສັກຄີພິຍານໃນຄັ້ງນີ້.
 |
ໂຄງການຟື້ນຟູ-ສ້ອມແປງຊົນລະປະທານຫ້ວຍໝາກຮຽວ ພາຍໃຕ້ໂຄງການພັດທະນາພື້ນຖານໂຄງລ່າງຊົນນະບົດ ແລະ ການຄຸ້ມຄອງອ່າງໂຕ່ງແບບຍືນຍົງ (ພຊຄ) ໄດ້ລົງນາມສັນຍາໃນວັນທີ 28 ສິງຫາ 2025 ດ້ວຍມູນຄ່າ 1 ລ້ານກວ່າໂດລາ ມີໄລຍະກໍ່ສ້າງ 5 ເດືອນ ຂອບເຂດວຽກງານສຳຄັນປະກອບມີ: ອະນາໄມສິ່ງກີດຂວາງ ແລະ ສ້າງຄັນປ້ອງກັນນ້ຳ ກໍ່ສ້າງເຮືອນຈັກສູບນ້ຳ ແລະ ຕິດຕັ້ງຈັກສູບນ້ຳ 6 ໜ່ວຍ ຕິດຕັ້ງໝໍ້ແປງໄຟຟ້າ 500 KVA ສ້ອມແປງ-ປ່ຽນແທນປະຕູນ້ຳ 8 ຊຸດ ກໍ່ສ້າງພື້ນປ້ອງກັນການກັດເຊາະວາງທໍ່ ແລະ ກໍ່ສ້າງຮົ້ວ-ກຳແພງ ສຳລັບໂຄງການຟື້ນຟູ-ສ້ອມແປງຊົນລະປະທານຫ້ວຍເດື່ອ ມີມູນຄ່າ 938,043.38 ໂດລາ ປະກອບມີ: ອະນາໄມ-ຂຸດລອກ ກໍ່ສ້າງເຮືອນຈັກສູບນ້ຳ ຕິດຕັ້ງຈັກສູບນ້ຳ ແລະ ລະບົບໄຟຟ້າ ປ້ອງກັນເຈື່ອນ ແລະ ສ້ອມແປງປະຕູນ້ຳດ້ານເທິງ-ດ້ານລຸ່ມ ວຽກງານທັງໝົດສຳເລັດ 100% ແລະ ຜ່ານການກວດກາເຕັກນິກ ພ້ອມທົດລອງນຳໃຊ້.
ພາຍຫຼັງສຳເລັດ ໂຄງການດັ່ງກ່າວຄາດໝາຍວ່າຈະຊ່ວຍຟື້ນຟູລະບົບຊົນລະປະທານໃຫ້ມີຄວາມໝັ້ນຄົງ ເພີ່ມປະສິດທິພາບໃນການສູບ ແລະ ຄວບຄຸມນ້ຳ ຫຼຸດຜ່ອນບັນຫາການກັດເຊາະ ແລະ ສ້າງເງື່ອນໄຂໃຫ້ປະຊາຊົນສາມາດນຳໃຊ້ນ້ຳເພື່ອການຜະລິດກະສິກຳໄດ້ຢ່າງມີປະສິດທິຜົນ ພາຍຫຼັງການກໍ່ສ້າງສຳເລັດ ຈະມອບໃຫ້ໜ່ວຍງານທີ່ກ່ຽວຂ້ອງຮັບຜິດຊອບດູແລ, ບຳລຸງຮັກສາ ແລະ ນຳໃຊ້ໃຫ້ເກີດປະໂຫຍດສູງສຸດ ແລະ ຍືນຍົງໃນໄລຍະຍາວ.
(ຂ່າວ: ເພັດສະໝອນ)
ຄໍາເຫັນ