ມອບ-ຮັບໂຄງການກໍ່ສ້າງໂຮງຮຽນມັດທະຍົມຕອນຕົ້ນ ເມືອງນາແລ ແຂວງຫຼວງນໍ້າທາ

ໃນວັນທີ 23 ຕຸລາຜ່ານມາ, ທີ່ໂຮງຮຽນມັດທະຍົມຕອນຕົ້ນພູລາ ເມືອງນາແລ ແຂວງຫຼວງນໍ້າທາ ໄດ້ຈັດພິທີມອບ-ຮັບໂຄງການກໍ່ສ້າງໂຮງຮຽນມັດທະຍົມຕອນຕົ້ນພູລາ ໂດຍການເຂົ້າຮ່ວມຂອງທ່ານນາງ ນາລີ ສີສຸລິດ ພັນລະຍາຂອງທ່ານ ທອງລຸນ ສີສຸລິດ ປະທານປະເທດແຫ່ງ ສປປລາວ ພ້ອມດ້ວຍຄອບຄົວການນໍາຂັ້ນສູງ, ມີທ່ານ ຈັນທອງ ແກ້ວປະເສີດ ຮອງເລຂາພັກແຂວງ, ທ່ານ ບຸນຈັນ ສຸດທິປັນຍາ ເຈົ້າເມືອງໆນາແລ, ມີຄອບຄົວການນໍາຂັ້ນແຂວງ, ຂັ້ນເມືອງ, ຂະແໜງການທີ່ກ່ຽວຂ້ອງເຂົ້າຮ່ວມ.
    ໂຮງຮຽນມໍຕົ້ນພູລາ ເປັນອາຄານຊັ້ນດຽວຖາວອນ, ມີ 1 ຫຼັງ, 4 ຫ້ອງຮຽນຂະໜາດ 9 x 32 ແມັດ ປະກອບມີເຟີນີເຈີ້ຄົບຊຸດ, ຫ້ອງນໍ້າ 1 ຫຼັງ, ມີ 2 ຫ້ອງມູນຄ່າການກໍ່ສ້າງ 1.032.114.000 ກີບ ເປັນທຶນຊ່ວຍເຫຼືອຈາກຄອບຄົວການນໍາສູນກາງ, ການກໍ່ສ້າງໄດ້ເລີ່ມແຕ່ວັນທີ 25 ເມສາ ຫາວັນທີ 31 ສິງຫາ 2023 ສໍາເລັດ 100%.
    ໂອກາດນີ້, ທ່ານນາງ ນາລີ ສີສຸລິດ ໄດ້ມີຄໍາເຫັນໂອ້ລົມ ເນັ້ນໃຫ້ຄູ-ອາຈານເອົາໃຈໃສ່ການຮຽນ- ການສອນໃຫ້ມີຄຸນນະພາບ, ຮຽນເກັ່ງຕາມຊັ້ນຂັ້ນຮຽນ ລວມທັງປົກປັກຮັກສາໂຮງຮຽນນໍາໃຊ້ໃຫ້ໄດ້ຍາວນານ. ຈາກນັ້ນໄດ້ມອບ-ຮັບໂຮງຮຽນຢ່າງເປັນທາງການ.
    ທ່ານ ຈັນທອງ ແກ້ວປະເສີດ ຮອງເລຂາພັກແຂວງ ໄດ້ສະແດງຄວາມຂອບໃຈ ແລະ ຮູ້ບຸນຄຸນມາຍັງທ່ານນາງ ນາລີ ສີສຸລິດ ພ້ອມດ້ວຍຄອບຄົວການນໍາຂັ້ນສູນກາງ ທີ່ເປັນຫ່ວງເປັນໄຍໃຫ້ການຊ່ວຍເຫຼືອກໍ່ສ້າງໂຮງຮຽນໃນຄັ້ງນີ້ ຂໍຢືນຢັນວ່າຈະປົກປັກຮັກສາໂຮງຮຽນຫຼັງດັ່ງກ່າວໃຫ້ນໍາໃຊ້ໄດ້ຢ່າງຍາວນານ. ຫັວງຢ່າງຍິ່ງວ່າໂອກາດໜ້າຈະໄດ້ຮັບການຊ່ວຍເຫຼືອຕື່ມອີກ. ພ້ອມນີ້ຄອບຄົວການນໍາຂັ້ນສູນກາງຍັງໄດ້ມອບເງິນຈຳນວນ 80.000.000 ກີບ ແລະ ອຸປະກອນການຮຽນ-ການສອນ, ເຄື່ອງຫຼິ້ນກິລາໃຫ້ໂຮງຮຽນມໍຕົ້ນພູລາ, ທ່ານຮອງເລຂາພັກແຂວງຍັງໄດ້ມອບໃບຍ້ອງຍໍຂອງທ່ານເຈົ້າແຂວງໃຫ້ຄອບຄົວການນໍາ, ຈາກນັ້ນທ່ານນາງ ນາລີ ສີສຸລິດ ໄດ້ໃຫ້ກຽດລັ່ນຄອງ 9 ບາດ ເພື່ອເປີດນໍາໃຊ້ໂຮງຮຽນມັດທະຍົມຕອນຕົ້ນພູລາຢ່າງເປັນທາງການ.   ຂ່າວ:  ສົມພອນ ຂຸນດາວົງ