 |
ໃນພິທີ, ທ່ານ ນາງ ທອງຂັນ ສີຫາລາດ ຮອງຫົວໜ້າອົງການກາແດງແຂວງວຽງຈັນ ໄດ້ຂຶ້ນຜ່ານຂໍ້ຕົກລົງ ຂອງທ່ານເຈົ້າເມືອງຊະນະຄາມ ວ່າດ້ວຍການແຕ່ງຕັ້ງ ອາສາສະໝັກຂັ້ນບ້ານ ແລະ ຄະນະກຳ ມະການຄຸ້ມຄອງລະບົບນໍ້າ ເພື່ອຈັດຕັ້ງປະຕິບັດໂຄງການຫຼຸດຜ່ອນຄວາມສ່ຽງໄພພິບັດເຊື່ອມສານກັບວຽກງານສົ່ງເສີມສຸຂະພາບຊຸມຊົນ ແລະ ສະໜອງນໍ້າສະອາດ.
ຫຼັງຈາກນັ້ນ, ທ່ານ ບົວພັນ ແກ້ວມີໄຊ ຫົວໜ້າຂະແໜງສົ່ງເສີມສຸຂະພາບ ຂອງອົງການກາແດງແຂວງວຽງຈັນ ໄດ້ຂຶ້ນຜ່ານບົດລາຍງານການເຈາະນໍ້າບາດານໃຫ້ແກ່ໂຮງຮຽນ ແລະ ບ້ານດັ່ງກ່າວ ຊຶ່ງໄດ້ຍົກໃຫ້ເຫັນຈຸດປະສົງຂອງໂຄງການຫຼຸດຜ່ອນຄວາມສ່ຽງໄພພິບັດເຊື່ອມສານວຽກງານສົ່ງເສີມສຸຂະພາບ ຊຸມຊົນຂອງອົງການກາແດງແຂວງວຽງຈັນ, ຈຸດປະສົງແມ່ນເພື່ອຂະຫຍາຍຕາໜ່າງ ອາສາສະໝັກກາແດງ, ໜ່ວຍຄຸ້ມຄອງໄພພິບັດຂັ້ນບ້ານ, ນັກປະຖົມພະຍາບານລົງສູ່ບັນດາບ້ານທີ່ມີຄວາມສ່ຽງສູງຕໍ່ກັບໄພພິບັດ, ຮັບປະກັນໃຫ້ແກ່ປະຊາຊົນຜູ້ທີ່ປະສົບເຄາະຮ້າຍໃຫ້ໄດ້ຮັບການຊ່ວຍເຫຼືອໃນພາວະສຸກເສີນ, ເພື່ອສ້າງ ຄວາມເຂັ້ມແຂງໃຫ້ແກ່ຊຸມຊົນ ກຸ່ມເປົ້າໝາຍທີ່ໄດ້ຮັບຜົນກະທົບ ແລະ ມີຄວາມສ່ຽງຕໍ່ກັບໄພພິບັດ, ເພື່ອຫຼຸດຜ່ອນຜົນເສຍຫາຍທີ່ສົ່ງຜົນກະທົບທາງດ້ານຊີວິດໃຫ້ນັບມື້ຫຼຸດລົງ ປະຊາຊົນກຸ່ມເປົ້າໝາຍໄດ້ຮັບການພັດທະນາ ແລະ ຟື້ນຟູຊີວິດການເປັນຢູ່ໃຫ້ນັບມື້ດີຂຶ້ນ ແລະ ພ້ອມທັງຍົກໃຫ້ເຫັນກິດຈະກຳທີ່ໄດ້ຈັດຕັ້ງປະຕິບັດ, ເປັນຕົ້ນແມ່ນການກະກຽມ, ກິດຈະກຳຂອງໂຄງການ, ກິດຈະກຳທີ່ໄດ້ຮັບຈັດຕັ້ງປະຕິບັດສຳເລັດ, ກິດຈະກຳທີ່ຈະໄດ້ສືບຕໍ່ຈັດຕັ້ງປະຕິບັດ, ຂັ້ນຕອນຂອງການຈັດຕັ້ງປະຕິບັດ, ວັນເວລາ ແລະ ສະຖານທີ່ ແລະ ຕີລາຄາຜົນໄດ້ຮັບ ຊຶ່ງ ລວມມູນຄ່າທັງໝົດ 221,035,780 ກີບ.
ທ່ານ ບຸນເນົາ ພະຈອມພົນ ຊຶ່ງທ່ານກໍໄດ້ຮຽກຮ້ອງມາຍັງ ຄະນະອໍານວຍການໂຮງຮຽນຈໍານວນ 2 ໂຮງຮຽນ, ອໍານາດການປົກຄອງບ້ານ, ພ້ອມດ້ວຍນັກຮຽນ ຈົ່ງພ້ອມກັນຊົມໃຊ້ ແລະ ພ້ອມກັນປົກປັກຮັກສານໍ້າດັ່ງກ່າວໃຫ້ຍາວນານ.
 |
ພ້ອມດຽວກັນນັ້ນ, ທ່ານ ບຸນເນົາ ພະຈອມພົນ ກໍໄດ້ເປັນກຽດກ່າວມອບຖົງຢາຈໍານວນ 3 ຖົງ ໃຫ້ໂຮງຮຽນລະຖົງ ແລະ ກ່າວຮັບໂດຍແມ່ນທ່ານ ແສງຈັນ ແລະ ທ່ານກໍໄດ້ກ່າວມອບຕໍ່ໃຫ້ທ່ານ ວິລັດຕາງໜ້າຫ້ອງການສຶກສາທິການ ແລະ ກິລາເມືອງຊະນະຄາມ ແລະ ໃນໂອກາດດຽວກັນນີ້ທ່ານ ແສງຈັນ ໄດ້ມີຄໍາເຫັນຕໍ່ພິທີ ຊຶ່ງທ່ານກໍໄດ້ສະແດງຄວາມຂອບອົກຂອບໃຈມາຍັງໂຄງການຫຼຸດຜ່ອນຄວາມສ່ຽງໄພພິບັດ ເຊື່ອມສານວຽກງານສົ່ງເສີມສຸຂະພາບຊຸມຊົນຂອງອົງການກາແດງແຂວງວຽງຈັນ ທີ່ໄດ້ມີຄວາມເປັນຫ່ວງເປັນໃຍຕໍ່ ເມືອງຊະນະຄາມ ເວົ້າລວມ ເວົ້າສະເພາະ ກໍແມ່ນຈໍານວນ 2 ໂຮງຮຽນ ແລະ 1 ບ້ານ ທີ່ໄດ້ຮັບການຊົມໃຊ້ນໍ້າບາດານ ແລະ ຮຽກຮ້ອງມາຍັງຄະນະອໍານວຍການໂຮງຮຽນຈໍານວນ 2 ແຫ່ງ ແລະ ບ້ານດັ່ງກ່າວ ຈົ່ງສືບຕໍ່ປົກປັກຮັກສາ ແລະ ພ້ອມກັນສ້າງຕັ້ງກອງທຶນເພື່ອສ້ອມແປງນໍ້າດັ່ງກ່າວໃຫ້ນໍາໃຊ້ໄດ້ຕະຫຼອດໄປ.
ໃນຕອນທ້າຍຂອງພິທີໄດ້ຮັບຟັງການມີຄໍາເຫັນໂອ້ລົມຂອງ ທ່ານ ຄໍາລາວັນ ຈັນທະລາວັນ ປະ ທານອົງການກາແດງແຫ່ງຊາດລາວ ຊຶ່ງຍາມໃດທ່ານກໍສະແດງຄວາມເປັນຫ່ວງເປັນໃຍ ແລະ ເນັ້ນໃຫ້ເຫັນກ່ຽວກັບວຽກງານກາແດງ ພ້ອມດຽວກັນນັ້ນປະທານກອງປະຊຸມ ແລະ ຜູ້ເຂົ້າຮ່ວມພິທີຍັງໄດ້ພ້ອມກັນເຂົ້າຮ່ວມຕັດແຖບຜ້າໃນການມອບຮັບນໍ້າບາດານໃຫ້ໂຮງຮຽນ ແລະ ບ້ານດັ່ງກ່າວ.
(ຂ່າວ: ອົງການກາແດງແຫ່ງຊາດ)
ຄໍາເຫັນ