 |
ໃນພິທີ, ສະຫາຍ ວິສຸກ ພົມພິທັກ ຮອງຫົວໜ້າຄະນະຈັດຕັ້ງສູນກາງພັກ ໄດ້ຂຶ້ນຜ່ານມະຕິຄໍາສັ່ງຂອງກົມການເມືອງສູນກາງພັກ ຈຳນວນ 5 ສະບັບຄື: ມະຕິຄໍາສັ່ງຂອງກົມການເມືອງສູນກາງພັກ ສະບັບເລກທີ 10, ລົງວັນທີ 11/6/2025; ລັດຖະດໍາລັດຂອງປະທານປະເທດສະບັບເລກທີ 107 ລົງວັນທີ 3/6/2025 ວ່າດ້ວຍການອະນຸມັດພະນັກງານການນໍາຂັ້ນສູງອອກພັກການ-ຮັບອູດໜູນບໍານານ ໂດຍຕົກລົງໃຫ້ ສະຫາຍ ບຸນແຝງ ພູມມະໄລສິດ ເລຂາຄະນະບໍລິຫານງານພັກ ລັດຖະມົນຕີກະຊວງສາທາລະນະສຸກ (ຜູ້ເກົ່າ) ອອກພັກການ-ຮັບອູດໜູນບໍານານ; ຄໍາສັ່ງຍົກຍ້າຍສະບັບເລກທີ 05 ລົງວັນທີ 11/6/2025; ລັດຖະດໍາລັດຂອງປະທານປະເທດສະບັບເລກທີ 103 ລົງວັນທີ 13/6/2025 ວ່າດ້ວຍການຍົກຍ້າຍພະນັກງານການນໍາຂັ້ນສູງໄປຮັບໜ້າທີ່ໃໝ່ ໂດຍເຫັນດີຍົກຍ້າຍ ສະຫາຍ ນາງ ໃບຄໍາ ຂັດທິຍະ ເລຂາຄະນະບໍລິຫານງານພັກ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ (ຜູ້ເກົ່າ) ໄປຮັບໜ້າທີ່ໃໝ່ເປັນລັດຖະມົນຕີກະຊວງສາທາລະນະສຸກຜູ້ໃໝ່; ຜ່ານມະຕິຕົກລົງກົມການເມືອງສູນກາງພັກສະບັບເລກທີ 16 ລົງວັນທີ 11/6/2025 ວ່າດ້ວຍການແຕ່ງຕັ້ງເລຂາຄະນະບໍລິຫານງານພັກກະຊວງສາທາລະນະສຸກ. ຈາກນັ້ນ, ສະຫາຍ ບຸນແຝງ ພູມມະໄລສິດ ໄດ້ຂຶ້ນລາຍງານການເຄື່ອນໄຫວຊີ້ນໍາ-ນໍາພາວຽກງານຮອບດ້ານສາທາລະນະສຸກ ໃນໄລຍະ 5 ປີຜ່ານມາ.
ໂອກາດນີ້, ສະຫາຍ ພົນເອກ ຈັນສະໝອນ ຈັນຍາລາດ ໄດ້ໃຫ້ກຽດມີຄໍາເຫັນໂອ້ລົມບາງຕອນວ່າ: ໂດຍຕອບສະໜອງຕາມຄວາມຮຽກຮ້ອງຕ້ອງການຂອງໜ້າທີ່ວຽກງານ, ກົມການເມືອງ ແລະ ຄະນະເລຂາທິການສູນກາງພັກ ໄດ້ຕົກລົງຈັດວາງ-ສັບຊ້ອນ ພະນັກງານການນໍາຂັ້ນສູງບາງຕຳແໜ່ງຄືນໃໝ່ ເພື່ອຮອງຮັບໃຫ້ແກ່ການສືບຕໍ່ຜັນຂະຫຍາຍ ແລະ ຈັດຕັ້ງປະຕິບັດແນວທາງການເມືອງ ທີ່ວາງອອກໃນແຕ່ລະໄລຍະໃຫ້ມີຜົນສໍາເລັດ. ຜ່ານມາ, ກໍໄດ້ດໍາເນີນການສັບປ່ຽນໝູນວຽນໜ້າທີ່ວຽກງານຂອງພະນັກງານການນໍາໃນລະບົບການຈັດຕັ້ງຂອງພັກ, ລັດ ແລະ ອົງການຈັດຕັ້ງມະຫາຊົນ ຊຶ່ງເປັນວຽກງານປົກກະຕິ ແລະ ແມ່ນຫຼັກການອັນໜຶ່ງຂອງພັກເຮົາໃນວຽກງານພະນັກງານ ກໍຄືຫຼັກການ “ມີຂຶ້ນ-ມີລົງ, ມີເຂົ້າ-ມີອອກ”ເພື່ອປັບປຸງໃຫ້ດີຂຶ້ນ, ທັງເປັນການຍົກລະດັບພະນັກງານ ການນໍາໃຫ້ມີຄວາມຮູ້, ຄວາມສາມາດນໍາພາຮອບດ້ານ... ພາຍໃຕ້ການນໍາພາ-ຊີ້ນໍາ ຂອງສະຫາຍ ບຸນແຝງ ພູມມະໄລສິດ ໃນຕະຫຼອດໄລຍະເວລາ ທີ່ເປັນລັດຖະມົນຕີກະຊວງສາທາລະນະສຸກ ຊຶ່ງສະຫາຍເປັນຜູ້ນໍາໜ້າໃນການນໍາພາຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ໃນຂະແໜງສາທາລະນະສຸກ, ມະຕິກອງປະຊຸມໃຫຍ່ ຄັ້ງທີ IX ຂອງອົງຄະນະພັກກະຊວງ ສາທາລະນະສຸກ ເຮັດໃຫ້ຂະແໜງສາທາລະນະສຸກ ໄດ້ຮັບການປັບປຸງດີຂຶ້ນເປັນກ້າວໆ ແລະ ມີຜົນງານອັນພົ້ນເດັ່ນຫຼາຍດ້ານ, ຂໍໃຫ້ບັນດາສະຫາຍຈົ່ງສືບຕໍ່ຮັກສາ ແລະ ເສີມຂະຫຍາຍ ໃຫ້ກ້າວໄປຢ່າງບໍ່ຢຸດຢັ້ງ. ສໍາລັບ ສະຫາຍ ນາງ ໃບຄໍາ ຂັດຕິຍະ ມາເປັນລັດຖະມົນຕີກະຊວງສາທາລະນະສຸກ ຊຶ່ງສະຫາຍແມ່ນການນໍາຍຸດທະສາດຜູ້ໜຶ່ງຂອງພັກ-ລັດ ທີ່ມີຄວາມບຸກບືນສູ້ຊົນ ໂດຍຜ່ານຂະບວນຝຶກຝົນຫຼໍ່ຫຼອມ ແລະ ເຕີບໃຫຍ່ຈາກຂະບວນການວຽກງານຕົວຈິງ. ມີຄວາມເຊື່ອໝັ້ນວ່າ: ດ້ວຍຄວາມຮູ້ - ຄວາມສາມາດ ແລະ ບົດຮຽນປະສົບການ ທີ່ສະຫາຍມີນັ້ນ, ຈະເປັນພື້ນຖານສໍາຄັນໃນການນໍາພາປະຕິບັດວຽກງານສາທາລະນະສຸກ ແລະ ພ້ອມໝູ່ຄະນະຊຸກຍູ້ຂະບວນການວຽກງານດ້ານຕ່າງໆ ຂອງຂະແໜງສາທາລະນະສຸກ ໃຫ້ສືບຕໍ່ເສີມຂະຫຍາຍມູນເຊື້ອອັນດີງາມ ແລະ ບັນດາຜົນສໍາເລັດ, ເຮັດໃຫ້ຂະແໜງສາທາລະນະສຸກ ມີຄວາມໜັກແໜ້ນ-ເຂັ້ມແຂງ, ສາມາດປະຕິບັດວຽກງານການກັນພະຍາດສົ່ງເສີມສຸຂະພາບ ເປັນຕົ້ນຕໍ, ການປິ່ນປົວ ແລະ ຟື້ນຟູໜ້າທີ່ການ ໃຫ້ທົ່ວເຖິງມີຄຸນນະພາບ ແລະ ຍຸຕິທໍາ ກໍຄືການພັດທະນາຍົກລະດັບແພດໝໍ ໃຫ້ສົມຄູ່ກັບເງື່ອນໄຂສະພາບການພັດທະນາ ໃນປັດຈຸບັນ ແລະ ວຽກງານອື່ນໆ ໃຫ້ດີຂຶ້ນກວ່າເກົ່າ.
(ຂ່າວ-ພາບ: ວັນເພັງ)
ຄໍາເຫັນ