ມອບຄວາມຮັບຜິດຊອບສ້າງຫຼັກສູດປະລິຍາເອກ ສາຂາຄຸ້ມຄອງລັດ

ທ່ານ ພັອ ບຸນຮຽງ ສອນສົມບັດ ຮອງຫົວໜ້າອໍານວຍການວິທະຍາຄານຕໍາຫຼວດປະຊາຊົນໄດ້ລາຍງານໂດຍຫຍໍ້ກ່ຽວກັບຄວາມຈໍາເປັນໃນການສ້າງຫຼັກສູດປະລິຍາເອກ ສາຂາຄຸ້ມຄອງລັດກ່ຽວກັບຄວາມເປັນລະບຽບຮຽບຮ້ອຍ-ປອດໄພທາງສັງຄົມ ໃຫ້ຮູ້ວ່າ: ການພັດທະນາຊັບພະຍາກອນມະນຸດເປັນວຽກງານໜຶ່ງທີ່ມີຄວາມໝາຍສໍາຄັນ ແລະ ເປັນວຽກບຸລິມະສິດຂອງກະຊວງ ປກສ ໃນການກໍ່ສ້າງ, ຍົກລະດັບໃຫ້ນາຍ ແລະ ພົນຕຳຫຼວດ ຢ່າງເປັນລະບົບຄົບຊຸດຕໍ່ເນື່ອງ ມີຄວາມໜັກແໜ້ນທາງດ້ານການເມືອງ, ມີຄຸນສົມບັດ, ສິນທໍາປະຕິວັດ, ມີຈັນຍາບັນ-ຈັນຍາທໍາ, ມີຄວາມຮູ້-ຄວາມສາມາດທາງດ້ານວຽກງານວິຊາສະເພາະຂອງກໍາລັງ ປກສ ສົມຄູ່ກັບມາດຕະຖານຕໍາແໜ່ງງານທີ່ໄດ້ຮັບການມອບໝາຍ ພ້ອມທັງສອດຄ່ອງກັບທິດທາງແຜນການທີ່ໄດ້ລະບຸໄວ້ໃນມະຕິກອງປະຊຸມໃຫຍ່ຄັ້ງທີ V ຂອງອົງຄະນະພັກກະຊວງ ປກສ ຊຶ່ງໄດ້ເນັ້ນໜັກກ່ຽວກັບການປັບປຸງ, ກໍ່ສ້າງກຳລັງ ປກສ ໃຫ້ມີຄວາມເຕີບໃຫຍ່, ປອດໃສເຂັ້ມແຂງໜັກແໜ້ນ ແລະ ມີແບບແຜນທັນສະໄໝ.

ຜົນງານການກໍ່ສ້າງກໍາລັງ ປກສ (ຂະແໜງຕໍາຫຼວດ) ໃນໄລຍະຜ່ານມາ ໂດຍພື້ນຖານສາມາດຕອບສະໜອງໄດ້ຕາມຄວາມຮຽກຮ້ອງຕ້ອງການຂອງໜ້າທີ່ວຽກງານ ປກສ ທາງດ້ານການເມືອງ ແລະ ຄວາມເປັນລະບຽບຮຽບຮ້ອຍ-ປອດໄພທາງສັງຄົມ ຊຶ່ງໄດ້ກາຍເປັນປັດໄຈຄໍ້າປະກັນເງື່ອນໄຂເອື້ອອໍານວຍຄວາມສະດວກໃຫ້ການປະຕິບັດແຜນພັດທະນາເສດຖະກິດ-ສັງຄົມຂອງຊາດທີ່ນັບມື້ນັບຂະຫຍາຍຕົວ.

ຈາກສະພາບການຄືດັ່ງກ່າວນັ້ນ, ການກໍ່ສ້າງຫຼັກສູດປະລິນຍາເອກຂອງກໍາລັງ ປກສ ຈຶ່ງມີຄວາມຈຳເປັນ ຮຽກຮ້ອງຕ້ອງການອັນຮີບດ່ວນຕໍ່ກັບການສ້າງບຸກຄະລາກອນ, ວິຊາການ ແລະ ນັກຄົ້ນຄວ້າທີ່ມີຄວາມຮູ້, ມີວຸດທິ, ມີຄວາມສາມາດເພື່ອຕອບສະໜອງໜ້າທີ່ການເມືອງໃນການປົກປັກຮັກສາປະເທດຊາດ, ຕອບຕ້ານ ແລະ ແກ້ໄຂບັນຫາອາຊະຍາກຳທີ່ລະເມີດຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງສັງຄົມໄດ້ຢ່າງທັນເວລາ ແລະ ມີປະສິດທິຜົນ.

ຫຼັກສູດປະລິນຍາເອກນີ້ ຈຶ່ງເປັນຫຼັກສູດໜຶ່ງທີ່ມີຄວາມຈຳເປັນ ແລະ ຕ້ອງການ ເນື່ອງຈາກວ່າບັນດາສະຖາບັນການສຶກສາ ແລະ ຖັນແຖວນັກຄົ້ນຄວ້າໃນລະດັບນີ້ຍັງຂາດເຂີນທາງດ້ານປະລິມານ ແລະ ຄຸນນະພາບ.

ໃນໄລຍະຜ່ານມາ, ການກໍ່ສ້າງຖັນແຖວກຳລັງ ປກສ ສ່ວນຫຼາຍສໍາເລັດການສຶກສາລະດັບປະລິນຍາເອກ ມາຈາກປະເທດເພື່ອນມິດຍຸດທະສາດ (ຕົ້ນຕໍແມ່ນ ສສ ຫວຽດນາມ) ກວມອັດຕາສ່ວນ 90%. ສະນັ້ນ, ຖ້າຫຼັກສູດປະລິນຍາເອກໄດ້ຖືກສ້າງຂຶ້ນ ແລະ ຮັບຮອງຈະເປັນເງື່ອນໄຂໜຶ່ງເພື່ອແກ້ໄຂການຂາດເຂີນຄູ-ອາຈານສິດສອນຂັ້ນມະຫາວິທະຍາໄລ ແລະ ເໜືອມະຫາວິທະຍາໄລ ກໍຄືຖັນແຖວນັກຄົ້ນຄວ້າວິທະຍາສາດທີ່ພັດທະນາທິດສະດີວິຊາສະເພາະໃນກຳລັງ ປກສ ເຮັດໃຫ້ການພັດທະນາພື້ນຖານທິດສະດີ ແລະ ພຶດຕິກຳຢູ່ໃນວຽກງານດັ່ງກ່າວເລິກເຊິ່ງ, ແທດເໝາະຕົວຈິງກັບສະພາວະການສູ້ຮົບແຕ່ລະໄລຍະຂອງປະເທດເຮົາ. ເພື່ອຮອງຮັບໃຫ້ການສ້າງຫຼັກສູດປະລິນຍາເອກຂອງກໍາລັງ ປກສ ພວກເຮົາຍັງຕ້ອງການຜູ້ທີ່ມີຕຳແໜ່ງວິຊາການຄູຂັ້ນຮອງສາດສະດາຈານ 3 ທ່ານຂຶ້ນໄປ, ສໍາລັບນັກວິທະຍາສາດທີ່ມີວຸດທິການສຶກສາລະດັບປະລິນຍາເອກປັດຈຸບັນພວກເຮົາມີພຽງພໍສາມາດຮັບຮອງໄດ້ 1 ຫຼັກສູດລະດັບປະລິນຍາເອກ, ແຕ່ຍັງຂາດນັກວິທະຍາສາດທີ່ມີວິທະຍາຖານະຂັ້ນສາດສະດາຈານ ແລະ ຮອງສາດສະດາຈານ. ນີ້ແມ່ນສິ່ງທ້າທາຍສໍາລັບສະຖາບັນການສຶກສາຂອງພວກເຮົາຈຶ່ງມີຄວາມຈໍາເປັນສະເໜີຂັ້ນເທິງສ້າງເງື່ອນໄຂຍົກລະດັບ ຫຼື ສະເໜີແຕ່ງຕັ້ງວິທະຍາຖານະຂັ້ນຮອງສາດສະດາຈານໃຫ້ນັກວິທະຍາສາດຢູ່ວິທະຍາຄານຕໍາຫຼວດປະຊາຊົນ ແລະ ບັນດາກົມກອງທ້ອງຖິ່ນຢ່າງໜ້ອຍໃຫ້ໄດ້ 3 ທ່ານຂຶ້ນໄປ.

ຈາກນັ້ນ, ທ່ານ ພັອ ຄອນສະຫວັນ ເຄນສຸວັນ ຮອງຫົວໜ້າກົມກໍ່ສ້າງກໍາລັງ ກົມໃຫຍ່ການເມືອງ ປກສ ໄດ້ຜ່ານຂໍ້ຕົກລົງຂອງກະຊວງ ປກສ ວ່າດ້ວຍການອະນຸມັດສ້າງຫຼັກສູດປະລິນຍາເອກ ປ້ອງກັນຄວາມສະຫງົບ (ສາຂາຄຸ້ມຄອງລັດກ່ຽວກັບຄວາມເປັນລະບຽບຮຽບຮ້ອຍ-ປອດໄພທາງສັງຄົມ) ຢູ່ວິທະຍາຄານຕໍາຫຼວດປະຊາຊົນ ແລະ ຜ່ານຂໍ້ຕົກລົງວ່າດ້ວຍການແຕ່ງຕັ້ງຄະນະຮັບຜິດຊອບຊີ້ນໍາລວມ, ອະນຸກຳມະການຕ່າງໆໃນການສ້າງບົດວິພາກ, ແຜນການເຄື່ອນໄຫວຫຼັກສູດປະລິນຍາເອກປ້ອງກັນຄວາມສະຫງົບຂອງວິທະຄານຕຳຫຼວດປະຊາຊົນ.(ຂ່າວ: ຄໍາໂຖ)