 |
ທ່ານ ນາງ ວານີລາ ອິນເທບພາວົງ ຫົວໜ້າຫ້ອງການບໍລິການ ມວສ ໄດ້ຂຶ້ນຜ່ານສະຫຼຸບຜົນງານສົກສຶກສາ 2024-2025 ແລະ ຜ່ານແຜນການສົກສຶກສາ 2025-2026 ວ່າ: ມວສ ມີພາລະບົດບາດໃນການສ້າງບຸກຄະລາກອນສາທາລະນະສຸກ, ການຄົ້ນຄວ້າວິທະຍາສາດສາທາລະນະສຸກລະດັບອະນຸປະລິນຍາຕີ ຮອດລະດັບຊ່ຽວຊານຂັ້ນ 2 ແລະ ການບໍລິການດ້ານວິຊາ, ມວສ ປະກອບດ້ວຍ 2 ຫ້ອງການ, 6 ຄະນະວິຊາ ແລະ 1 ສະຖາບັນ ຊຶ່ງພາຍໃຕ້ການຊີ້ນໍາ-ນໍາພາ ຂອງຄະນະພັກ, ຄະນະນຳ ມວສ ໄດ້ພ້ອມກັນຜ່ານຜ່າເຮັດໜ້າທີ່ການເມືອງ ແລະ ໜ້າທີ່ວິຊາສະເພາະຕາມພາລະບົດບາດໜ້າທີ່ໆໄດ້ຮັບສຳເລັດຕາມເປົ້າໝາຍ ຊຶ່ງສະແດງອອກຄື: ດ້ານການຮຽນ-ການສອນ, ມວສ ໄດ້ຈັດຕັ້ງ ການຮຽນ-ການສອນສົກສຶກສາ 2024-2025 ທັງໝົດ 40 ຫຼັກສູດ ໃນລະດັບອະນຸປະລິນຍາ, ປະລິນຍາຕີ, ລົງເລີກຂະແໜງ, ປະລິນຍາໂທ, ຊ່ຽວຊານຂັ້ນ 1 ແລະ 2, ມີນັກສຶກສາທັງໝົດຈໍານວນ 3,480 ຄົນ ຍິງ 2,219 ຄົນ, (ລະດັບອະນຸປະລິນຍາ 296 ຄົນ ຍິງ 223 ຄົນ, ລະດັບປະລິນຍາຕີ 2,875 ຄົນ ຍິງ 1,874 ຄົນ, ຫຼັງປະລິນຍາຕີ 246 ຄົນ ຍິງ 122 ຄົນ). ໃນສົກສຶກສາ 2024-2025 ທີ່ຜ່ານມານີ້ ມີນັກສຶກສາທີ່ສໍາເລັດການສຶກສາທັງໝົດ 670 ຄົນ ຍິງ 473 ຄົນ (ລະດັບອະນຸປະລິນຍາຕີ 76 ຄົນ ຍິງ 66 ຄົນ, ລະດັບປະລິນຍາຕີ 458 ຄົນ ຍິງ 312 ຄົນ, ປະລິນຍາໂທ 20 ຄົນ ຍິງ 14 ຄົນ, ຊ່ຽວຊານ 119 ຄົນ ຍິງ 81 ຄົນ); ດ້ານການຄົ້ນຄວ້າວິທະຍາສາດ ວາລະສານການແພດ (LMJ) ຕີພິມໃນປີ 2025 ຈໍານວນ 26 ບົດ, ຈໍານວນປຶ້ມ 600 ຫົວ, ໄດ້ອະນຸມັດການຂໍຈັນຍາທໍາບົດໂຄງການຄົ້ນຄວ້າ ຈຳນວນ 188 ຫົວບົດ ແລະ ບົດວິທະຍານິພົນ, ບົດຈົບຊັ້ນແພດຊ່ຽວຊານ ແລະ ບົດຈົບຊັ້ນຂອງນັກສຶກສາ ຈຳນວນ 143 ຫົວບົດ; ດ້ານການບໍລິການວິຊາການ ໄດ້ເປີດການນໍາໃຊ້ຫ້ອງຝຶກປະຕິບັດຂອງນັກສຶກສາຫຼັກສູດປະລິນຍາຕີກາຍະບຳບັດ ແລະ ເປັນສະຖານທີ່ໃຫ້ບໍລິການປະຊາຊົນ ມີຜູ້ມາຮັບບໍລິການ ຈຳນວນ 108 ເທື່ອຄົນ, ກວດກາຍະວິພາກພະຍາດໄດ້ 3,225 ຕົວຢ່າງ, ບໍລິການຢູ່ ຄລີນິກທັນຕະກຳໄດ້ 10,697 ເທື່ອຄົນ.
ໃນພິທີຍັງໄດ້ມອບໃບຍ້ອງຍໍຂັ້ນກະຊວງສາທາລະນະສຸກ ໃຫ້ແກ່ 6 ຄະນະວິຊາ, 2 ຫ້ອງການວິຊາການ, ສະຖາບັນ ແລະ ພະນັກງານພາຍໃນ ມວສ ດັ່ງນີ້: ປະເພດ I ຂັ້ນກະຊວງ ຈຳນວນ 353 ຄົນ ຍິງ 208 ຄົນ, ປະເພດ I ຂັ້ນ ມວສ ຈຳນວນ 48 ຄົນ ຍິງ 30 ຄົນ ແລະ 9 ພາກສ່ວນແມ່ນໄດ້ຮັບການຍ້ອງຍໍລະດັບດີ 80% ຂຶ້ນໄປໃນການຈັດຕັ້ງປະຕິບັດຂໍ້ແຂ່ງຂັນຮັກຊາດ ແລະ ພັດທະນາປະຈຳປີ 2025 ຂັ້ນ ມວສ ຄຽງຄູ່ກັບການຈັດຕັ້ງການຮຽນການສອນ, ການຄົ້ນຄວ້າວິທະຍາສາດ ແລະ ໃຫ້ການບໍລິການວິຊາການແກ່ສັງຄົມ ມວສ ຍັງໄດ້ເຄື່ອນໄຫວກິດຈະກຳອື່ນໆເຊັ່ນ: ການອອກແຮງງານລວມ, ການເຄື່ອນໄຫວກິລາ-ສິນລະປະ, ລະດົມທຶນຊ່ວຍເຫຼືອສັງຄົມ, ປຸກລະດົມບໍລິຈາກເລືອດ ແລະ ການຈັດເວນຍາມປ້ອງກັນປະກົດການຫຍໍ້ທໍ້ຕ່າງໆ
ໃນຕອນທ້າຍພິທີຍັງໄດ້ຮັບຟັງການໂອ້ລົມຂອງ ທ່ານ ມາຍຟອງ ມາຍຊາຍ ອະທິການບໍດີ ຊຶ່ງທ່ານໄດ້ເນັ້ນໜັກໃຫ້ພະນັກງານຄູ-ອາຈານ ໃຫ້ມີຄວາມເອົາໃຈໃສ່ໃນໜ້າທີ່ວຽກງານການຮຽນການສອນໃຫ້ມີຄຸນນະພາບ ເພື່ອໃຫ້ການບໍລິການມີຄຸນນະພາບເຕັມໄປດ້ວຍຈັນຍາບັນຈັນຍາທຳ, ສືບຕໍ່ວຽກງານ ຄົ້ນຄວ້າວິທະຍາສາດ ແລະ ການບໍລິການສັງຄົມໃຫ້ດີຂຶ້ນເລື້ອຍໆ.
(ຂ່າວ-ພາບ: ບຸນຕອມ)
ຄໍາເຫັນ