ເມື່ອບໍ່ດົນມານີ້, ໂຮງຮຽນມັດທະຍົມສົມບຸນ (ມສ) ແກ່ນທ້າວ ເມືອງແກ່ນທ້າວ ແຂວງໄຊຍະບູລີ ໄດ້ຈັດງານປະກວດສິລະປະ-ວັນນະຄະດີ ຄັ້ງທີ IX ປະຈໍາສົກຮຽນ 2023-2024 ຂຶ້ນຢ່າງເບີກບານມ່ວນຊື່ນ ຢູ່ທີ່ເດີ່ນກິລາເມືອງ. ໂດຍການເປັນກຽດເຂົ້າຮ່ວມຂອງທ່ານ ຄໍາປຸ່ນ ນວນສະບັບ ຮອງເຈົ້າເມືອງແກ່ນທ້າວ, ມີການນໍາຂອງເມືອງ, ຄູ-ອຈານ, ພໍ່ແມ່ນັກຮຽນ ແລະ ມວນຊົນພາຍໃນເທດສະບານເມືອງເຂົ້າຮ່ວມຮັບຊົມຢ່າງຫຼວງຫຼາຍ.
ງານປະກວດສິລະປະ-ວັນນະຄະດີ ຄັ້ງນີ້, ມີການປະກວດບົດຟ້ອນຊັ້ນມໍຕົ້ນ 8 ບົດ ຜົນການປະກວດ ທີ 1 ໄດ້ແກ່ບົດຟ້ອນ ສືບສານຫັດຖະກໍາເຄື່ອງປັ່ນດິນເຜົາ ຫ້ອງ ມ3/1, ທີ 2 ບົດຟ້ອນ ບ້ານແມ່ເຮົາ ຫ້ອງມໍ 4/3 ແລະ 4/4, ທີ 3 ບົດຟ້ອນ ອອນຊອນບັ້ງໄຟຕະໄລສິນ ຫ້ອງ ມ4/1 ແລະ 4/2. ບົດຟ້ອນຊັ້ນມໍປາຍ ທີ 1 ໄດ້ແກ່ບົດຟ້ອນ ຕໍາເຂົ້າຊາວພວນ ຊັ້ນ ມ5, ທີ 2 ບົດຟ້ອນປະເພນີແຕ່ງດອງ ຊັ້ນ ມ7 ແລະ ທີ 3 ບົດຟ້ອນ ແຫ່ນາກ ຊັ້ນ ມ6.ສ່ວນການປະກວດເດີບແບບ ຣີໄຊ້ເຄີນ ມີ 11 ຊຸດ. ຜົນການປະກວດ ລາງວັນທີ 1 ໄດ້ແກ່ຕົວແທນຈາກ ຫ້ອງມ5/1 ຊຸດທ້າວສີທົນ ແລະ ນາງ ມະໂນລາ ທີ່ປະດິດຈາກກະສອບ, ເຈ້ຍແກັດ ແລະ ເຈ້ຍສີທັງໄດ້ຍັງໄດ້ຮັບລາງວັນຂວັນໃຈມະຫາຊົນ ຕື່ມອີກ, ທີ 2 ໄດ້ແກ່ຕົວແທນຈາກ ຫ້ອງ 5/3 ຊຸດເຈົ້າຍິງພາສຕິກ ທີ່ປະດິດຈາກ ຖົງຢາງ ແລະ ທີ 3 ໄດ້ແກ່ຕົວແທນຈາກຫ້ອງ 4/2 ຊຸດທິດານົກແກ້ວ ທີ່ປະດິດຈາກ ເຈ້ຍແກັດ, ຜ້າບັງແສງ ແລະ ເຈ້ຍສີ.
ຈຸດປະສົງຂອງການປະກວດຄັ້ງນີ້, ເພື່ອເປັນການປະຕິບັດການຮຽນ-ການສອນ ຕາມ 5 ຫຼັກມູນຂອງກະຊວງສຶກສາທິການ ແລະ ກິລາ ວາງອອກ ໂດຍສະເພາະແມ່ນສິລະປະສຶກສາ, ເພື່ອເປັນການສ້າງຂະບວນການສະເຫຼີມສະຫຼອງວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 69 ປີ ແລະ ທັງເປັນການສົ່ງເສີມນ້ອງນັກຮຽນໃຫ້ກ້າສະແດງອອກເທິງເວທີ, ນໍາເອົາສິລະປະ-ວັນນະຄະດີ ກໍຄືວັດທະນະທໍາອັນດີງາມຂອງຊາດ, ຂອງທ້ອງຖິ່ນມາເຜີຍແຜ່ ໃຫ້ອະນຸຊົນຄົນຮູ່ນຫຼັງສືບທອດຕໍ່ໆກັນໄປ.
(ຂ່າວ: ແກ່ນທ້າວ).
ຄໍາເຫັນ