 |
ໃນພິທີ, ຜູ້ເຂົ້າຮ່ວມໄດ້ຮັບຊົມການສະແດງສິລະປະ: ປະກອບມີບົດຟ້ອນ, ຮ້ອງເພັງຂອງນ້ອງນັກຮຽນ ແລະ ຄູອາວຸໂສບໍານານ ຢ່າງເບີກບານມ່ວນຊື່ນ. ຈາກນັ້ນ, ທ່ານ ບຸນທຽມ ບຸດສະບາເມືອງ ຮອງຫົວໜ້າຫ້ອງການສຶກສາທິການ ແລະ ກິລາເມືອງ ໄດ້ຜ່ານປະຫວັດຄວາມເປັນມາຂອງວັນຄູແຫ່ງຊາດ. ໃນພິທີ, ຍັງມີການປະກວດ ໜາກເບັງ ຂອງນ້ອງນັກຮຽນແຕ່ຊັ້ນ ມ1-ມ7 ແລະ ຕາງໜ້ານ້ອງນັກຮຽນໄດ້ອ່ານສານອອຍພອນ ເພື່ອສະແດງຄວາມກະຕັນຍູ, ຮູ້ບຸນຄຸນຕໍ່ຄູ-ອາຈານ.
 |
ຕອນທ້າຍ, ທ່ານ ສີຄານ ແກ່ນມະນີ ຍັງໄດ້ມີຄໍາເຫັນໂອ້ລົມວ່າ: ການສະເຫຼີມສະຫຼອງວັນຄູແຫ່ງຊາດ ແມ່ນເພື່ອໃຫ້ທຸກຄົນໄດ້ທົບທວນຄືນຄຸນງາມຄວາມດີຂອງຄູ-ອາຈານ ທີ່ມີຕໍ່ປະເທດຊາດ ກໍຄືມວນມະນຸດ, ທັງເປັນການສ້າງເງື່ອນໄຂໃຫ້ທຸກຄົນໃນສັງຄົມໄດ້ສະແດງຄວາມກະຕັນຍູ, ກະຕະເວທີ ຕໍ່ຄູທີ່ພວມສິດສອນ ແລະ ຄູອາວຸໂສບຳນານ ດ້ວຍຮູບການຕ່າງໆເຊັ່ນ: ໄປຢ້ຽມຢາມຖາມຂ່າວ, ປະກອບສ່ວນວັດຖຸປັດໃຈ, ປະກອບຄຳເຫັນ ເພື່ອພັດທະນາໂຮງຮຽນທີ່ຕົນເອງເຄີຍສຶກສາຮໍ່າຮຽນ ຕາມເງື່ອນໄຂຕົວຈິງແຕ່ລະບຸກຄົນ ແລະ ແຕ່ລະພາກສ່ວນ. ດັ່ງນັ້ນ, ພັກ ແລະ ລັດຖະບານແຫ່ງ ສປປ ລາວ ຈຶ່ງກໍານົດໃຫ້ມີ ວັນຄູແຫ່ງຊາດລາວ ໂດຍກໍານົດເອົາວັນເຂົ້າຮັບຣາດຖະການຂອງນາຍຄູຄຳ ຊຶ່ງແມ່ນຄູຜູ້ມີສັນຊາດລາວ ຄົນທຳອິດໃນປີ 1907 ແລະ ຈັດຕັ້ງສະຫຼີມສະຫຼອງນັບແຕ່ວັນທີ 7 ຕຸລາ 1994 ເປັນຕົ້ນມາ.
 |
(ຂ່າວ: ແກ່ນທ້າວ)
ຄໍາເຫັນ