ເມືອງອາດສະພັງທອງ ກຳນົດເອົາວັດປ່າມະຫາໂຊກເປັນບ່ອນເປີດປີທ່ອງທ່ຽວລາວ 2024

ດ້ວຍຄວາມງົດງາມຂອງສະຖານທີ່ ແລະ ຍັງມີສິ່ງອຳນວຍຄວາມສະດວກຫຼາຍຢ່າງຂອງວັດປ່າມະຫາໂຊກສັງວານພວງສະຫວັນໄຊຍາຣາມ ບ້ານໂຊກໄຊ ເມືອງອາດສະພັງທອງ ແຂວງສະຫວັນນະເຂດ ໂດຍການນຳພາສ້າງຂອງພະອາຈານ ໂງ່ນຄຳ ພວງສະຫວັນ ເຈົ້າອະທິການວັດ ເຮັດໃຫ້ວັດແຫ່ງນີ້ກາຍເປັນອີກໜຶ່ງສະຖານທີ່ທ່ອງທ່ຽວຂອງແຂວງ ກໍຄືເມືອງອາດສະພັງທອງ, ຊຶ່ງໃນປີ 2024 ທາງເມືອງໄດ້ກຳນົດເອົາວັດປ່າມະຫາໂຊກສັງວານພວງສະຫວັນເປັນສະຖານທີ່ຈັດງານເປີດປີທ່ອງທ່ຽວລາວຂອງເມືອງ.
    ພະອາຈານ ໂງ່ນຄຳ ພວງສະຫວັນ ໄດ້ໃຫ້ສຳພາດຕໍ່ສື່ມວນຊົນເມື່ອບໍ່ດົນມານີ້ວ່າ: ວັດປ່າມະຫາໂຊກສັງວານພວງສະຫວັນໄຊຍາຣາມ ສ້າງຕັ້ງມາເປັນເວລາເກືອບສາມປີແລ້ວ. ໃນໄລຍະຜ່ານມາພໍ່ແມ່ປະຊາຊົນຊາວພຸດທະສາສະໜາຈາກທຸກຫົນແຫ່ງທີ່ມີຈິດໃຈໃສສັດທາມາທ່ຽວຊົມ, ກາບໄຫວ້ສັກກາລະບູຊາ, ຂໍພອນ, ຖືສິນພາວະ ນາຢ່າງຫຼວງຫຼາຍ ແລະ ກາຍເປັນສະຖານທີ່ທ່ອງທ່ຽວທີ່ສຳຄັນອີກແຫ່ງໜຶ່ງຂອງເມືອງອາດສະພັງທອງ. ປັດຈຸບັນ ພາຍໃນວັດໄດ້ມີການສ້າງພະພຸດທະຮູບໃຫຍ່, ປູ່ເວດສຸວັນ, ພະຍານາກ ແລະ ໄດ້ສຳເລັດການສ້າງພະອຸປະຄຸດໃຈກາງໜອງ, ສຳລັບແຜນການໃນຕໍ່ໜ້າ ຈະສ້າງນ້ຳພຸຕໍ່ໜ້າພະຍານາກ ແລະ ສ້າງຫໍແຈກສາລາໂຮງທຳ ເພື່ອເປັນບ່ອນປະຕິບັດສິນປະຕິວັດທຳ. ດ້ວຍຄວາມກຽມພ້ອມ ແລະ ເງື່ອນໄຂໃນຫຼາຍໆດ້ານເປັນຕົ້ນ ສະຖານທີ່ກວ້າງຂວາງມີຄວາມເໝາະສົມ. ດັ່ງນັ້ນ, ທາງເມືອງອາດສະພັງທອງ ຈຶ່ງໄດ້ກຳນົດເອົາວັດປ່າມະຫາໂຊກສັງວານພວງສະຫວັນໄຊຍາຣາມ ເປັນສະຖານທີ່ຈັດງານເປີດປີທ່ອງທ່ຽວລາວ 2024 ຊຶ່ງພາຍໃນງານຄັ້ງນີ້ມີກິດຈະກຳປ່ອນບີພະພຸດທະຮູບພະອຸປະຄຸດ. 
ໂອກາດນີ້, ພະອາຈານ ໂງ່ນຄຳ ພວງສະຫວັນ ໄດ້ກ່າວໃຫ້ຮູ້ຕື່ມອີກວ່າ: ອັດຕະມາຮູ້ສຶກພາກພູມໃຈ ແລະດີໃຈຫຼາຍທີ່ທາງການນຳເມືອງ ແລະ ການຈັດຕັ້ງທີ່ກ່ຽວຂ້ອງໄດ້ເລືອກເອົາວັດປ່າມະຫາໂຊກສັງວານພວງສະຫວັນເປັນສະຖານທີ່ເປີດປີທ່ອງທ່ຽວລາວ 2024 ຂອງເມືອງພ້ອມດຽວກັນນີ້, ຂໍຮຽນເຊີນຊາວພຸດທັງຫຼາຍ, ອອກຕົນຍາດໂຍມເຂົ້າມາເປັນເຈົ້າພາບເຈົ້າສັດທາຮ່ວມກັນ ເພື່ອເຮັດໃຫ້ງານຄັ້ງນີ້ມີບັນຍາດກາດຄຶກຄື້ນມ່ວນຊື່ນ ຊຶ່ງງານດັ່ງ ກ່າວຈະໄດ້ຈັດຂຶ້ນໃນມໍ່ໆນີ້.