 |
ທ່ານ ສຸວັນທອນ ຈັນທະວົງ ຮອງຫົວໜ້າຫ້ອງການສຶກສາທິການ ແລະ ກິລາເມືອງ ໄດ້ລາຍງານການກະກຽມຄວາມພ້ອມດ້ານຕ່າງໆ ຊຶ່ງເຫັນວ່າໃນປັດຈຸບັນ ທົ່ວເມືອງອາດສະພອນມີຄວາມພ້ອມແລ້ວ 100% ທີ່ຈະຈັດການສອບເສັງຂຶ້ນໃນລະຫວ່າງວັນທີ 27-28 ພຶດສະພາ 2026 ທີ່ຈະມາເຖິງນີ້ ເປັນເອກະພາບກັນທົ່ວເມືອງ. ສໍາລັບຕົວເລກສະຖິຕິໃນສົກຮຽນນີ້, ມີນັກຮຽນທີ່ມີໜ້າໃນທະບຽນສອບເສັງທັງໝົດ 1,050 ຄົນ ຍິງ 518 ຄົນ, ໂດຍແບ່ງອອກເປັນ 45 ຫ້ອງສອບເສັງ ແລະ ມີຄະນະປະທານສູນສອບເສັງ 23 ທ່ານ ພ້ອມດ້ວຍກຳມະການຍາມຫ້ອງເສັງ 90 ທ່ານ, ກຳນົດເອົາ 7 ສູນສອບເສັງຄື: ສູນສອບເສັງໂຮງຮຽນປະຖົມນາກຸດຈານ 2, ສູນສອບເສັງປະຖົມຫີນສິ່ວ, ສູນສອບເສັງປະຖົມກາງໃຫຍ່, ສູນສອບເສັງປະຖົມນາແຄ, ສູນສອບເສັງປະຖົມແກ້ງແມວ, ສູນສອບເສັງປະຖົມນາປອດ ແລະ ສູນເສັງປະຖົມນາເລົ່າ. ສ່ວນວິຊາສອບເສັງມີ 4 ວິຊາຫຼັກ ຄື: ພາກຫັດແຕ່ງ, ພາກຂຽນທວາຍ, ວິຊາຄະນິດສາດ ແລະ ວິຊາວິທະຍາສາດສິ່ງແວດລ້ອມ.
ໂອກາດນີ້, ທ່ານ ກອງແລ ອ່ອນຈັນທະລືໄຊ ໄດ້ມີຄຳເຫັນໂອ້ລົມ ແລະ ໃຫ້ທິດຊີ້ນຳຕໍ່ຄະນະກຳມະການສອບເສັງທຸກພາກສ່ວນ ຈົ່ງຍົກສູງຄວາມຮັບຜິດຊອບຕໍ່ໜ້າທີ່ຂອງຕົນ, ປະຕິບັດງານດ້ວຍຈັນຍາບັນ, ມີຄວາມໂປ່ງໃສ ແລະ ຍຸຕິທຳ ພ້ອມທັງສະກັດກັ້ນທຸກປະກົດການຫຍໍ້ທໍ້ໃນຂະແໜງການສຶກສາ. ພ້ອມທັງຮຽກຮ້ອງໃຫ້ຜູ້ບໍລິຫານການສຶກສາ, ຄູ-ອາຈານ, ຄະນະພັດທະນາການສຶກສາຂັ້ນບ້ານ, ຜູ້ປົກຄອງ ນັບທັງທຸກພາກສ່ວນໃນສັງຄົມ ຈົ່ງເຫັນໄດ້ຄວາມສຳຄັນ ແລະ ຖືເອົາບັ້ນສອບເສັງຄັ້ງນີ້ເປັນບຸນປາງໃຫຍ່ ເພື່ອຮັບປະກັນໃຫ້ການດຳເນີນງານປະສົບຜົນສຳເລັດ 100% ຕາມຄາດໝາຍ. ແຫຼ່ງຂ່າວ: ສະຫວັນນະເຂດ
ຄໍາເຫັນ