 |
ນັກທ່ອງທ່ຽວຈໍານວນດັ່ງກ່າວ, ເປັນນັກທ່ອງທ່ຽວພາຍໃນປະເທດ 31,146 ຄົນ ແລະ ນັກທ່ອງທ່ຽວຕ່າງປະເທດສູງເຖິງ 46,637 ຄົນ. ຕົວເລກນີ້, ສະແດງໃຫ້ເຫັນເຖິງສັນຍານທີ່ດີຕໍ່ການຟື້ນຕົວຂອງຂະແໜງການທ່ອງທ່ຽວ, ໂດຍສະເພາະແມ່ນການດຶງດູດນັກທ່ອງທ່ຽວຕ່າງປະເທດເຂົ້າມາທ່ຽວຫຼາຍຂຶ້ນ. ເມື່ອທຽບໃສ່ໄລຍະດຽວກັນຂອງປີ 2024 ຈຳນວນນັກທ່ອງທ່ຽວໄດ້ເພີ່ມຂຶ້ນເຖິງ 17,461 ເທື່ອຄົນ, ຊຶ່ງເປັນການຢືນຢັນເຖິງທ່າແຮງ ແລະ ຄວາມນິຍົມຊົມຊອບຂອງນັກທ່ອງທ່ຽວທີ່ມີຕໍ່ເມືອງໂຂງ. ສາເຫດ ແລະ ປັດໄຈສຳຄັນທີ່ເຮັດໃຫ້ເມືອງໂຂງ ໄດ້ຮັບຄວາມສົນໃຈແມ່ນຄວາມຫຼາກຫຼາຍຂອງແຫຼ່ງທ່ອງທ່ຽວ. ປັດຈຸບັນ, ມີແຫຼ່ງທ່ອງທ່ຽວທໍາມະຊາດເຖິງ 20 ແຫ່ງ, ແຫຼ່ງທ່ອງທ່ຽວດ້ານວັດທະນະທຳ 14 ແຫ່ງ ແລະ ແຫຼ່ງທ່ອງທ່ຽວດ້ານປະຫວັດສາດ 7 ແຫ່ງ, ຊຶ່ງລ້ວນແຕ່ມີເອກະລັກສະເພາະຕົວ ແລະ ສາມາດຕອບສະໜອງຄວາມຕ້ອງການຂອງນັກທ່ອງທ່ຽວໄດ້ຫຼາກຫຼາຍຮູບແບບ. ພ້ອມກັນນັ້ນ, ການບໍລິການດ້ານທີ່ພັກ ແລະ ຮ້ານອາຫານໃນເມືອງກໍໄດ້ຮັບການພັດທະນາຢ່າງຕໍ່ເນື່ອງ ເພື່ອຮອງຮັບນັກທ່ອງທ່ຽວທີ່ເພີ່ມຂຶ້ນ ເມືອງໂຂງມີໂຮງແຮມທັງໝົດ 14 ແຫ່ງ. ໃນນັ້ນ, ມີໂຮງແຮມລະດັບ 3 ດາວ 1 ແຫ່ງ, ມີຈຳນວນຫ້ອງພັກ 576 ຫ້ອງ ແລະ 808 ຕຽງ. ນອກຈາກນີ້, ຍັງມີເຮືອນພັກອີກ 78 ແຫ່ງ, ມີ 806 ຫ້ອງ. ສໍາລັບການບໍລິການດ້ານອາຫານ - ກິນດື່ມ, ມີຮ້ານອາຫານ 41 ແຫ່ງ ແລະ ຮ້ານກິນດື່ມ 8 ແຫ່ງ ພ້ອມໃຫ້ບໍລິການອາຫານພື້ນເມືອງ ແລະ ອາຫານສາກົນແກ່ນັກທ່ອງທ່ຽວ.
 |
ທ່ານ ໄພວັນ ສໍຄົງສິນ ໄດ້ກ່າວຕື່ມວ່າ: ການເພີ່ມຂຶ້ນຂອງນັກທ່ອງທ່ຽວນີ້, ເປັນສັນຍານທີ່ດີຕໍ່ການພັດທະນາເສດຖະກິດຂອງເມືອງ, ພວກເຮົາຈະສືບຕໍ່ພັດທະນາແຫຼ່ງທ່ອງທ່ຽວຕ່າງໆ, ປັບປຸງການບໍລິການ ແລະ ສິ່ງອຳນວຍຄວາມສະດວກ ເພື່ອໃຫ້ເມືອງໂຂງຍັງຄົງເປັນຈຸດໝາຍປາຍທາງທີ່ໜ້າສົນໃຈ ແລະ ຍືນຍົງສຳລັບນັກທ່ອງທ່ຽວທັງພາຍໃນ ແລະ ຕ່າງປະເທດ. ການເຕີບໂຕຢ່າງຕໍ່ເນື່ອງນີ້, ເປັນສ່ວນໜຶ່ງຂອງຄວາມພະຍາຍາມໃນການສົ່ງເສີມການທ່ອງທ່ຽວຂອງແຂວງຈຳປາສັກ ໂດຍລວມ ແລະ ຄາດວ່າເມືອງໂຂງຈະສືບຕໍ່ເປັນເສົາຄໍ້າ ສຳຄັນໃນການດຶງດູດນັກທ່ອງທ່ຽວສູ່ພາກໃຕ້ຂອງ ສປປ ລາວ.
 |
(ຂ່າວ-ພາບ: ພຸດທະສິນ ວົງວິໄລທອງ)
ຄໍາເຫັນ