ເມືອງໝື່ນ ສ້າງຄວາມເຂັ້ມແຂງໃຫ້ແກ່ການຈັດຕັ້ງບ້ານ

ການຝຶກອົບຮົມຄັ້ງນີ້ ສຳມະນາກອນໄດ້ຮຽນຮູ້ກ່ຽວກັບກົດລະບຽບຂອງບ້ານ, ນິຕິກຳຕ່າງໆທີ່ບ້ານວາງອອກ, ພື້ນຖານລະບຽບຫຼັກການໃນການປະກອບສ່ວນຂອງປະຊາຊົນ ເພື່ອເປັນບ່ອນອີງໃຫ້ແກ່ບ້ານໃນການຈັດຕັ້ງປະຕິບັດ, ແນໃສ່ສົ່ງເສີມ, ປຸກລະດົມການປະກອບສ່ວນຂອງປະຊາຊົນ, ເສີມຂະຫຍາຍສິດເປັນເຈົ້າ, ຫົວຄິດປະດິດສ້າງຂອງບ້ານ ໃນການຂຸດຄົ້ນນຳໃຊ້ທ່າແຮງພັດທະນາບ້ານຂອງຕົນໃຫ້ເປັນຫົວໜ່ວຍພັດທະນາເທື່ອລະກ້າວ, ໃນນັ້ນເອກະສານທີ່ນຳມາຝຶກອົບຮົມຄັ້ງນີ້ປະກອບມີ 5 ເນື້ອໃນຄື: 1.ຄຳແນະນຳກ່ຽວກັບບ້ານ ແລະ ການຈັດຕັ້ງບ້ານ; 2. ຄຳແນະນຳ ກ່ຽວກັບການສ້າງກົດລະບຽບບ້ານ; 3. ຂໍ້ຕົກລົງວ່າດ້ວຍ ການປະກອບສ່ວນຂອງປະຊາຊົນໃນການພັດທະນາ; 4. ການຍົກສູງຄຸນນະພາບຂອງສະມາຊິກພັກ ແລະ ວຽກງານຂະຫຍາຍພັກ; 5. ການຍົກສູງຄຸນນະພາບການຈັດຕັ້ງຮາກຖານພັກໃຫ້ປອດໃສ, ເຂັ້ມແຂງ, ໜັກແໜ້ນ.

ຈຸດປະສົງ ເພື່ອເປັນຂະຫຍາຍເນື້ອໃນກ່ຽວກັບສ້າງບ້ານ ເປັນການຈັດຕັ້ງຊຸມຊົນ ຂຶ້ນກັບຄະນະກຳມະການປົກຄອງຕາແສງ ໃຫ້ສອດຄ່ອງກັບກົດໝາຍ ແລະ ລະບຽບການທີ່ກ່ຽວຂ້ອງ, ເຮັດໃຫ້ມີຄວາມເຂົ້າໃຈເປັນເອກະພາບໃນການຈັດຕັ້ງປະຕິບັດວຽກງານ, ເປັນຄູ່ມືໃຫ້ອົງການປົກຄອງທ້ອງຖິ່ນ ໃນການຊຸກຍູ້, ຕິດຕາມ, ກວດກາ ແລະ ການເຄື່ອນໄຫວປະຕິບັດໜ້າທີ່ວຽກງານຂອງບ້ານທີ່ເປັນການຈັດຕັ້ງຊຸມຊົນ, ກໍານົດຄວາມໝາຍ, ທິດນໍາ, ຂັ້ນຕອນການສ້າງ ແລະ ປັບປຸງກົດລະບຽບຂອງບ້ານ ໃຫ້ຖືກຕ້ອງຕາມກົດໝາຍ, ລະບຽບການ, ສອດຄ່ອງກັບສະພາບຕົວຈິງ, ຮັບປະກັນຄວາມຍຸຕິທໍາ, ປົກປ້ອງສິດຜົນປະໂຫຍດຂອງລັດ, ລວມໝູ່, ບຸກຄົນ ແລະ ສັງຄົມພາຍໃນບ້ານ, ເຮັດໃຫ້ການຄຸ້ມຄອງບໍລິຫານບ້ານ ມີປະສິດທິພາບ, ປະສິດທິຜົນ ແລະ ຫັນເຂົ້າສູ່ລະບຽບຫຼັກການ, ພ້ອມທັງສ້າງໃຫ້ຮາກຖານພັກບ້ານເປັນແກນນໍາໃນລະບົບການເມືອງຢູ່ຂັ້ນຮາກຖານ, ສ້າງໃຫ້ຄະນະພັກຮາກຖານ, ຄະນະໜ່ວຍພັກ ແລະ ສະມາຊິກພັກມີຄວາມປອດໃສ, ເຂັ້ມແຂງ, ໜັກແໜ້ນທາງດ້ານການເມືອງ, ແນວຄິດ, ການຈັດຕັ້ງ, ແບບແຜນນໍາພາ ແລະ ແບບແຜນວິທີເຮັດວຽກ, ສາມາດນໍາພາຈັດຕັ້ງປະຕິບັດແນວທາງ, ແຜນນະໂຍບາຍ, ກົດລະບຽບຂອງພັກ, ກົດໝາຍ ແລະ ລະບຽບການຕ່າງໆຂອງລັດ, ສ້າງໃຫ້ການຈັດຕັ້ງຮາກຖານພັກໃຫ້ມີການຫັນປ່ຽນໃໝ່ຢ່າງຕັ້ງໜ້າ, ແນໃສ່ຍົກສູງຄວາມສາມາດນໍາພາ ແລະ ລັກສະນະນໍາໜ້າຂອງພັກໃຫ້ນັບມື້ສູງຂຶ້ນ.

ຂ່າວ: ເມືອງໝື່ນ