 |
ຈຸດປະສົງຫຼັກຂອງກອງປະຊຸມແມ່ນເພື່ອສະຫຼຸບຕີລາຄາຜົນສໍາເລັດ ແລະ ບັນຫາທ້າທາຍ ຂອງການຈັດຕັ້ງປະຕິບັດແຜນພັດທະນາການສຶກສາ ແລະ ກິລາ ໃນ 1 ສົກຮຽນທີ່ຜ່ານມາ (2025-2026), ພ້ອມທັງຄົ້ນຄວ້າວາງທິດທາງ, ແຜນວຽກຈຸດສຸມ ສໍາລັບສົກຮຽນ 2026-2027. ນອກຈາກນີ້, ຍັງໄດ້ມີການປຶກສາຫາລືກ່ຽວກັບການຊັບຊ້ອນຈັດສັນຄູ, ການຊຸກຍູ້ຂະບວນການສິລະປະສຶກສາ-ກິລາ, ການຍົກສູງຄຸນນະພາບການສຶກສາ ແລະ ການກະກຽມຄວາມພ້ອມ.ໃຫ່ແກ່ການປັບປຸງຫຼັກສູດໃໝ່ 6+3+3 ອີກດ້ວຍ ແລະ ໃນສົກຮຽນ 2025-2026 ທີ່ຜ່ານມາ, ຂະແໜງການສຶກສາເມືອງພຽງ ສາມາດຍາດໄດ້ຜົນງານທີ່ພົ້ນເດັ່ນຫຼາຍດ້ານ ເປັນຕົ້ນແມ່ນ: ສາມາດແກ້ໄຂບັນຫາຄູອາສາສະໝັກໄດ້ທັງໝົດ 42 ຕົວເລກ (ປະກອບມີ: ຕົວເລກຈາກລັດຖະບານ 14 ຕົວເລກ, ຕົວເລກທົດແທນ 11 ຕົວເລກ ແລະ ຕົວເລກ ປກຊ 17 ຕົວເລກ) ຊຶ່ງປັດຈຸບັນແມ່ນບໍ່ມີຄູອາສາແລ້ວ. ດ້ານຄຸນນະພາບນັກຮຽນ, ອັດຕາການສອບເສັງຈົບຊັ້ນ ມ.7 ແມ່ນສາມາດສອບຜ່ານໄດ້ 100%, ສາມາດຍາດໄດ້ລາງວັນນັກຮຽນເກັ່ງຂັ້ນແຂວງ 4 ລາງວັນ (ລາງວັນທີ 1 ຈຳນວນ 3 ລາງວັນ ແລະ ທີ 2 ຈຳນວນ 1 ລາງວັນ) ແລະ ຍາດໄດ້ລາງວັນຊົມເຊີຍລະດັບຊາດ ວິຊາເຄມີສາດ ມ.7 ຈໍານວນ 1ຄົນ.
ພ້ອມດຽວກັນນັ້ນ, ຍັງສາມາດນຳເອົານັກຮຽນທີ່ປະລະການຮຽນກັບຄືນສູ່ໂຮງຮຽນໄດ້ 159 ນ້ອງ, ໄດ້ສົ່ງເສີມນັກຮຽນດ້ອຍໂອກາດນອນຫໍພັກຈຳນວນ 72ຄົນ ໂດຍໄດ້ຮັບເບ້ຍລ້ຽງຈາກອົງການປົກຄອງແຂວງ 300,000 ກີບ/ຄົນ, ແລະ ມີນັກຮຽນໄດ້ຮັບທຶນຈາກມູນນິທິເກື້ອຝັນເດັກ 35 ນ້ອງ. ນອກຈາກການສະໜັບສະໜູນຂອງລັດແລ້ວ, ຊຸມຊົນຍັງໄດ້ປະກອບສ່ວນທຶນຮອນເຂົ້າໃນການສ້ອມແປງ ແລະ ພັດທະນາໂຮງຮຽນລວມມູນຄ່າຫຼາຍກວ່າ 600 ລ້ານກີບ.
ຄຽງຄູ່ກັບຜົນສຳເລັດ, ກອງປະຊຸມກໍໄດ້ຍົກໃຫ້ເຫັນບາງຂໍ້ຄົງຄ້າງທີ່ຕ້ອງໄດ້ຮ່ວມກັນແກ້ໄຂ ເປັນຕົ້ນແມ່ນ: ການປະຕິບັດ 7 ຄາດໝາຍຂອງສະພາປະຊາຊົນແຂວງທີ່ຍັງບໍ່ທັນບັນລຸ. ນັກຮຽນຍັງອ່ອນດ້ານພາສາລາວ (ຂຽນທວາຍ, ຫັດແຕ່ງ). ອັດຕາການປະລະການຮຽນຍັງສູງຍ້ອນສະພາບເສດຖະກິດ-ຄອບຄົວ. ຍັງມີການຂາດແຄນຄູສອນໂດຍສະເພາະແມ່ນການສຶກສາກ່ອນໄວຮຽນ ແລະ ອາຄານສະຖານທີ່-ຫ້ອງຮຽນມີຄວາມຊຸດໂຊມ.
ເພື່ອຮັບປະກັນການຈັດຕັ້ງປະຕິບັດໃນສົກຮຽນ 2026-2027 ໃຫ້ມີປະສິດທິພາບ, ກອງປະຊຸມໄດ້ເນັ້ນໜັກໃຫ້ຜູ້ບໍລິຫານ ແລະ ຄູ-ອາຈານ ສຸມໃສ່ວຽກງານບູລິມະສິດຄື: ການຕ້ານ ແລະ ແກ້ໄຂບັນຫາການປະລະການຮຽນ ໂດຍປະຕິບັດຕາມຄຳສັ່ງແນະນຳ ເລກທີ 777/ຄປມ. ເລັ່ງໃສ່ການຝຶກອົບຮົມຄູ, ເສີມສ້າງທັກສະດ້ານດິຈິຕອນ-AI ໃຫ້ແກ່ບຸກຄະລາກອນ. ກຽມຄວາມພ້ອມຮອງຮັບການປັບປຸງລະບົບການສຶກສາສາຍສາມັນ 6+3+3 ທີ່ຈະຈັດຕັ້ງປະຕິບັດໃນສົກຮຽນ 2028-2029 ໃຫ້ທັນເວລາ. ສູ້ຊົນປະຕິບັດ 3 ຂໍ້ແຂ່ງຂັນຂອງຂະແໜງການສຶກສາ (ສອນດີ-ຮຽນເກັ່ງ, ຕ້ານປະກົດການຫຍໍ້ທໍ້, ສ້າງສະພາບແວດລ້ອມທີ່ດີ). ນອກຈາກນີ້, ຍັງຮຽກຮ້ອງໃຫ້ສົ່ງເສີມຂະບວນການກິລາ-ສິລະປະສຶກສາໃນໂຮງຮຽນໃຫ້ຟົດຟື້ນ ຕິດພັນກັບການສ້າງນັກກິລາ ເພື່ອກຽມເຂົ້າຮ່ວມງານມະຫາກຳກິລານັກຮຽນທົ່ວປະເທດ ທີ່ແຂວງເຊກອງ ໃນທ້າຍປີ 2027 ອີກດ້ວຍ. ຂ່າວ: ແສງສຸດາ ກິ່ງສະຫວັດ.
ຄໍາເຫັນ