 |
ການສອບເສັງຄັດເລືອກນັກຮຽນເກັ່ງກໍແມ່ນກິດຈະກຳໜຶ່ງທີ່ນອນຢູ່ໃນແຜນການປັບປຸງຄຸນນະພາບການສຶກສາທີ່ໄດ້ຈັດຕັ້ງປະຕິບັດມາຢ່າງຕໍ່ເນື່ອງໃນແຕ່ລະສົກຮຽນ ເພື່ອສ້າງໂອກາດໃຫ້ນັກຮຽນສະແດງຄວາມຮູ້, ຄວາມສາມາດ, ພອນສະຫວັນ, ຫົວຄິດປະດິດສ້າງຂອງຕົນເອງ ແລະ ທັງເປັນການສົ່ງເສີມຂະບວນການສອນດີຮຽນເກັ່ງໃນບັນດາໂຮງຮຽນໃຫ້ມີບັນຍາກາດຟົດຟຶ້ນແຂ່ງຂັນກັນ ແລະ ເຂົ້າໃຈສະແດງອອກໃນວິທີການແຂ່ງຂັນໃນຂັ້ນເມືອງ, ກ້າວເຂົ້າສູ່ການສອບເສັງນັກຮຽນເກັ່ງຂັ້ນແຂວງ ເພື່ອແນໃສ່ຂີດຄວາມສາມາດຄັດເລືອກຕົວແທນນັກນຽນເກັ່ງຂອງເມືອງ ປ5, ມ4, ມ7 ເຂົ້າຮ່ວມການສອບເສັງແຂ່ງຂັນໃນລະດັບແຂວງຄາດຄະເນວ່າ ຈະສອບເສັງເດືອນມີນາ 2026 ທີ່ແຂວງສາລະວັນ.
 |
ສຳລັບນັກຮຽນທີ່ເຂົ້າຮ່ວມສອບເສັງໃນຄັ້ງນີ້, ມີຕົວແທນມາຈາກກຸ່ມໂຮງຮຽນຊັ້ນປະຖົມ, ມັດທະຍົມຕົ້ນ-ປາຍໃນທົ່ວເມືອງ. ການສອບເສັງຊັ້ນປະຖົມມີ 3 ວິຊາຄື: ພາສາລາວ, ວິຊາຄະນິດສາດ,ວິຊາວິທະຍາສາດ ແລະ ສິ່ງແວດລ້ອມ. ຊັ້ນມັດທະຍົມ (ມ4) ແລະ (ມ7) ປະກອບມີ: 4 ວິຊາຄື: ວິຊາ ພາສາລາວ-ວັນນະຄະດີ, ວິທະຍາສາດ, ຟີຊິກສາດ ແລະ ເຄມີສາດ. ນັກສອບເສັງທັງໝົດ 89 ຄົນ ຍິງ 51 ຄົນ. ໃນນັ້ນ, ຊັ້ນປະຖົມ ປ5 ມີ 57 ຄົນຍິງ 33 ຄົນ, ມັດທະຍົມຕົ້ນ (ມ4) ມີ 16 ຄົນຍິງ 10 ຄົນ, ຊັ້ນມັດທະຍົມປາຍ (ມ7) ມີ 16 ຄົນ ຍິງ8 ຄົນ ທີ່ມາຈາກ 9 ກຸ່ມໂຮງຮຽນ.
 |
ຜົນການສອບເສັງຄັດເລືອກນັກຮຽນເກັ່ງປະຈຳສົກປີ 2025-2026 ມີດັ່ງນີ້: ປ5 ທີ 1 ວິຊາຄະນິດສາດ ນາງ ສຸດດາວັນ ມະໂນທຳ ຈາກກຸ່ມໂຮງຮຽນຕະຫຼຸງ-ລະລາວ, ທີ 1 ວິທະຍາສາດ ແລະ ສິ່ງແວດລ້ອມ ນາງ ປານສາຍ ຈາກກຸ່ມໂຮງຮຽນຕະຫຼຸງ-ລະລາວ, ພາສາລາວໄດ້ແກ່ນາງ ກັນຍາ ວັງວົງດາວ ຈາກກຸ່ມໂຮງຮຽນຕະຫຼຸງ-ລະລາວ, ມ4 ຄະນິດສາດ ທີ 1 ນາງ ສຸພາພອນ ຈາກກຸ່ມໂຮງຮຽນ ມຕ ປີໂກະ, ພາສາລາວ-ວັນນະຄະດີ ທີ 1 ທ້າວ ຕັງ ລີຊົມແຊ ຈາກກຸ່ມໂຮງຮຽນ ມສ ຕະໂອ້ຍ, ຟີຊິກສາດ ທີ 1 ທ້າວ ພິມມະສອນ ຈາກກຸ່ມໂຮງຮຽນ ມຕ ປີໂກະ, ເຄມີສາດ ທີ 1 ນາງ ລິດສະໄຫມ ເກດເມສາຈາກກຸ່ມໂຮງຮຽນ ມຕ ຫ້ວຍງົວ ແລະ ມ7 ວິຊາຄະນິດສາດ ທີ 1 ທ້າວ ພູໄທ ໃສສະທອນ ຈາກກຸ່ມໂຮງຮຽນ ມສ ຕະໂອ້ຍ, ພາສາລາວ-ວັນນະຄະດີ ທີ 1 ນາງ ພາລິສາ ສັນຍາຢອນ ຈາກກຸ່ມໂຮງຮຽນ ມສ ຕະໂອ້ຍ, ຟີຊິກສາດ ທີ 1 ນາງ ພັນ ຈາກກຸ່ມໂຮງຮຽນ ມສ ຕະໂອ້ຍ, ເຄມີສາດ ທີ 1 ນາງ ທິບພະຈັນ ແກ້ວມະນີວົງຈາກກຸ່ມໂຮງຮຽນ ມສ ຕະໂອ້ຍ.
ສຳລັບນັກຮຽນເກັ່ງທີ່ເສັງໄດ້ອັນດັບທີ 1 ໄດ້ຮັບຂອງຂວັນເງິນສົດຈຳນວນ 300,000 ກີບ ແລະ ໃບຍ້ອງຍໍຂອງຫົວໜ້າຫ້ອງການສຶກສາທິການ ແລະ ກິລາເມືອງ. ທີ 2 ໄດ້ຮັບເງິນສົດຈຳນວນ 200,000ກີບ, ທີ 3 ໄດ້ຮັບເງິນສົດຈຳນວນ 100,000 ກີບ, ພ້ອມນັ້ນຍັງໄດ້ຮັບໃບຢັ້ງຢືນຕື່ມອີກ.
(ຂ່າວ-ພາບ: ອ່ອນໃຈ ໄຊຍະແຮດ)
ຄໍາເຫັນ