 |
ໂດຍປະຕິບັດຕາມ ຄໍາສັ່ງແນະນໍາ ແລະ ແຈ້ງການຂອງພະແນກສຶກສາທິການ ແລະ ກິລາແຂວງ ຊຶ່ງທາງເມືອງໄດ້ອອກແຈ້ງການເຖິງບັນດາໂຮງຮຽນ ແລະ ອຳນາດການປົກຄອງບ້ານ, ຄະນະພັດທະນາການສຶກສາຂັ້ນບ້ານ (ຄພສບ ) ຢູ່ໃນທົ່ວເມືອງ ເພື່ອກະກຽມຄວາມພ້ອມ ໂດຍສະເພາະແມ່ນການສ້ອມແປງອາຄານສະຖານທີ່, ໂຕະ, ຕັ່ງ, ກະດານດຳ ຂອງໂຮງຮຽນໃນແຕ່ລະບ້ານ ແມ່ນໄດ້ພ້ອມກັນຈັດຕັ້ງປະຕິບັດຢ່າງເປັນຂະບວນ. ໃນທົ່ວເມືອງມີໂຮງຮຽນທັງໝົດ 87 ແຫ່ງ, ໂຮງຮຽນອະນຸບານ 34 ແຫ່ງ, ປະຖົມ 43 ແຫ່ງ, ມັດທະຍົມ 10 ແຫ່ງ, ລວມຫ້ອງສອນໃນສົກຮຽນຜ່ານມາ 394 ຫ້ອງ, ມີຄູສອນ 430 ຄົນ, ຍິງ 284 ຄົນ, ໃນນັ້ນ ລວມທັງພະນັກງານບໍລິຫານ 46 ຄົນ, ຍິງ 21 ຄົນ, ຄູສອນ 100% ມີ 356 ຄົນ, ຍິງ 248 ຄົນ, ຄູຮັບໂຄຕ້າ ຂອງທະຫານ 9 ຄົນ, ຍິງ 5 ຄົນ, ມີຄູອາສາ 9 ຄົນ, ໄດ້ຮັບໂຄຕ້າ 7 ຄົນ, ຍັງ ເຫຼືອ 2 ຄົນ, ໃນສົກຮຽນຜ່ານມາມີນັກຮຽນທັງໝົດ ແຕ່ຊັ້ນອະນຸບານ ຈົນຮອດຊັ້ນມັດທະຍົມ 5,708 ຄົນ, ຍິງ 2,921 ຄົນ, ການຈັດຕັ້ງປະຕິບັດການຮຽນ-ການສອນ ແມ່ນມີທ່ວງທ່າດີຂຶ້ນຫຼາຍ, ການປະລະການຮຽນ ແມ່ນຫຼຸດລົງ. ອັນທີ່ພົ້ນເດັ່ນກວ່າໝູ່ແມ່ນໂຄງການນຳນ້ອງຄືນສູ່ໂຮງຮຽນ ແລະ ຮຽນຈົນຈົບ ຖືວ່າປະຕິບັດໄດ້ດີ ຕິດອັນດັບທີ 2 ຂອງແຂວງ, ທັງຊັ້ນປະຖົມ ແລະ ມັດທະຍົມ ແມ່ນລະດົມໄດ້ຕາມແຜນຂອງນັກຮຽນທີ່ອອກກາງປີ ນອກຈາກນີ້ແລ້ວ ຍັງລະດົມນັກຮຽນທີ່ອອກໃນປີກ່ອນກັບຄືນເຂົ້າມາຮຽນ ແລະ ໃນສົກຮຽນນີ້ ແມ່ນຈະສືບຕໍ່ ແຜນງານນຳນ້ອງຄືນສູ່ໂຮງຮຽນ ແລະ ສືບຕໍ່ຮຽນຈົບສາຍສາມັນ ໃນຄາດໝາຍສູ້ຊົນຈັດຕັ້ງປະຕິບັດ 10 ຄາດໝາຍຂອງຂະແໜງການສຶກສາ ຊຶ່ງປີຜ່ານມາປະຕິບັດບັນລຸໄດ້ 5 ຄາດໝາຍ, ປີນີ້ຈະສູ້ຊົນປະຕິບັດໃຫ້ໄດ້ 7 ຄາດໝາຍ, ສ່ວນຄາດໝາຍທາງດ້ານຄຸນນະພາບ ແມ່ນຈະສຸມໃສ່ໃນການປະຕິບັດ ການຮຽນ-ການສອນ ເພື່ອຍົກສູງຄຸນນະພາບໃຫ້ດີຂຶ້ນ ໂດຍເນັ້ນວິຊາພາສາລາວ, ຄະນິດສາດ ໃນຊັ້ນປະຖົມ ໃຫ້ສາມາດອ່ານອອກຂຽນໄດ້ ແລະ ຄິດໄລ່ໄດ້ໃນຂັ້ນພື້ນຖານ. ເພື່ອຢາກໃຫ້ວຽກງານດັ່ງກ່າວນີ້ ບັນລຸໄດ້ດີ, ໄດ້ຮັບການປະຕິບັດຕາມແຜນການວາງໄວ້ ຄະນະພັດທະນາການສຶກສາຂັ້ນບ້ານ, ຄູ-ອາຈານ ແມ່ນເປັນຜູ້ລິເລີ່ມ ຫຼື ເປັນເປົ້າໝາຍຫຼັກໃນການຈັດຕັ້ງປະຕິບັດວຽກງານດັ່ງກ່າວ. ພະນັກງານ ຄູ-ອາຈານ ຕ້ອງປະຕິບັດການຮຽນ-ການສອນ ໃຫ້ໄປຕາມຫຼັກສູດໂຄງການ, ນຳໃຊ້ສື່ ອຸປະກອນທີ່ທັນສະໄໝ ໃຫ້ມັນທ່ວງທັນກັບຍຸກສະໄໝ ແລະ ເນັ້ນໃນການປັບປຸງຄຸນນະພາບ ໂດຍຝຶກອົບຮົມໃຫ້ຄູສອນ ເພື່ອນຳເອົາຄວາມຮູ້ລົງເຜີຍແຜ່ຄວາມຮູ້ໃນການສິດສອນ.
 |
ທ່ານ ວິໄຊ ມະຫາໂຄດໄດ້ກ່າວຕື່ມວ່າ : ສຳລັບການຈັດຕັ້ງປະຕິບັດ 10 ຕົວຊີ້ວັດຂອງຂະແໜງການສຶກສາ ປະຕິບັດໄດ້ 5 ຄາດໝາຍມີຄື: ການເຂົ້າຮຽນຂອງເດັກອາຍຸ 5 ປີ ແມ່ນປະຕິບັດໄດ້ 83.8 % ທຽບໃສ່ຄາດໝາຍຖືວ່າຜ່ານ, ຄາດໝາຍທີ 2 ອັດຕາການເຂົ້າຮຽນຊັ້ນປໍ5 ຫາມໍ1 ແມ່ນປະຕິບັດໄດ້ 83.2 % ທຽບໃສ່ຄາດໝາຍຖືວ່າບັນລຸ, ເປີເຊັນຂອງຄູປະຈຳການ ເຮັດວຽກສຶກສານິເທດ ໃນຄາບການຝຶກອົບຮົມວິຊາຊີບຄູແບບຕໍ່ເນື່ອງ ບັນລຸໄດ້ 39% ຄາດໝາຍແມ່ນ 30 %, ປະຊາກອນໜຸ່ມຜູ້ປະລະການຮຽນໄດ້ຮັບການຝືກອົບຮົມ ຜ່ານການສຶກສານອກໂຮງຮຽນ ກສນ ແລະ ຝຶກອົບຮົມວິຊາຊີບ ວຽກງານ ກສນ ປະຕິບັດໄດ້ 247 ຄົນ, ຄາດໝາຍວາງໃຫ້ແມ່ນ 120 ຄົນ, ການສົ່ງເສີມມວນຊົນ ທຸກເພດ, ທຸກໄວ ໄດ້ເຂົ້າຮ່ວມຫັດກາຍບໍລິຫານ ແລະ ອອກກຳລັງກາຍ ຫຼິ້ນກິລາເພື່ອສຸຂະພາບ ແຜນການ 38 % ປະຕິບັດໄດ້ 38% ສ່ວນອີກ 5 ຕົວຊີ້ວັດທີ່ຍັງເຫຼືອ ບໍ່ບັນລຸນັ້ນ ແມ່ນຈະສືບຕໍ່ຈັດຕັ້ງປະຕິບັດ ຢູ່ໃນສົກຮຽນ 2026-2027 ໃຫ້ບັນລຸຕາມຄາດໝາຍ ໂດຍສະເພາະແມ່ນອັດຕາການເຂົ້າຮຽນຂອງເດັກ 6 ປີ, ຢູ່ປໍ1 ແມ່ນຈະໃຫ້ສໍາເລັດ, ຈຳນວນປະຊາກອນໜຸ່ມທີ່ຜ່ານການຝຶກອົບຮົມຫຼັກສູດຈະເນັ້ນໃຫ້ບັນລຸ.
ສຳລັບໂຮງຮຽນທີ່ໄດ້ຮັບຜົນກະທົບຈາກໄພພິບັດນໍ້າຖ້ວມໃນທົ່ວມີທັງໝົດ 11 ແຫ່ງ, ຊຶ່ງໄດ້ຮັບຜົນເສຍຫາຍຈຳນວນໜຶ່ງ ຊຶ່ງປະກອບມີ ພື້ນຂອງໂຮງຮຽນຖືກນໍ້າເຊາະເຈື່ອນ, ຮົ້ວກຳແພງລົ້ມ ແລະ ອຸປະກອນການຮຽນ-ການສອນຈຳນວນໜຶ່ງ ທີ່ໄດ້ຮັບຜົນເສຍຫາຍ.
ໃນໂອກາດນີ້ທ່ານ ວິໄຊ ມະຫາໂຄດ ຍັງໄດ້ຮຽກ ຮ້ອງ ເຖິງຄະນະຜູ້ບໍລິຫານການສຶກສາ ແລະ ພະນັກງານຄູ-ອາຈານ ເອົາໃຈໃສ່ປະຕິບັດ ການຮຽນ-ການສອນ ເນັ້ນໃຫ້ມີຄຸນນະພາບ ໂດຍສະເພາະ ຄູສອນຕ້ອງປະຕິບັດໂມງເວລາ ໃຫ້ຖືກຕ້ອງຕາມລະບຽບລັດຖະກອນ, ການນຳໃຊ້ສື່ທີ່ທັນສະໄໝເຂົ້າໃນການຮຽນ-ການສອນ ເພື່ອຕອບສະໜອງກັບຄວາມຮຽກຮ້ອງຕ້ອງການຂອງເດັກໃນຍຸກສະໄໝໃໝ່, ສຳລັບຄະນະພັດທະນາການສຶກສາຂັ້ນບ້ານ ຕ້ອງເອົາໃຈໃສ່ປະຕິບັດຕາມພາລະບົດບາດ ຂອງຕົນເອງໃນການຊຸກຍູ້ສົ່ງເສີມວຽກງານການສຶກສາ.
ຄໍາເຫັນ