ທ່ານ ອຸ່ນຫຼ້າ ສີວັນເພັງ ຮອງຜູ້ອຳນວຍການໃຫຍ່ ມຊ ຕາງໜ້າພາກວິຊາສື່ສານມວນຊົນ ຄະນະອັກສອນສາດ ມຊ ໄດ້ປະກອບຄຳເຫັນຕໍ່ກອງປະຊຸມວຽກງານສື່ມວນຊົນທົ່ວປະເທດ ຄັ້ງທີ I ໃນຫົວຂໍ້: ການພັດທະນາບຸກຄະລາກອນສື່ສານມວນຊົນ ໃຫ້ເປັນມືອາຊີບ ແລະ ທັນກັບຍຸກສະໄໝ ເມື່ອບໍ່ດົນມານີ້ ທີ່ຫໍປະຊຸມແຫ່ງຊາດວ່າ: ໃນຍຸກແຫ່ງການຫັນປ່ຽນເປັນດີຈີຕອນ ແລະ ຂໍ້ມູນຂ່າວສານທີ່ຫຼາກຫຼາຍໃນປັດຈຸບັນ ເພື່ອແນໃສ່ການພັດທະນາບຸກຄະລາກອນສື່ສານມວນຊົນ ໃຫ້ເປັນມືອາຊີບ ແລະ ທັນກັບຍຸກສະໄໝ ໂດຍເນັ້ນໃສ່ 4 ປັດໄຈຫຼັກ ດັ່ງນີ້: 1. ການສ້າງທັກສະເຕັກໂນໂລຊີ ແລະ ຄວາມຮູ້ສະເພາະດ້ານທີ່ທັນສະໄໝ: ຫຼັກສູດໃໝ່ຂອງພວກເຮົາໄດ້ບັນຈຸລາຍວິຊາທີ່ສອດຄ່ອງກັບຍຸກດີຈີຕອນຢ່າງຊັດເຈນ ເປັນຕົ້ນວິຊາການຖ່າຍພາບ ແລະ ຕັດຕໍ່ວີດີໂອ, ການຜະລິດສຽງສຳລັບສື່, ການອອກແບບສື່ສິ່ງພິມ ແລະ ວິຊາການເຜີຍແຜ່ຂໍ້ມູນທາງສື່ໃໝ່. ນອກຈາກນັ້ນ, ຍັງສ້າງຄວາມພ້ອມດ້ານວິຊາຊີບສະເພາະເຊັ່ນ: ການເປັນໂຄສົກ ແລະ ພິທີກອນ, ວິຊາການສຳພາດ, ການຂຽນບົດຄວາມ-ບົດສາລະຄະດີ ແລະ ການຜະລິດລາຍການວິທະຍຸ-ໂທລະພາບ. ສິ່ງເຫຼົ່ານີ້ຈະຊ່ວຍໃຫ້ນັກສຶກສາທີ່ຈົບໄປສາມາດປະຕິບັດງານໄດ້ທັນທີໃນຖານະນັກວິຊາການ ແລະ ມືອາຊີບໃນທຸກຂົງເຂດ; 2. ການຮຽນ-ການສອນ ແບບເນັ້ນການປະຕິບັດຕົວຈິງ ແລະ ເຊື່ອມໂຍງກັບສັງຄົມ: ພວກເຮົາບໍ່ໄດ້ຈຳກັດການຮຽນຮູ້ຢູ່ພຽງແຕ່ໃນຫ້ອງຮຽນ. ພາກວິຊາໄດ້ຈັດຕັ້ງການນຳພານັກສຶກສາລົງທັດສະນະສຶກສາ, ເບິ່ງການປະຕິບັດໜ້າທີ່ຕົວຈິງຢູ່ບັນດາກົມກອງສື່ມວນຊົນ, ສະຖານີວິທະຍຸ, ໂທລະພາບ ແລະ ສຳນັກຂ່າວຕ່າງໆ. ທີ່ສຳຄັນ, ຫຼັກສູດຍັງໄດ້ກຳນົດ "ວິຊາການລົງຝຶກງານ" ເພື່ອໃຫ້ນັກສຶກສາໄດ້ຮຽນຮູ້ຈາກປະສົບການຈິງຂອງນັກສື່ສານມວນຊົນມືອາຊີບ. ນອກຈາກນັ້ນ, ຍັງໄດ້ຊຸກຍູ້ ແລະ ສົ່ງເສີມໃຫ້ນັກສຶກສາຜະລິດຜົນງານສື່ສ້າງສັນ ເຂົ້າຮ່ວມການປະກວດໃນເວທີຕ່າງໆ ທັງພາຍໃນ ແລະ ຕ່າງປະເທດ ເພື່ອເປັນການທົດສອບຄວາມສາມາດ ແລະ ຍົກລະດັບຄວາມໝັ້ນໃຈໃຫ້ນັກສຶກສາກ່ອນກ້າວເຂົ້າສູ່ຕະຫຼາດແຮງງານ; 3. ການຍົກລະດັບວິຊາສະເພາະ ແລະ ທັກສະເຕັກໂນໂລຊີຂອງຄູ-ອາຈານ: ເພື່ອຮັບປະກັນໃຫ້ການຮຽນ-ການສອນມີຄຸນນະພາບສູງຂຶ້ນ, ພາກວິຊາພວກເຮົາໄດ້ເອົາໃຈໃສ່ເປັນພິເສດຕໍ່ກັບການພັດທະນາບຸກຄະລາກອນຄູ. ຕະຫຼອດໄລຍະທີ່ຜ່ານມາ, ຄູ-ອາຈານພາຍໃນພາກວິຊາ ໄດ້ຮັບການຊຸກຍູ້ໃຫ້ໄປຍົກລະດັບຄວາມຮູ້ວິຊາສະເພາະ ທັງພາຍໃນ ແລະ ຕ່າງປະເທດ, ພ້ອມທັງເຂົ້າຮ່ວມການຝຶກອົບຮົມ ເພື່ອເສີມທັກສະທາງດ້ານການສື່ສານ ແລະ ການນຳໃຊ້ເຄື່ອງມື, ເຕັກໂນໂລຊີສື່ໃໝ່ໃຫ້ມີຄວາມທັນສະໄໝ ໝັ້ນຄົງ ກ້າວທັນກັບສະພາບປັດຈຸບັນ. ສິ່ງນີ້ເຮັດໃຫ້ຄູ-ອາຈານສາມາດນຳເອົາຄວາມຮູ້ ແລະ ເຕັກນິກໃໝ່ໆ ມາຖ່າຍທອດໃຫ້ນັກສຶກສາໄດ້ຢ່າງມີປະສິດທິຜົນ; 4. ການປູກຝັງຈັນຍາບັນ, ຄຸນສົມບັດ ແລະ ສະຕິຮັບຜິດຊອບຕໍ່ສັງຄົມ: ໃນຍຸກທີ່ຂໍ້ມູນຂ່າວສານມີທັງດ້ານຕັ້ງໜ້າ ແລະ ຫຍໍ້ທໍ້, ພາກວິຊາພວກເຮົາຖືຄຸນສົມບັດ ແລະ ຈັນຍາບັນເປັນຫົວໃຈສຳຄັນ. ມີວິຊາ "ກົດໝາຍ ແລະ ຈັນຍາບັນສື່ສານມວນຊົນ" ໂດຍກົງ ເພື່ອຫຼໍ່ຫຼອມໃຫ້ນັກສຶກສາມີແນວຄິດ, ຄຸນສົມບັດ, ມີຄວາມຮັບຜິດຊອບຕໍ່ໜ້າທີ່, ປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ.
ທ່ານ ອຸ່ນຫຼ້າ ສີວັນເພັງ ກ່າວຕື່ມວ່າ: ເພື່ອໃຫ້ການພັດທະນາບຸກຄະລາກອນສື່ສານມວນຊົນມີຄວາມເຂັ້ມແຂງ, ຕໍ່ເນື່ອງ ແລະ ຍືນຍົງ, ຂໍສະເໜີຄຳຄິດເຫັນ ແລະ ຂໍ້ສະເໜີ ໜຶ່ງ: ສະເໜີໃຫ້ມີການສ້າງກົນໄກການຮ່ວມມື ແລະ ເຊື່ອມຈອດ ລະຫວ່າງສະຖາບັນການສຶກສາ (ຜູ້ສ້າງ) ແລະ ບັນດາກົມກອງສື່ມວນຊົນ (ຜູ້ໃຊ້) ໃຫ້ແໜ້ນແຟ້ນກວ່າເກົ່າ ໂດຍສະເພາະການຈັດກິດຈະກຳຮ່ວມກັນ, ການຮອງຮັບນັກສຶກສາລົງຝຶກງານ ແລະ ການຮັບເຂົ້າເຮັດວຽກ; ສອງ: ສະເໜີໃຫ້ພາກສ່ວນກ່ຽວຂ້ອງ ຍົກລະດັບການສະໜັບສະໜູນດ້ານທຶນຮອນ ແລະ ອຸປະກອນເຕັກໂນໂລຊີທີ່ທັນສະໄໝ (ເຊັ່ນ: ເຄື່ອງມືຖ່າຍທຳ) ເຂົ້າໃນການຮຽນ-ການສອນເພື່ອໃຫ້ນັກສຶກສາໄດ້ຝຶກຊ້ອມກັບເຄື່ອງມືທີ່ແທ້ຈິງຫຼາຍກວ່າເກົ່າ.
ຄໍາເຫັນ