ທ່ານ ເບນຈາມິນ ແວກເນີ ນັກຄົ້ນຄວ້າຂອງມະຫາວິທະຍາໄລ Melbourne ກ່າວວ່າ: ການຕິດຕາມແມ່ນສໍາຄັນຕໍ່ການຢູ່ລອດ, ແຕ່ວ່າສັດຫຼາຍຊະນິດໃຊ້ເວລາສ່ວນໃຫຍ່ຢູ່ເທິງຕົ້ນໄມ້ສູງຈຶ່ງກວດຫາໄດ້ຍາກ. ທ່ານກ່າວຕື່ມວ່າ: ປະຊາກອນສັດປ່າໃກ້ຈະສູນພັນກຳລັງຫຼຸດລົງ ຍ້ອນການສູນເສຍທີ່ຢູ່ອາໄສ, ໄຟປ່າ ແລະ ການປ່ຽນແປງຂອງສະພາບດິນຟ້າອາກາດ.
ນັກຄົ້ນຄວ້າພົບວ່າ: ໂດຣນ ສາມາດສໍາຫຼວດພື້ນທີ່ປ່າໄດ້ຫຼາຍກວ່າການສ່ອງໄຟສະປອດໄລແບບດັ່ງເດີມເຖິງ 10 ເທົ່າ. ເນື່ອງຈາກການສ່ອງໄຟສະປອດໄລແບບດັ່ງເດີມຕ້ອງໃຊ້ແຮງງານຄົນຍ່າງຊ້າໆໃນເວລາກາງຄືນ ແລະ ມັກຈະພາດການເຫັນສັດ, ລວມເຖິງເຮັດໃຫ້ເກີດຄວາມສ່ຽງດ້ານຄວາມປອດໄພຕໍ່ນັກສຳຫຼວດ.
ຜົນການສຶກສາທີ່ພິມເຜີຍແຜ່ໃນວາລະສານ Ecological Applications ພາຍໃຕ້ສະມາຄົມນິເວດວິທະຍາ ແຫ່ງ ສະຫະລັດ ອາເມຣິກາ ພົບວ່າ: ກ້ອງກວດຫາຄວາມຮ້ອນເທິງໂດຣນ ສາມາດກວດພົບຄວາມຮ້ອນໃນຮ່າງກາຍຈາກໄລຍະທີ່ປອດໄພຢູ່ເທິງປາຍໄມ້, ເຮັດໃຫ້ລົບກວນສັດໜ້ອຍທີ່ສຸດ.
ນັກຄົ້ນຄວ້າໄດ້ເປີດເຜີຍວ່າ: ໂດຣນກວດພົບສັດລ້ຽງລູກດ້ວຍນົມ 9 ຊະນິດທີ່ອາໄສຢູ່ເທິງຕົ້ນໄມ້ໃນຫຼາຍບ່ອນ, ບັນທຶກການສັງເກດສັດລ້ຽງລູກດ້ວຍນົມພື້ນເມືອງ, ນົກປ່າ ແລະ ສັດທີ່ອາໄສຢູ່ເທິງພື້ນດິນເຊັ່ນ: bandicoots, wombats, ກວາງປ່າ ແລະ ແມວປ່າ ໃນເຂດການຄົ້ນຄວ້າ ຫຼາຍກວ່າ 1,000 ຄັ້ງ.
ວິທີການຕິດຕາມແບບໃໝ່ນີ້ຍັງໄດ້ກວດພົບໝີ leadbeater possum ທີ່ໃກ້ຈະສູນພັນຂັ້ນວິກິດ ແລະ Greater Glider ສາຍພັນໃຕ້ ຊຶ່ງເປັນສັດໃກ້ຈະສູນພັນໃນບັນດາສາຍພັນອື່ນໆທີ່ໂດດເດັ່ນອີກຢ່າງຫຼວງຫຼາຍ.
ທ່ານ ແວກເນີ ກ່າວວ່າ: ປັດຈຸບັນມີການຂະຫຍາຍຂອບເຂດການຄົ້ນຄວ້າ ແລະ ດຳເນີນການສຳຫຼວດດ້ວຍໂດຣນເພີ່ມຕື່ມຫຼາຍກວ່າ 100 ຄັ້ງ ຊຶ່ງກວດຫາສັດຫຼາຍກວ່າ 4,000 ໂຕ, ເພື່ອສຶກສາການຟື້ນຟູສັດປ່າໃນປ່າຂອງລັດ Victoria.
ຄໍາເຫັນ