 |
ພິທີຕ້ອນຮັບ ນັກສຶກສາດັ່ງກ່າວ ມີຂຶ້ນ ໃນວັນທີ່ 4 ສີງຫາ 2026 ນີ້ ທີ່ພະແນກກະສິກຳ ແລະ ສິ່ງແວດລ້ອມແຂວງຫຼວງພະບາງ ໂດຍມີ ທ່ານ ວົງຄໍາແຫງ ວົງທະຈັກ ຫົວໜ້າກົມຮ່ວມມື ແລະ ການເງິນສາກົນ ກະຊວງການເງິນ, ທ່ານ ສັນຍາ ຊຸມພົນພັກດີ ຮອງຫົວໜ້າພະແນກກະສິກຳ ແລະ ສິ່ງແວດລ້ອມ ແຂວງຫຼວງພະບາງ, ທ່ານ ນາງ ຣີຮານາ ຣາຊາ ຜູ້ອໍານວຍການໃຫຍ່ ປະຈໍາພາກພື້ນອາຊີ ແລະ ປາຊີຢິກ ຂອງອົງການອີຟັດ (IFAD) ເຂົ້າຮ່ວມ,
ທ່ານ ສັນຍາ ຊຸມພົນພັກດີ ໄດ້ສະແດງຄວາມຍີນດີຕ້ອນຮັບ ແລະ ພາກພູມໃຈ ທີ່ແຂວງຫຼວງພະບາງ ໄດ້ຮັບຄັດເລືອກເປັນເຈົ້າພາບໃນການຈັດກິດຈະກຳ ການຮຽນຮູ້ຂອງໄວໜຸ່ມ (Youth Learning Journey) ທີ່ເປັນພາກສ່ວນໜຶ່ງຂອງການຈັດຕັ້ງປະຕິບັດ ກິດຈະກຳ ຂໍ້ລິເລີ່ມ ສໍາລັບໄວໜຸ່ມລາວ ພາຍໃຕ້ຫົວຂໍ້: ສິ່ງທ້າທາຍໃນການນໍາໃຊ້ ICT ຢູ່ໃນຂະແໜງການກະສິກຳ ໃນຄັ້ງນີ້, ເຊິ່ງເປັນເວທີສໍາຄັນ ສໍາລັບການແລກປ່ຽນບົດຮຽນ, ສ້າງຄວາມຮ່ວມມື ແລະ ເຊື່ອມໂຍງ ຄົນຮຸ່ນໃໝ່ກັບການພັດທະນາຂະແໜງກະສິກຳ.
 |
ທ່ານກ່າວຕື່ມວ່າ: ຕະຫຼອດໄລຍະຫຼາຍປີຜ່ານມາ, IFAD ໄດ້ເປັນຄູ່ຮ່ວມພັດທະນາທີ່ສໍາຄັນຂອງ ສປປ ລາວ ແລະ ແຂວງຫຼວງພະບາງ ໃນການສົ່ງເສີມການພັດທະນາກະສິກຳ, ຊົນນະບົດ, ການຫຼຸດຜ່ອນຄວາມທຸກຍາກ ແລະ ຍົກລະດັບຄຸນນະພາບຊີວິດ ຂອງປະຊາຊົນໃຫ້ດີຂຶ້ນ, ກິດຈະກຳ ຂໍ້ລິເລີ່ມສໍາລັບໄວໜຸ່ມລາວ ເປັນຫຼາຍກວ່າກິດຈະກຳສໍາລັບຊາວໜຸ່ມ, ເຊິ່ງຈະເປັນເວທີສໍາຄັນໃນການເຊື່ອມໂຍງ ລະຫວ່າງຊາວໜຸ່ມ, ສະຖາບັນການສຶກສາ, ນັກຄົ້ນຄວ້າ, ພາກລັດ, ພາກເອກະຊົນ ແລະ ຄູ່ຮ່ວມພັດທະນາ ຈາກຫຼາຍປະເທດ ເພື່ອຮ່ວມກັນ ຄົ້ນຫາແນວທາງໃໝ່ໆ ໃນການພັດທະນາລະບົບອາຫານ ແລະ ກະສິກຳທີ່ຍືນຍົງ.
ຈາກນັ້ນ ທ່ານ ວົງຄໍາແຫງ ວົງທະຈັກ ແລະທ່ານ ນາງ ຣີຮານາ ຣາຊາ ໄດ້ຜັດປ່ຽນກັນມີຄຳເຫັນເພື່ອໃຫ້ບັນດານັກສຶກສາໄດ້ແລກປ່ຽນຄຳເຫັນ ກ່ຽວກັບການຈັດຕັ້ງປະຕິບັດກິດຈະກຳຂອງ ພາຍໃຕ້ໂຄງການຊົນລະກະເສດ ແລະ ການຜະລິດຂະໜາດນ້ອຍ (PICSA), ເຊີ່ງຕາງໜ້າຄະນະຮັບຜິດຊອບ ໄດ້ມີການລາຍງານການຈັດຕັ້ງປະຕິບັດບັນດາກິດຈະກຳ ຢູ່ 120 ບ້ານ, 19 ເມືອງ ໃນ 4 ແຂວງຄື: ໄຊຍະບູລີ, ຊຽງຂວາງ, ຫຼວງພະບາງ ແລະ ຫົວພັນ, ພ້ອມນັ້ນ ບັນດານັກສຶກສາ ໄດ້ມີການແລກປ່ຽນຄຳເຫັນ ແລະ ໄດ້ລົງເບິ່ງກິດຈະກຳ ທີ່ຈັດຕັ້ງປະຕິບັດ ຢູ່ເມືອງຈອມເພັດ ແລະ ນະຄອນຫຼວງພະບາງ ຕື່ມອີກ.
ຂ່າວ-ພາບ: ອາພຸດເດດ ບຸບຜາ
ຄໍາເຫັນ