 |
ພິທີດັ່ງກ່າວໃຫ້ກຽດເຂົ້າຮ່ວມໂດຍ ທ່ານ ພຸດ ສິມມາລາວົງ ປະທານສະມາຄົມມິດຕະພາບລາວ-ຍີ່ປຸ່ນ ແລະ ທ່ານ ກິ່ງມະໂນ ພົມມະຫາໄຊ ຮອງລັດຖະມົນຕີກະຊວງສຶກສາທິການ ແລະ ກິລາ, ພ້ອມດ້ວຍແຂກຖືກເຊີນເຂົ້າຮ່ວມ.
ປີນີ້, ມີນັກສຶກສາຈາກປະເທດລາວມີທັງໝົດ 18 ຄົນທີ່ໄດ້ຮັບທຶນການສຶກສາເພື່ອໄປສຶກສາລະດັບຫຼັງປະລິນຍາຕີ, ລະດັບຊັ້ນສູງຫຼັກສູດເຕັກໂນໂລຊີ ແລະ ຊັ້ນສູງທົ່ວໄປທີ່ປະເທດຍີ່ປຸ່ນ.ເປັນທີ່ຄາດຫວັງວ່າເຫຼົ່ານັກສຶກສາຈະໄດ້ຮັບປະສົບການ, ຄວາມຮູ້ ແລະ ທັກສະທີ່ລ້ຳຄ່າຢູ່ຍີ່ປຸ່ນ ແລະ ເອົາມານຳໃຊ້ເພື່ອພັດທະນາປະເທດຊາດ ແລະ ພາກພື້ນໃນອະນາຄົດ.
ທ່ານ ໂຄອິຊຶມິ ຊຶໂຕມຸ ເອກອັກຄະຣາຊະທູດຍີ່ປຸ່ນປະຈຳ ສປປ ລາວ, ໄດ້ແນະນຳໃຫ້ ນັກສຶກສາລາວໃຫ້ແລກປ່ຽນກັບຄົນຍີ່ປຸ່ນໃຫ້ຫຼາຍຂຶ້ນເພື່ອຮູ້ຈັກກັບປະເທດຍີ່ປຸ່ນໃຫ້ເລິກເຊິ່ງກວ່າເກົ່າ ພ້ອມທັງໃຫ້ແບ່ງປັນມົນສະເໜ່ຂອງປະເທດລາວໃຫ້ຄົນຍີ່ປຸ່ນອີກດ້ວຍ. ເນື່ອງຈາກປະເທດລາວໄດ້ຮັບຄວາມສົນໃຈໃນປະເທດຍີ່ປຸ່ນຫຼາຍຂຶ້ນ ພາຍຫຼັງການສະເດັດຢ້ຽມຢາມ ປະເທດລາວ ຂອງ ສົມເດັດ ເຈົ້າຍິງ ໄອໂກະ ແຫ່ງ ປະເທດຍີ່ປຸ່ນ ໃນເດືອນພະຈິກປີ 2025 ທີ່ຜ່ານມາ.
 |
ນາງ ວາລິສາ ນິນທາວົງ, ທີ່ຈະໄປສຶກສາຕໍ່ໃນລະດັບຫຼັງປະລິນຍາຕີ ໄດ້ຕາງໜ້າຜູ້ຮັບທຶນ MEXT ໃນຄັ້ງນີ້ສະແດງຄວາມຂອບໃຈຕໍ່ລັດຖະບານຍີ່ປຸ່ນທີ່ເອື້ອເຟື້ອເຜື່ອແຜ່ໃຫ້ທຶນການສຶກສາໃນຄັ້ງນີ້ພ້ອມທັງສະແດງຄວາມມຸ່ງໝັ້ນທີ່ຈະຕັ້ງໜ້າສຶກສາຮ່ຳຮຽນທີ່ປະເທດຍີ່ປຸ່ນ.
ນອກຈາກນັ້ນ, ນັກສຶກສາທີ່ຈົບມາຈາກຍີ່ປຸ່ນ ກໍໄດ້ແບ່ງປັນປະສົບການ ແລະ ໃຫ້ຄຳແນະນຳຜູ້ໄດ້ຮັບທຶນໃນປີນີ້ ໃຫ້ນຳໃຊ້ໂອກາດຄັ້ງນີ້ໃຫ້ເກີດຜົນປະໂຫຍດສູງສຸດ.
ແຫຼ່ງຂ່າວ: ສະຖານທູດຍີ່ປຸ່ນ
ຄໍາເຫັນ