ນັກສຶກສາຊຸດທີ 2 ທີ່ໄດ້ຝຶກອົບຮົມຢູ່ສະຖານທີ່ຝຶກງານດ້ານອຸດສາຫະກຳໄຟຟ້ານ້ຳຕົກທີ່ສ້າງຂຶ້ນໂດຍເຂື່ອນໄຟຟ້ານ້ຳລີກ 1-2 ແລະ ວິທະຍາໄລ ຊັບພະວິຊາ, ຜ່ານການເຂົ້າຮ່ວມຂະບວນການ ບຳລຸງຮັກສາເຂື່ອນໄຟຟ້າໃນທຸກຂັ້ນຕອນ, ນັກສຶກສາຝຶກງານກໍໄດ້ນຳເອົາຄວາມຮູ້ທາງດ້ານທິດສະດີສົມທົບກັບພາກປະຕິບັດຕົວຈິງ ເຮັດໃຫ້ພວກເຂົາໄດ້ມີການຍົກລະດັບຄວາມຮູ້ດ້ານວິຊາສະເພາະນີ້ຢ່າງຮອບດ້ານ. ນັກສຶກສາໄດ້ນໍາໃຊ້ການນໍາສະເໜີຮູບແບບ PPT ເພື່ອແບ່ງປັນປະສົບການ ແລະ ທັກສະທີ່ໄດ້ຮັບການຝຶກອົບຮົມ ແລະ ນັກສຶກສາໄດ້ກ່າວວ່າ: "ປະສົບການຝຶກງານໃນຄັ້ງນີ້ ບໍ່ພຽງແຕ່ໃຫ້ພວກເຂົາເຈົ້າເຂົ້າໃຈຢ່າງເລິກເຊິ່ງກ່ຽວກັບອຸດສາຫະກໍາໄຟຟ້ານ້ໍາຕົກ, ແຕ່ຍັງໄດ້ຮັບປະສົບການໃນການລົງປະຕິບັດຕົວຈິງຊຶ່ງເປັນປະສົບການທີ່ມີຄຸນຄ່າທີ່ສຸດ. ຄູຝຶກທີ່ເຂື່ອນໄຟຟ້າໄດ້ຢັ້ງຢືນເຖິງຜົນສຳເລັດຂອງນັກສຶກສາຝຶກງານໃນຫຼາຍໆດ້ານ, ພ້ອມນັ້ນຍັງໄດ້ບົ່ງຊີ້ເຖິງຂໍ້ບົກຜ່ອງ ແລະ ໄດ້ໃຫ້ຂໍ້ແນະນຳເພີ່ມເຕີມແກ່ນັກສຶກສາ. ຫົວໜ້າເຂື່ອນໄຟຟ້າ Tang Hongbing ໄດ້ກ່າວວ່າ: ນັກສຶກສາຝຶກງານກຸ່ມນີ້ໄດ້ສະແດງໃຫ້ເຫັນເຖິງຄຸນນະພາບດ້ານວິຊາຊີບ ແລະ ຄວາມສາມາດໃນການຮຽນຮູ້ທີ່ດີ ແລະ ມີຄວາມກະຕືລືລົ້ນໃນການເຮັດວຽກຢູ່ເຂື່ອນໄຟຟ້າ. ຫຼັງຈາກນັ້ນ, ເຂື່ອນໄຟຟ້າ ໄດ້ມອບໃບຢັ້ງຢືນການຝືກງານໃຫ້ແກ່ນັກສຶກສາ ຊຶ່ງເປັນຂີດ ໝາຍຜົນສຳເລັດໃນການຝຶກງານໄລຍະ 2 ເດືອນຂອງນັກສຶກສາ.
ເນື່ອງໃນໂອກາດວັນໄຫວ້ບັນພະບູລຸດ, ເຂື່ອນໄຟຟ້າຍັງໄດ້ຈັດກິດຈະກຳທາງວັດທະນະທຳທີ່ໄດ້ມີການສືບທອດກັນມາຢ່າງຍາວນານ. ໂດຍຜ່ານການເບິ່ງສາລະຄະດີກ່ຽວກັບວັດທະນະທຳໃນວັນໄຫວ້ບັນພະບູລຸດ, ສົ່ງເສີມໃຫ້ຄູ-ອາຈານ ແລະ ນັກສຶກສາໄດ້ເຂົ້າໃຈຢ່າງເລິກເຊິ່ງກ່ຽວກັບຕົ້ນກຳເນີດ, ວິວັດທະນາການ, ຮີດຄອງປະເພນີ ແລະ ຄວາມໝາຍຂອງວັດທະນະທຳວັນໄຫວ້ບັນພະບູລຸດ. ໃນກິດຈະກຳການປັ້ນແປ້ງ Qingtuan, ພໍ່ຄົວສັນຊາດຈີນໄດ້ມີການສອນວິທີການປັ້ນແປ້ງດ້ວຍຕົນເອງ, ຈາກນັ້ນທຸກຄົນກໍໄດ້ແບ່ງກຸ່ມເພື່ອປັ້ນແປ້ງ Qingtuan ໄປນຳກັນ, ກິດຈະກຳນີ້ ຊ່ວຍໃຫ້ທຸກຄົນໄດ້ສຳຜັດເຖິງສະເໜ່ຂອງອາຫານພື້ນເມືອງຈີນ. ນັກສຶກສາຝຶກງານ Kang Sai ເວົ້າດ້ວຍຄວາມຕື່ນເຕັ້ນວ່າ: ການໄດ້ລົງມືເຮັດອາຫານພື້ນເມືອງຈີນດ້ວຍຕົວເອງເປັນປະສົບການທີ່ບໍ່ສາມາດລືມໄດ້, ພ້ອມກັບເຮັດໃຫ້ຕົນເອງເຂົ້າໃຈເຖິງວັດທະນະທໍາຈີນຢ່າງເລິກເຊິ່ງຫຼາຍຍິ່ງຂຶ້ນ" .
ນັບແຕ່ເລີ່ມຕົ້ນຈົນເຖິງປັດຈຸບັນ, ບໍລິສັດ CWE ຍາມໃດກໍໃຫ້ຄວາມສໍາຄັນຕໍ່ການປູກຝັງ ເສີມສ້າງບຸກຄະລາກອນທ້ອງຖິ່ນ ແລະ ຕັ້ງໜ້າປະຕິບັດໜ້າທີ່ຕໍ່ສັງຄົມຂອງຕົນ. ໃນຕໍ່ໜ້າ, ບໍລິສັດ CWE ຈະສືບຕໍ່ເພີ່ມທະວີການຮ່ວມມືກັບວິທະຍາໄລພາຍໃນປະເທດ, ເພີ່ມທະວີໃນການເສີມສ້າງວິຊາການໃນສາຂາວິຊາສະເພາະ, ຊ່ວຍເຫຼືອພັດທະນາດ້ານການສຶກສາທ້ອງຖິ່ນ, ພ້ອມກັນນັ້ນກໍສ້າງເວທີການແລກປ່ຽນດ້ານວັດທະນະທຳອັນດີງາມເພື່ອຊຸກຍູ້ສາຍພົວພັນມິດຕະພາບລາວ - ຈີນ ໃຫ້ນັບມື້ນັບແໜ້ນແຟ້ນຍິ່ງຂຶ້ນ.
(ຂ່າວ: ເຂື່ອນໄຟຟ້ານ້ຳລີກ 1-2)
ຄໍາເຫັນ