ນັກໂທດຄ້າຍຄຸມຂັງ-ດັດສ້າງແຂວງຫຼວງພະບາງ ໄດ້ຮັບການປ່ອຍຕົວກ່ອນກຳນົດໂດຍມີເງື່ອນໄຂ

ທ່ານ ພັນໂທ ສິງທອງ ຫຼ້າອິນແກ້ວ ຮອງຫົວໜ້າຄ້າຍຄຸມຂັງ-ດັດສ້າງ ກອງບັນຊາການ ປກສ ແຂວງ ກ່າວວ່າ: ນັກໂທດທີ່ໄດ້ຮັບການປ່ອຍຕົວຄັ້ງນີ້ມີທັງໝົດ 13 ຄົນ, ເປັນການປ່ອຍຕົວກ່ອນກຳນົດໂດຍມີເງື່ອນ ໄຂຕາມແນວທາງນະໂຍບາຍຂອງພັກ-ລັດ ຕໍ່ບຸກຄົນທີ່ມີການປ່ຽນແປງທັດສະແນວຄິດ, ມີຄວາມຮູ້ສຶກກິນແໜງ ແຄງໃຈຕໍ່ການກະທຳຜິດຂອງຕົນ, ໂດຍຜ່ານການຄັດເລືອກຂຶ້ນບັນຊີຢ່າງໂປ່ງໃສ, ຄັດເລືອກໄດ້ນັກໂທດຜູ້ທີ່ຫ້າວຫັນປະຕິບັດລະບຽບຄ້າຍຄຸມຂັງຢ່າງເຂັ້ມງວດ ແລະ ຈິງໃຈໄຊ້ແທນຄ່າເສຍຫາຍ, ຄ່າປັບໄໝຕາມຄຳຕັດສິນຂອງສານ.

ໂອກາດນີ້, ທ່ານ ພັນເອກ ທາ ລຽນປະດິດ ໄດ້ມີຄຳເຫັນຍ້ອງຍໍຊົມເຊີຍຕໍ່ຄະນະບັນຊາ ແລະ ພະນັກ ງານ-ນັກຮົບພາຍໃນຄ້າຍຄຸມຂັງ-ດັດສ້າງ ທີ່ໄດ້ເອົາໃຈໃສ່ສຶກສາອົບຮົມ ເຮັດວຽກງານການເມືອງແນວຄິດໃຫ້ນັກໂທດ, ຜູ້ຕ້ອງຫາ, ດັດສ້າງຈົນສາມາດເຮັດໃຫ້ເຂົາເຈົ້າມີຄວາມຮັບຮູ້-ເຂົ້າໃຈ ຕໍ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດ. ຮຽກຮ້ອງໃຫ້ນັກໂທດຜູ້ທີ່ໄດ້ຮັບການປ່ອຍຕົວກ່ອນກຳນົດໃນຄັ້ງນີ້, ພາຍຫຼັງອອກໄປໃຊ້ຊີວິດໃນສັງຄົມ ຈົ່ງຕັ້ງໃຈຝຶກຝົນຫຼໍ່ຫຼອມ ພັດທະນາຊີວິດການເປັນຢູ່ຂອງຕົນ, ດຳລົງຊີວິດ ແລະສ້າງເສດຖະກິດຄອບຄົວດ້ວຍຄວາມສັດຊື່ບໍລິສຸດ, ປະຕິບັດຕົນໃຫ້ຢູ່ພາຍໃຕ້ແນວທາງນະໂຍບາຍຂອງພັກ ແລະ ລະບຽບກົດໝາຍຂອງລັດຢ່າງເຂັ້ມງວດ.

ຂ່າວ: ຮອ ນາງ ມະໄລວັນ ລັດສະໝີ; ພາບ: ຮຕ ບັນສິດທິ - ສທ ສຸລິສາ