ນໍາສະເໜີລົດ(ກາດສ)ພ້ອມສະໜອງການທ່ອງທ່ຽວ ຍູ້ແຮງຄວາມພ້ອມແກ່ປີທ່ອງທ່ຽວລາວ

ບໍລິສັດ ລີນາ ຈະເລີນການຄ້າ ຈໍາກັດ ຜູ້ດຽວ ຮ່ວມກັບ ບໍລິສັດ ຮ່ວມພັດທະນາການລົງທຶນ ລາວ ຈໍາກັດ ຂອງສະມາຄົມນັກທຸລະກິດໜຸ່ມແຫ່ງຊາດລາວ ໄດ້ຈັດງານນໍາສະເໜີລົດ ຍີ່ຫໍ້ ກາດສ (GAZ) ຊຶ່ງເປັນລົດ ສັນຊາດ ຣັດເຊຍ ຂຶ້ນໃນວັນທີ 4 ພະຈິກ ຜ່ານມາ ທີ່ຫໍປະຊຸມແຫ່ງຊາດ, ເປັນກຽດເຂົ້າຮ່ວມງານໂດຍ ທ່ານ ມະໄລທອງ ກົມມະສິດ ລັດຖະມົນຕີກະຊວງການຄ້າ ແລະ ອຸດສາຫະກຳ, ທ່ານ ມອນໄຊ ລາວມົວຊົ່ງ ເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ທ່ານ ວະລາດີເມຍ ກາລີນິນ ເອກອັກຄະຣາຊະທູດ ວິສາມັນຜູ້ມີອໍານາດເຕັມແຫ່ງ ສະຫະພັນ ຣັດເຊຍ ປະຈໍາ ສປປ ລາວ ພ້ອມດ້ວຍບັນດາທ່ານຈາກພາກສ່ວນກ່ຽວຂ້ອງເຂົ້າຮ່ວມ.
    ທ່ານ ຄໍາແສນ ສີສະວົງ ປະທານສະມາຄົມ ນັກທຸລະກິດໜຸ່ມ ແຫ່ງຊາດລາວ ທັງເປັນຮອງປະທານສະພາການຄ້າ ແລະ ອຸດສາຫະກຳ ແຫ່ງຊາດລາວ ໄດ້ກ່າວເປີດງານວ່າ: ສະມາຄົມນັກທຸລະກິດໜຸ່ມ ກໍຄືບໍລິສັດ ຮ່ວມພັດທະນາການລົງທຶນ ລາວ ຈໍາກັດ ໄດ້ຮ່ວມກັບ ບໍລິສັດ ລີນາ ຈະເລີນການຄ້າ ຈໍາກັດ ຜູ້ດຽວ ທີ່ມີປະສົບການໃນການນໍາເຂົ້າ ແລະ ຈໍາໜ່າຍລົດ ໄປປຶກສາຫາລືກັບບໍລິສັດ ກາດສ ຣັດເຊຍ ທີ່ມີສາຂາຢູ່ ສສ ຫວຽດນາມ ເພື່ອນໍາເຂົ້າລົດຍີ່ຫໍ້ດັ່ງກ່າວ ຊຶ່ງບໍລິສັດ ກາດສ ມີປະຫວັດສາດໃນອຸດສາຫະກຳລົດຍົນຫຼາຍກວ່າ 92 ປີ ແລະ ປັດຈຸບັນກໍໄດ້ພັດທະນາເຕັກໂນໂລຊີ ທີ່ເປັນນະວັດຕະກຳໃໝ່ຂອງລົດ ເພື່ອຮັບໃຊ້ແກ່ການຜະລິດ, ການທ່ອງທ່ຽວ, ການຂົ່ນສົ່ງສິນຄ້າ ແລະ ໂດຍສານສາທາລະນະ ໂດຍມີຕະຫຼາດສົ່ງອອກກວ່າ 43 ປະເທດໃນໂລກ. ທ່າມກາງສະພາບການຂອງປະເທດເຮົາ ທີ່ກຳລັງຫັນເປັນປະເທດແຫ່ງການຄ້າ-ການທ່ອງທ່ຽວ ໂດຍສະເພາະປີ 2024 ທີ່ຈະມາເຖິງ, ລົດຍີ້ຫໍ້ ກາສ ທີ່ເປັນພາຫະນະຮັບໃຊ້ແກ່ການທ່ອງທ່ຽວ ຊຶ່ງນອກຈາກຈະເໝາະກັບການເດີນທາງໃນສະພາບພື້ນຖານໂຄງລ່າງຂອງລາວ ກໍຍັງມີລາຄາທີ່ເໝາະສົມ ແລະ ຖືກກວ່າລົດຍີ່ຫໍ້ອື່ນ. ນອກຈາກນັ້ນ, ບໍລິສັດ ກໍຍັງໄດ້ຮ່ວມກັບບັນດາທະນາຄານທຸລະກິດ, ສະຖາບັນການເງິນ ເພື່ອໃຫ້ບັນດາບໍລິສັດນໍາທ່ຽວ ສາມາດເຂົ້າຫາແຫຼ່ງທຶນ ມາຊື້ລົດໄປໃຊ້ ຍູ້ແຮງອຸດສາຫະກຳການທ່ອງທ່ຽວໄດ້. ພ້ອມນີ້, ໃນຕໍ່ໜ້ານີ້ ກໍຍັງຈະມີການນໍາເຂົ້າອາໄຫຼ່, ມີສູນສ້ອມແປງ ແລະ ມີວິຊາການຈາກ ຣັດເຊຍ ມາປະຈໍາຢູ່ລາວ ເພື່ອໃຫ້ການບໍລິການ (ປັດຈຸບັນສູນບໍລິການຫຼັງການຂາຍ ແມ່ນຢູ່ ດານັງ ສສ ຫວຽດນາມ).
    ທ່ານ ມະໄລທອງ ກົມມະສິດ ກໍໄດ້ມີຄໍາເຫັນວ່າ: ງານຄັ້ງນີ້, ເປັນສັນຍານທີ່ສະແດງເຖິງຂີດໝາຍສຳຄັນ ທີ່ຈະປະກອບສ່ວນໃຫ້ແກ່ການຮ່ວມມືທາງດ້ານເສຖະກິດ, ການຄ້າ-ການລົງທຶນ ລະຫວ່າງ ລາວ-ຣັດເຊຍ ໃຫ້ຫຼາຍຂຶ້ນຕື່ມ ຊຶ່ງຈະສືບຕໍ່ເຕີບໃຫຍ່ຂະຫຍາຍຕົວ. ການຮ່ວມມືລະຫວ່າງ ບໍລິສັດລາວ ແລະ ບໍລິສັດ ຣັດເຊຍ ຄັ້ງນີ້, ຈະເປັນການປະກອບສ່ວນໃຫ້ແກ່ບໍລິມາດການຄ້າ-ການລົງທຶນ ລະຫວ່າງສອງປະເທດ ເພີ່ມຂຶ້ນ, ທັງເປັນການສົ່ງເສີມການຮ່ວມມືການໄປມາ-ຫາສູ່ ແລະ ການທ່ອງທ່ຽວຂອງປະຊາຊົນສອງປະເທດ ນັບມື້ເພີ່ມຂຶ້ນ; ຂະນະທີ່, ທ່ານ ວະລາດີເມຍ ກາລີນິນ ມີຄໍາເຫັນວ່າ: ຣັດເຊຍ-ລາວ ໃນປັດຈຸບັນ ຕ້ອງໄດ້ພະຍາຍາມຢ່າງສຸດຄວາມສາມາດ ເພື່ອເພີ່ມທະວີສາຍພົວພັນດ້ານເສດຖະກິດ-ການຄ້າ ຊຶ່ງການນຳເຂົ້າລົດຍີ່ຫໍ້ ກາດສ ມາລາວ ແມ່ນສັນຍານທີ່ດີ ທີ່ສະແດງໃຫ້ເຫັນວ່າສອງປະເທດ ມີການຮ່ວມມືດ້ານການຄ້າທີ່ດີ. 
    ພາຍໃນງານ, ໄດ້ມີການນຳສະເໜີລົດຍີ່ຫໍ້ ກາດສ ທີ່ມີຫຼາກຫຼາຍຮຸ່ນ ທັງລົດຕູ້ ໂດຍສານນັກທ່ອງທ່ຽວ, ລົດເມ ທີ່ສາມາດນຳສົ່ງນັກທ່ອງທ່ຽວໄດ້ເປັນຈຳນວນຫຼາຍ ແລະ ລົດບັນທຸກຂະໜາດນ້ອຍ, ລົດບັນທຸກໜັກ ຊຶ່ງບັນດາລົດຍີ່ຫໍ້ ກາດສ ເຫຼົ່ານີ້ມາພ້ອມກັບນະວັດຕະກຳທີ່ລໍ້າສະໄໝ, ມີຄວາມປອດໄພສູງ ແລະ ການອອກແບບທີ່ໂດດເດັ່ນ ເພື່ອຄວາມສະດວກສະບາຍຂອງຜູ້ໂດຍສານ ແລະ ຜູ້ຂັບ. ສະເພາະງານນີ້, ແມ່ນໄດ້ເປີດໂຕລົດຫຼາຍຮຸ່ນມີຄື: GAZelle Next, GAZelle NEXT Combi Van, GAZelle NEXT Citiline, Sadko NEXT AWD, Sadko NEXT chassis ຊຶ່ງທາງບໍລິສັດຜູ້ຈຳໜ່າຍ ມີຮັບປະກັນ 3 ປີ, ມີສູນສ້ອມແປງ ແລະ ອາໄຫຼ່ຄົບວົງຈອນ ໃນລາຄາທີ່ສົມເຫດສົມຜົນ; ສາມາດຈ່າຍກ່ອນ 40% ຜ່ອນຈ່າຍ 6 ປີກັບທະນາຄານມາຣູຮານ.
(ຂ່າວ-ພາບ: ສຸກສະຫວັນ)