 |
ໃນໂອກາດນີ້, ພະນະທ່ານ ສອນໄຊ ສີພັນດອນ ໄດ້ສະແດງຄວາມປິຕິຍິນດີ ແລະ ຮູ້ສຶກເປັນກຽດ ທີ່ໄດ້ເຂົ້າຢ້ຽມຂໍ່ານັບ ສົມເດັດ ຊຸນຕານ, ພ້ອມທັງໄດ້ນໍາເອົາຄວາມຢື້ຢາມຖາມຂ່າວ ແລະ ພອນໄຊອັນປະເສີດຈາກ ພະນະທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ເຖິງ ສົມເດັດ ຊຸນຕານ ແລະ ສົມເດັດ ພະລາຊິນີ. ພ້ອມນີ້, ໄດ້ສະແດງຄວາມຂອບໃຈຕໍ່ ລັດຖະບານ ແລະ ປະຊາຊົນ ບຣູໄນ ທີ່ໄດ້ໃຫ້ການສະໜັບສະໜູນ ແລະ ການຊ່ວຍເຫຼືອ ແກ່ ສປປ ລາວ ຕະຫຼອດໄລຍະຜ່ານມາ ຊຶ່ງໄດ້ປະກອບສ່ວນອັນສໍາຄັນເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ, ລວມທັງຜົນສຳເລັດຂອງການເປັນປະທານອາຊຽນຂອງ ສປປ ລາວ ໃນປີ 2024 ຜ່ານມາ.
ພ້ອມດຽວກັນນີ້, ສອງຝ່າຍ ໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືອັນດີ ລະຫວ່າງ ສອງປະເທດ ທີ່ມີບາດກ້າວຂະຫຍາຍຕົວຢ່າງຕໍ່ເນື່ອງ ຕະຫຼອດໄລຍະ 32 ປີ ຜ່ານມາ, ໂດຍເຫັນໄດ້ຈາກການແລກປ່ຽນການຢ້ຽມຢາມລະຫວ່າງການນໍາຂັັ້ນສູງຂອງສອງປະເທດຢ່າງເປັນປົກກະຕິກໍຄືການຮ່ວມມືໃນດ້ານຕ່າງໆ ໄດ້ຮັບການຈັດຕັ້ງປະຕິບັດຢ່າງເປັນຮູບປະທຳ ແລະ ນຳເອົາຜົນປະໂຫຍດຕົວຈິງມາສູ່ປະຊາຊົນສອງປະເທດ ນັບມື້ນັບເພີ່ມຂຶ້ນ. ພິເສດ, ແມ່ນການສະເດັດຢ້ຽມຢາມລັດຖະກິດ ສປປ ລາວ ໃນປີ 2023 ຜ່ານມາ ຂອງ ສົມເດັດ ຊຸນຕານ ພ້ອມດ້ວຍເຈົ້າຊາຍມາຕິນ ໃນໂອກາດສະເຫຼີມສະຫຼອງ ຄົບຮອບ 30 ປີ ແຫ່ງການສ້າງຕັ້ງສາຍພົວພັນການທູດລະຫວ່າງສອງປະເທດ, ພ້ອມທັງຍົກລະດັບສາຍພົວພັນການທູດ ຂຶ້ນເປັນຄູ່ຮ່ວມຍຸດທະສາດ.
ພ້ອມກັນນັ້ນ, ສອງຝ່າຍໄດ້ປຶກສາຫາລື ແລະ ແລກປ່ຽນຄໍາຄິດເຫັນ ເພື່ອສືບຕໍ່ເສີມຂະຫຍາຍການພົວພັນຮ່ວມມືໃນດ້ານຕ່າງໆ,ກໍຄືການຊຸກຍູ້ພາກສ່ວນກ່ຽວຂ້ອງໃນການຈັດຕັ້ງປະຕິບັດບັນດາຂໍ້ຕົກລົງທີ່ສອງຝ່າຍໄດ້ລົງນາມຮ່ວມກັນ ໃຫ້ໄດ້ຮັບປະສິດທິຜົນຍິ່ງຂຶ້ນ ໂດຍສະເພາະການສົ່ງເສີມການຄ້າ ແລະ ການລົງທຶນ ໃນຂະແໜງກະສິກຳ,ພະລັງງານ, ການບໍລິການ ແລະ ທ່ອງທ່ຽວ ລະຫວ່າງສອງປະເທດ ກໍຄື ການສົ່ງເສີມການໄປມາຫາສູ່ ລະຫວ່າງປະຊາຊົນສອງຊາດ ໃຫ້ນັບມື້ນັບຫຼາຍຂຶ້ນ.
ໃນໂອກາດດຽວກັນນີ້, ສົມເດັດ ຊຸນຕານ ແຫ່ງ ບຣູໄນ ໄດ້ເຊື້ອເຊີນ ພະນະທ່ານ ສອນໄຊ ສີພັນດອນ ເດີນທາງຢ້ຽມຢາມບຣູໄນ ຢ່າງເປັນທາງການ ໃນໂອກາດທີ່ສອງຝ່າຍມີຄວາມສະດວກ ແລະ ຍິນດີສືບຕໍ່ຊຸກຍູ້ການຮ່ວມມືອັນດີກັບ ສປປ ລາວ ໃນດ້ານຕ່າງໆ ໃນຊຸມປີຕໍ່ໜ້າ. ໃນຂະນະດຽວກັນ, ຝ່າຍລາວ ໄດ້ສະແດງຄວາມຂອບໃຈຕໍ່ການເຊື້ອເຊີນ ແລະ ສະແດງຄວາມຊົມເຊີຍຕໍ່ແຜນການຈັດກອງປະຊຸມຄະນະກຳມາທິການຮ່ວມວ່າດ້ວຍການຮ່ວມມືສອງຝ່າຍ ລາວ-ບຣູໄນ ຄັ້ງທີ 5 ໃນປີ 2026 ຊຶ່ງຝ່າຍບຣູໄນຈະເປັນເຈົ້າພາບ, ພ້ອມທັງສະແດງຄວາມຫວັງວ່າ ຈະໄດ້ຕ້ອນຮັບສົມເດັດ ຊຸນຕານ ແລະ ສົມເດັດ ພະລາຊິນີ ແຫ່ງ ບຣູໄນ ດາຣູຊາລາມ ເດີນທາງຢ້ຽມຢາມ ສປປ ລາວ ໃນອະນາຄົດ.
(ຂ່າວ: ກຕທ)
ຄໍາເຫັນ