 |
ກອງປະຊຸມເວທີອະນາຄົດອາຊຽນ ໄດ້ຈັດຕິດຕໍ່ກັນເປັນປີທີສາມ ເພື່ອສືບຕໍ່ປຶກສາຫາລືບັນຫາພົ້ນເດັ່ນ ທີ່ສົ່ງຜົນກະທົບຕໍ່ພາກພື້ນ ແລະ ສາກົນ, ລວມເຖິງກາລະໂອກາດ ແລະ ສິ່ງທ້າທາຍທີ່ອາຊຽນ ກຳລັງປະສົບພົບພໍ້ຢູ່ໃນປັດຈຸບັນ, ລະດົມແນວຄວາມຄິດ ແລະ ກິດຈະກຳ ເພື່ອຮັດແໜ້ນຄວາມສາມັກຄີ, ຄວາມເຂັ້ມແຂງ ແລະ ຄວາມເປັນແກນກາງຂອງອາຊຽນ ຊຶ່ງຈະເປັນການປະກອບສ່ວນໃນການບັນລຸເປົ້າໝາຍ ວິໄສທັດປະຊາຄົມອາຊຽນ 2045 ແລະ ສົ່ງເສີມ ສັນຕິພາບ, ສະຖຽນລະພາບ ແລະ ຄວາມສົມບູນພູນສຸກໃນພາກພື້ນ ໂດຍປິ່ນອ້ອມຫົວຂໍ້ຕ່າງໆຄື: 1) ຄວາມເຂັ້ມແຂງ ແລະ ຄວາມສາມັກຄີ ໃນທ່າມກາງການປ່ຽນແປງຂອງໂລກ, 2) ການສົ່ງເສີມຂໍ້ລິເລີ່ມຂອງອາຊຽນ ໃນການຕ້ານຂໍ້ຂັດແຍ່ງ ແລະ 3) ການນຳໃຊ້ປັນຍາປະດິດໃນອາຊຽນ: ບໍ່ຖິ້ມໃຜໄວ້ທາງຫຼັງ; 4) ຮູບແບບການພັດທະນາ ໃນທ່າມ ກາງການປ່ຽນແປງຂອງໂລກ ແລະ 5) ເພີ່ມທະວີຄວາມໝັ້ນຄົງດ້ານພະລັງງານ ໃນສະພາບການໃໝ່.
 |
ໃນໂອກາດເຂົ້າຮ່ວມກອງປະຊຸມໃນຄັ້ງນີ້, ພະນະທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ໃຫ້ກຽດກ່າວຄໍາເຫັນໃນພິທີເປີດຂອງກອງປະຊຸມດັ່ງກ່າວ ທີ່ຈັດຂຶ້ນໃນຕອນເຊົ້າຂອງວັນທີ 9 ມິຖຸນາ 2026 ຮ່ວມກັບ ນາຍົກລັດຖະມົນຕີຫວຽດນາມ, ນາຍົກລັດຖະມົນຕີ ກຳປູເຈຍ, ນາຍົກລັດຖະມົນຕີ ໄທ, ນາຍົກລັດຖະມົນຕີ ຕີມໍ ແລັດສະເຕ ແລະ ເລຂາທິການໃຫຍ່ອາຊຽນ ກ່ຽວກັບ ວິໄສທັດສຳລັບອະນາຄົດຂອງ ປະຊາຄົມອາຊຽນ.
 |
ໃນນັ້ນ, ພະນະທ່ານ ນາຍົກລັດຖະມົນຕີ ໄດ້ເນັ້ນຄວາມຈຳເປັນ ໃນການສືບຕໍ່ຮັກສາຄວາມສາມັກຄີພາຍໃນອາຊຽນ ແລະ ຮັດແໜ້ນຄວາມເປັນແກນກາງຂອງອາຊຽນ ເພື່ອກຽມພ້ອມຮັບມືກັບສິ່ງທ້າທາຍຕ່າງໆ ໃນສະພາບທີ່ຫຼາຍພາກພື້ນໃນໂລກ ຍັງສືບຕໍ່ຜັນແປຢ່າງໄວວາ ອັນໄດ້ສົ່ງຜົນກະທົບຕໍ່ ຄວາມໝັ້ນຄົງດ້ານພະລັງງານ ແລະ ການຮັບປະກັນສະບຽງອາຫານຂອງໂລກ, ຍົກສູງຄວາມເຂັ້ມແຂງຂອງອາຊຽນ ຢ່າງຮອບດ້ານ ໂດຍການພັດທະນາດ້ານເຕັກໂນໂລຊີ, ດີຈີຕອນ, ປັນຍາປະດິດ ໂດຍໝູນໃຊ້ເຂົ້າໃນຂົງເຂດການຮ່ວມມືດ້ານກະສິກໍາ ແລະ ການພັດທະນາກະສິກໍາອັດສະລິຍະ ຊຶ່ງຈະປະກອບສ່ວນເຂົ້າໃນການຮັບປະກັນຄວາມໝັ້ນຄົງດ້ານສະບຽງອາຫານໃນອະນາຄົດ, ເພີ່ມທະວີການຮ່ວມມືດ້ານການເຊື່ອມໂຍງ-ເຊື່ອມຈອດຢ່າງຮອບດ້ານ ເພື່ອອຳນວຍຄວາມສະດວກດ້ານການຄ້າ ແລະ ຮັບປະກັນໃຫ້ແກ່ການສະໜອງຕ່ອງໂສ້ການຜະລິດ ແລະ ເພີ່ມທະວີການຮ່ວມມືພາຍໃນອາຊຽນ ໃນການຮັບປະກັນຄວາມໝັ້ນຄົງດ້ານພະລັງງານ.
 |
ໃນໂອກາດນີ້, ພະນະທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ຍັງໄດ້ຢ້ຽມຢາມທາງການ ເພື່ອປຶກສາຫາລືກ່ຽວກັບການຮັດແໜ້ນການຮ່ວມມືສອງຝ່າຍນໍາກັນກັບ ສສ ຫວຽດ ນາມ.
(ຂ່າວ: ກຕທ)
ຄໍາເຫັນ