 |
ເພື່ອເປັນການສືບຕໍ່ຜັນຂະຫຍາຍ ແລະ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ X ແລະ ຍຸດທະສາດການພັດທະນາຊາວໜຸ່ມ-ເຍົາວະຊົນ ຮອດປີ 2030 ໃຫ້ມີປະສິດທິຜົນສູງສຸດ, ເພື່ອໃຫ້ສະມາຄົມນັກທຸລະກິດໜຸ່ມລາວ ນໍາໄປຈັດຕັ້ງຜັນຂະຫຍາຍ, ສະນັ້ນ ທ່ານນາຍົກ ໄດ້ໂອ້ລົມເນັ້ນໜັກບາງບັນຫາໃຫ້ ສທໜລ ເອົາໃຈໃສ່ຕື່ມຄື: ໜຶ່ງ, ຍົກສູງສະຕິການເມືອງ, ເຕົ້າໂຮມຄວາມສາມັກຄີ ແລະ ຍູ້ແຮງການຮ່ວມທຶນໃນການປະຕິບັດໂຄງການໃດໜຶ່ງຕົວຈິງ ໃຫ້ເປັນຮູບປະທໍາ: ນັກທຸລະກິດໜຸ່ມທຸກຄົນຕ້ອງເປັນເຈົ້າການຍົກສູງສະຕິເປັນແບບຢ່າງໃນການອຸທິດຕາມອຸດົມການທີ່ໜັກແໜ້ນ, ເຊື່ອມຊຶມ ແລະ ປະຕິບັດຕາມແນວທາງນະໂຍບາຍຂອງພັກ, ມີສະຕິເຄົາລົບ ແລະ ປະຕິບັດກົດໝາຍແຫ່ງ ສປປ ລາວ ຢ່າງເຂັ້ມງວດ, ພ້ອມທັງ ຖືເອົາວຽກງານການພັດທະນາຊົນນະບົດ ເປັນເປົ້າໝາຍຮີບດ່ວນ ແລະ ແກ້ໄຂຄວາມທຸກຍາກ ຂອງປະຊາຊົນ ເປັນຄາດໝາຍສໍາຄັນບຸລິມະສິດແຖວໜ້າ ດ້ວຍຍູ້ແຮງການຮ່ວມທຶນ ລະຫວ່າງ ນັກທຸລະກິດໜຸ່ມດ້ວຍກັນ, ການຮ່ວມທຶນລະຫວ່າງພາກເອກະຊົນ ກັບລັດວິສາຫະກິດ, ຊຸມຊົນ ແລະ ພາກລັດ ໂດຍລະດົມທຶນ, ຊັບສິນ, ເຕັກໂນໂລຊີ, ທີ່ດິນ ແລະ ແຮງງານ ເຂົ້າໃນໂຄງການພັດທະນາ ເສດຖະກິດ-ສັງຄົມ ແລະ ເຂົ້າຮ່ວມ ປະກອບສ່ວນເຂົ້າໃນການປະຕິບັດວາລະແຫ່ງຊາດ ວ່າດ້ວຍການພັດທະນາຊົນນະບົດ ແລະ ແກ້ໄຂຄວາມທຸກຍາກຢ່າງຕັ້ງໜ້າ ແລະ ແຂງແຮງ ເປັນຕົ້ນແມ່ນການປະຕິບັດ 5 ວຽກງານຈຸດສຸມຄື: ສ້າງອາຊີບ ແລະ ແຫຼ່ງລາຍຮັບ, ຈັດສັນພູມລໍາເນົາຂອງປະຊາຊົນໃຫ້ມີຄວາມໝັ້ນຄົງ ແລະ ຍືນຍົງ; ພັດທະນາໂຄງລ່າງພື້ນຖານ ແລະ ສິ່ງອໍານວຍຄວາມສະດວກຢູ່ຊົນນະບົດ; ສ້າງຄວາມເຂັ້ມແຂງໃຫ້ແກ່ຄະນະກໍາມະການປົກຄອງຕາແສງ, ການຈັດຕັ້ງບ້ານ ແລະ ຊາວຊົນນະບົດ; ຂົນຂວາຍ ແລະ ຍາດແຍ່ງການລົງທຶນ ເຂົ້າໃສ່ການພັດທະນາຊົນນະບົດ; ສ້າງ ແລະ ປັບປຸງນິຕິກໍາ, ກົນໄກການຈັດຕັ້ງປະຕິບັດ ວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກໃຫ້ມີປະສິດທິຜົນ. ໃຫ້ສະມາຄົມຄົ້ນຄວ້າ ແລະ ມີສ່ວນຮ່ວມໃນການລົງທຶນພື້ນຖານໂຄງລ່າງ ທີ່ເປັນຈຸດສຸມຍຸດທະສາດ ຂອງລັດຖະບານ ເຊັ່ນ: ເສັ້ນທາງດ່ວນ, ເສັ້ນທາງລົດໄຟຄວາມໄວສູງ, ຂົວ ແລະ ລະບົບການເຊື່ອມຈອດທັງພາຍໃນ ແລະ ຕ່າງປະເທດ. ການລົງທຶນທຸກຢ່າງຕ້ອງຕິດພັນກັບມາດຕະຖານປົກປັກຮັກສາສິ່ງແວດລ້ອມສັງຄົມ, ສ້າງຄວາມເຂັ້ມແຂງໃຫ້ຊຸມຊົນ ໂດຍໃຫ້ບ້ານເປັນຮຸ້ນສ່ວນ ແລະ ແບ່ງປັນຜົນກໍາໄລຢ່າງເປັນທໍາ ເພື່ອຫຼຸດຜ່ອນຄວາມທຸກຍາກຕົວຈິງ. ສອງ, ເສີມຂະຫຍາຍກົນໄກການຮ່ວມມືລະຫວ່າງ ພາກລັດ ແລະ ພາກເອກະຊົນ ເພື່ອຂັບເຄື່ອນເສດຖະກິດແຫ່ງຊາດ ໂດຍສຸມໃສ່ 7 ຂະແໜງເສດຖະກິດ ທີ່ເປັນບຸລິມະສິດ ເຊັ່ນ: ພະລັງງານສະອາດ; ກະສິກໍາສະອາດ ຕິດພັນກັບການແປຮູບ ແລະ ປຸງແຕ່ງ; ອຸດສາຫະກໍາປຸງແຕ່ງແຮ່ທາດ; ອຸດສາຫະກໍາປຸງແຕ່ງ ທີ່ເປັນຕ່ອງໂສ້ ແລະ ເພີ່ມມູນຄ່າ; ການບໍລິການຂົນສົ່ງ ແລະ ໂລຈິສຕິກ (ທ່າບົກ); ການບໍລິການທ່ອງທ່ຽວ; ການພັດທະນາເຕັກໂນໂລຊີ, ນະວັດຕະກໍາ, ປັນຍາປະດິດ ແລະ ຫັນເປັນດີຈີຕອນ. ລັດຖະບານມີນະໂຍບາຍເປີດກວ້າງ ແລະ ຍິນດີຕ້ອນຮັບການລະດົມທຶນ ພ້ອມທັງການນໍາໃຊ້ເຕັກໂນໂລຊີຈາກພາກເອກະຊົນ ໂດຍສະເພາະແມ່ນສະມາຄົມນັກທຸລະກິດໜຸ່ມລາວເຂົ້າໃນການລົງທຶນ, ດໍາເນີນ ງານ, ຄຸ້ມຄອງ ແລະ ບໍາລຸງຮັກສາພື້ນຖານໂຄງລ່າງ, ຂົງເຂດພະລັງງານ, ການຂົນສົ່ງ ແລະ ຂົງເຂດອື່ນໆ ເພື່ອແນໃສ່ຫຼຸດຜ່ອນພາລະໜີ້ສາທາລະນະ ແລະ ສ້າງວຽກເຮັດງານທໍາໃຫ້ແກ່ຊາວໜຸ່ມໃຫ້ກວ້າງຂວາງ. ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ X, ລັດຖະບານສືບຕໍ່ຖືເອົາພາກ ເອກະຊົນເປັນກໍາລັງຫຼັກ, ພ້ອມທັງ ປັບປຸງສະພາບແວດລ້ອມການດໍາເນີນທຸລະກິດໃຫ້ໂປ່ງໃສ, ຫຼຸດຜ່ອນຂັ້ນຕອນທີ່ຫຍຸ້ງຍາກ ແລະ ສ້າງກົນໄກປຶກສາຫາລືທີ່ຄ່ອງຕົວຂຶ້ນຕື່ມ; ສາມ, ສົ່ງເສີມຊາວໜຸ່ມສ້າງເສດຖະກິດ, ພັດທະນາແຫຼ່ງທຶນ ແລະ ຫັນເປັນດີຈີຕອນ. ສະມາຄົມນັກທຸລະກິດໜຸ່ມລາວ ຕ້ອງເປັນກໍາລັງແຮງໃນການຜັນຂະຫຍາຍຍຸດທະສາດການພັດທະນາຊາວໜຸ່ມ-ເຍົາວະຊົນ ແລະ ບັນດາບົດບັນທຶກຄວາມເຂົ້າໃຈ (MOU) ທີ່ສູນກາງຊາວໜຸ່ມ ໄດ້ເຊັນຮ່ວມກັບ ພາກສ່ວນຕ່າງໆ ທັງພາຍໃນ ແລະ ຕ່າງປະເທດ ໃຫ້ປະກົດຜົນເປັນຮູບປະທໍາ. ສຸມໃສ່ພັດທະນາແຮງງານໜຸ່ມໃຫ້ມີທັກສະສູງ ສາມາດເຂົ້າຕະຫຼາດແຮງງານໄດ້ຢ່າງທົ່ວເຖິງ, ຊຸກຍູ້ການເປັນຜູ້ປະກອບການໃນຂົງເຂດການປຸງແຕ່ງອາຫານ, ຜະລິດຕະພັນກະສິກໍາແບບຍືນຍົງ, ການຄ້າເອເລັກໂຕຣນິກ (E-Commerce), ການຂາຍສິນຄ້າອອນລາຍ, ການຈັດການສິ່ງເສດເຫຼືອ ແລະ ຫັດຖະກໍາ. ປູກຈິດສໍານຶກໃຫ້ຊາວໜຸ່ມຮັກການອອກແຮງງານ, ມີວິຊາຊີບສອດຄ່ອງກັບຄວາມຕ້ອງການຂອງຕະຫຼາດ, ພ້ອມທັງດຶງດູດແຮງງານໃຫ້ເຂົ້າມາເຮັດວຽກໃນປະເທດ ດ້ວຍນະໂຍບາຍຄ່າແຮງງານ ແລະ ເງື່ອນໄຂ ສະຫວັດດີການທີ່ເໝາະສົມ; ສີ່, ຍາດແຍ່ງການພົວພັນຮ່ວມມື ແລະ ການເຊື່ອມໂຍງສາກົນຢ່າງມີຍຸດທະສາດ: ການພົວພັນຮ່ວມມືກັບຕ່າງປະເທດ ໂດຍສະເພາະການຮັບເໝົາໂຄງການຕ່າງໆ ຕ້ອງປະຕິບັດຕາມກົດໝາຍວ່າດ້ວຍການສົ່ງເສີມການລົງທຶນ, ກົດໝາຍວ່າດ້ວຍການຮ່ວມທຶນລະຫວ່າງລັດ ແລະ ເອກະຊົນ ແລະ ລະບຽບກົດ ໝາຍອື່ນໆ ທີ່ກ່ຽວຂ້ອງຢ່າງເຄັ່ງຄັດ.
ຂ່າວ: ຍຸພິນທອງ
ຄໍາເຫັນ