ນາຍົກລັດຖະມົນຕີ ຕ້ອນຮັບການເຂົ້າຢ້ຽມຂໍ່ານັບຂອງເອກອັກຄະຣາຊະທູດຍີ່ປຸ່ນ

ທ່ານນາຍົກລັດຖະມົນຕີ ໄດ້ກ່າວສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການພົວພັນຮ່ວມມື ລະຫວ່າງ ສອງປະເທດ ລາວ-ຍີ່ປຸ່ນ ກໍຄືການຈັດຕັ້ງຜັນຂະຫຍາຍການເປັນຄູ່ຮ່ວມຍຸດທະສາດຮອບດ້ານ ລາວ-ຍີ່ປຸ່ນ ພ້ອມທັງສະແດງຄວາມຂອບໃຈຕໍ່ການຮ່ວມມື ແລະ ຊ່ວຍເຫຼືອອັນລໍ້າຄ່າຂອງລັດຖະບານ ກໍຄືປະຊາຊົນຍີ່ປຸ່ນ ໃຫ້ແກ່ ສປປ ລາວ ຕະຫຼອດໄລຍະຜ່ານມາ ຊຶ່ງໄດ້ປະກອບສ່ວນສໍາຄັນເຂົ້າໃນການພັດທະນາເສດຖະກິດ-ສັງຄົມ ມີການຂະຫຍາຍຕົວຢ່າງຕໍ່ເນື່ອງ ໂດຍສະເພາະໃນຂົງເຂດວຽກງານການພັດທະນາຊັບພະຍາກອນມະນຸດ, ໂຄງລ່າງພື້ນຖານ, ສາທາລະນະສຸກ, ກະສິກໍາ-ປ່າໄມ້, ການສົ່ງຊ່ຽວຊານ ແລະ ອາສາສະໝັກຍີ່ປຸ່ນມາປະຕິບັດໜ້າທີ່ ຢູ່ ສປປ ລາວ. ພິເສດແມ່ນການຊ່ວຍເຫຼືອເກັບກູ້ລະເບີດບໍ່ທັນແຕກທີ່ຕົກຄ້າງ (UXO) ຢູ່ ສປປ ລາວ. ລັດຖະບານລາວ ຈະຮ່ວມກັບລັດຖະບານຍີ່ປຸ່ນ ສືບຕໍ່ຊຸກຍູ້ສົ່ງເສີມການໄປມາຫາສູ່ຊຶ່ງກັນ ແລະ ກັນ ຂອງປະຊາຊົນສອງຊາດ ເພື່ອຜັນຂະຫຍາຍສົນທິສັນຍາທາງອາກາດສອງຝ່າຍທີ່ໄດ້ລົງນາມຮ່ວມກັນໃນປີ 2015 ໃຫ້ເປັນຮູບປະທໍາຫຼາຍຂຶ້ນ. ໃນໂອກາດດັ່ງກ່າວ, ທ່ານນາຍົກລັດຖະມົນຕີ ໄດ້ຝາກຄວາມຢື້ຢາມຖາມຂ່າວ ແລະ ເຊື້ອເຊີນທ່ານນາຍົກລັດຖະມົນຕີຍີ່ປຸ່ນ ເດີນທາງມາຢ້ຽມຢາມ ສປປ ລາວ ໃນເວລາທີ່ເໝາະສົມ.

ໃນໂອກາດດຽວກັນນີ້, ທ່ານ ໂຄອິຊຶມິ ຊຶໂຕະມຸ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນຂອງທ່ານ ນາຍົກລັດຖະມົນຕີ ໃນຄັ້ງນີ້ ພ້ອມທັງແຈ້ງໃຫ້ຊາບກ່ຽວ ການກະກຽມຄວາມພ້ອມກອງປະຊຸມສາກົນ ວ່າດ້ວຍອະນາຄົດຂອງອາຊີ ຄັ້ງທີ 31, ຄວາມຄືບໜ້າການປັບປຸງ-ກໍ່ສ້າງສະໜາມກິລາເຈົ້າອານຸວົງ ແລະ ການປັບປຸງສະໜາມບິນສາກົນວັດໄຕ ເພື່ອປະກອບສ່ວນພັດທະນາໂຄງລ່າງພື້ນຖານ ຂອງ ສປປ ລາວ ໃຫ້ນັບມື້ດີຂຶ້ນ ໂດຍສະເພາະການເຊື່ອມໂຍງ-ເຊື່ອມຈອດກັບພາກພື້ນ ແລະ ສາກົນ. ນອກນັ້ນ, ຍັງໄດ້ສົນທະນາແລກປ່ຽນຄໍາຄິດເຫັນກ່ຽວກັບສະພາບການພັດທະນາເສດຖະກິດ-ສັງຄົມ ໂດຍສະເພາະ ບັນດາທ່າແຮງ ແລະ ສິ່ງທ້າທາຍຕ່າງໆ ໃນປັດຈຸບັນກໍຄືອະນາຄົດ.

(ຂ່າວ-ພາບ: ກົມປະຊາສຳພັນ ຫສນຍ)