ນາຍົກຢ້ຽມຢາມໃຫ້ກຳລັງໃຈ ແລະ ມອບເຄື່ອງຊ່ວຍເຫຼືອຜູ້ປະສົບໄພນ້ຳຖ້ວມຢູ່ເມືອງປະທຸມພອນ

ທ່ານນາງ ປະທຸມມາ ແກ້ວມະນີ ຮອງປະທານຄະນະກຳມະການປົກຄອງເມືອງປະທຸມພອນລາຍງານໃຫ້ຮູ້ວ່າ: ຈາກສະພາບຝົນຕົກໜັກໃນໄລຍະວັນທີ 10-20 ສິງຫາ 2026 ເຮັດໃຫ້ນໍ້າຂອງ ແລະ ນໍ້າຫ້ວຍສາຂາເພີ່ມລະດັບສູງຂຶ້ນຢ່າງວ່ອງໄວສົ່ງຜົນກະທົບຕໍ່ປະຊາຊົນ 28 ບ້ານ, 877 ຄອບຄົວ, 3,801ຄົນ ຊຶ່ງເຂດທີ່ໄດ້ຮັບຜົນກະທົບໜັກແມ່ນເຂດຕາແສງປະທຸມພອນຖືກນໍ້າຖ້ວມໜັກ 13 ບ້ານ, ຖ້ວມເນື້ອທີ່ນາ 800 ກວ່າເຮັກຕາ, ສວນມັນຕົ້ນ 70 ເຮັກຕາ, ສວນໝາກນາວ 34 ເຮັກຕາ, ສວນຢາງພາລາ 7 ເຮັກຕາ, ເສັ້ນທາງ 14 ເສັ້ນ ແລະ ອື່ນໆ. ຕໍ່ສະພາບການດັ່ງກ່າວ, ຄະນະກຳມະການຄຸ້ມຄອງໄພພິບັດຂັ້ນເມືອງໄດ້ສົມທົບກັບກຳລັງປ້ອງກັນຊາດ-ປ້ອງກັນຄວາມສະຫງົບ ແລະ ພາກສ່ວນທີ່ກ່ຽວຂ້ອງລົງຍົກຍ້າຍປະຊາຊົນ, ສັດລ້ຽງ ແລະ ຊັບສິນໄປຢູ່ບ່ອນທີ່ປອດໄພ, ພ້ອມທັງກະກຽມພ້ອມເຮືອຈັກ 1,000 ກວ່າລໍາ, ພາຫະນະ 16 ຄັນ ແລະ ກໍານົດຈຸດອົບພະຍົບ 18 ຈຸດ ເພື່ອຮັບມືກັບ 26 ບ້ານທີ່ມີຄວາມສ່ຽງໄພ.

ໃນໂອກາດດັ່ງກ່າວ, ທ່ານນາຍົກລັດຖະມົນຕີໄດ້ໃຫ້ກຽດພົບປະໂອ້ລົມ ແລະ ໃຫ້ກຳລັງໃຈປະຊາຊົນ ໂດຍສະເພາະຍາມໃດພັກ ແລະ ລັດຖະບານກໍໄດ້ຕິດຕາມສະພາບ ແລະ ຊີ້ນຳວຽກງານຂອງທ້ອງຖິ່ນຢ່າງໃກ້ຊິດ ແລະ ເປັນປົກກະຕິ, ເມື່ອຮັບຊາບບັນຫາທີ່ເກີດຂຶ້ນແມ່ນໄດ້ຊີ້ນໍາຂະແໜງການທີ່ກ່ຽວຂ້ອງຂັ້ນສູນກາງ ແລະ ທ້ອງຖິ່ນຮີບຮ້ອນໃຫ້ການຊ່ວຍເຫຼືອ ແລະ ແກ້ໄຂຄວາມຫຍຸ້ງຍາກດ້ານຕ່າງໆຢ່າງທັນການເປັນຕົ້ນດ້ານກຳລັງ, ພາຫະນະ, ວັດຖຸອຸປະກອນ, ງົບປະມານ ແລະ ອື່ນໆ. ສະນັ້ນໃນຍາມພົບກັບຄວາມຫຍຸ້ງຍາກຄືແນວນີ້ແມ່ນໃຫ້ເອົາໃຈໃສ່ເພີ່ມທະວີຄວາມສາມັກຄີຊ່ວຍເຫຼືອຊຶ່ງກັນ ແລະ ກັນ; ໃຫ້ມີສະຕິລະວັງຕົວ, ຕິດຕາມສະພາບດິນຟ້າອາກາດຢ່າງໃກ້ຊິດ, ກະກຽມຄວາມພ້ອມດ້ານຕ່າງໆເພື່ອຮັບມືກັບຄວາມສ່ຽງຕ່າງໆທີ່ອາດເກີດຂຶ້ນຕື່ມໃນຕໍ່ໜ້າຢ່າງທັນການ; ເອົາໃຈໃສ່ຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍໃນສັງຄົມ, ມີສະຕິຕໍ່ກຸ່ມຄົນຂີ້ລັກງັດແງະ ຊຶ່ງອາດສວຍໂອກາດໃນຍາມຫຍຸ້ງຍາກນີ້; ກະກຽມຄວາມພ້ອມດ້ານຕ່າງໆເພື່ອທຳການຜະລິດທົດແທນພາຍຫຼັງນໍ້າບົກແຫ້ງ ແລະ ໝົດເຂດໄລຍະຄວາມສ່ຽງ; ໃຫ້ປະຊາຊົນເອົາໃຈໃສ່ຮັກສາສຸຂະອະນາໄມ, ໃຫ້ແພດ-ໝໍຕິດຕາມເບິ່ງແຍງສຸຂະພາບຂອງປະຊາຊົນຢ່າງໃກ້ຊິດ, ລວມທັງການປ້ອງກັນພະຍາດຕາມລະດູການ. ໃນຕໍ່ໜ້າໃຫ້ເອົາໃຈໃສ່ນຳໃຊ້ທ່າແຮງບົ່ມຊ້ອນຂອງທ້ອງຖິ່ນເຂົ້າໃນການພັດທະນາເສດຖະກິດ-ສັງຄົມໃຫ້ເກີດປະໂຫຍດສູງສຸດຕາມທິດສ້າງເສດຖະກິດເອກະລາດເປັນເຈົ້າຕົນເອງໃນໄລຍະໃໝ່ໃຫ້ແຂງແຮງ ແລະ ປະກົດຜົນເປັນຈິງ.

ຫຼັງຈາກນັ້ນ, ທ່ານນາຍົກລັດຖະມົນຕີໄດ້ມອບເງິນ ແລະ ເຄື່ອງອຸປະໂພກ-ບໍລິໂພກຈຳນວນໜຶ່ງໃຫ້ແກ່ອົງການປົກຄອງເມືອງ ແລະ ຕາແສງປະທຸມພອນ ເພື່ອນຳໄປຊ່ວຍເຫຼືອປະຊາຊົນ ແລະ ແກ້ໄຂຄວາມຫຍຸ້ງຍາກຕ່າງໆ.

(ຂ່າວ-ພາບ: ກົມປະຊາສຳພັນຫສນຍ)