 |
ໃຫ້ກຽດເຂົ້າຮ່ວມໃນງານຄັ້ງນີ້ ມີທ່ານ ພົອ ວິໄລ ຫຼ້າຄຳຟອງ ກຳມະການກົມການເມືອງສູນກາງພັກ ຜູ້ປະຈໍາການຄະນະເລຂາທິການສູນກາງພັກ, ທ່ານ ເພັດ ພົມພິພັກ ກຳມະການກົມການເມືອງສູນກາງພັກ ຄະນະເລຂາທິການສູນກາງພັກ ຫົວໜ້າຫ້ອງວ່າການສູນກາງພັກ, ທ່ານ ພົອ ຄໍາລຽງ ອຸທະໄກສອນ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນປະເທດ, ທ່ານນາງ ສູນທອນ ໄຊຍະຈັກ ຄະນະເລຂາທິການສູນກາງພັກ ຮັກສາການແທນປະທານສະພາແຫ່ງຊາດ, ທ່ານ ພົທ ວັນທອງ ກອງມະນີ ຄະນະເລຂາທິການສູນກາງພັກ ລັດຖະມົນຕີກະຊວງປ້ອງກັນຄວາມສະຫງົບ ພ້ອມນີ້ ຍັງມີ ອະດີດການນຳຂັ້ນສູງຂອງພັກ - ລັດ ສປປ ລາວ, ທ່ານ ທູຕານຸທູດ, ແຂກຜູ້ມີກຽດ ທັງພາຍໃນ ແລະ ຕ່າງປະເທດ ເຂົ້າຮ່ວມຢ່າງພ້ອມພຽງ.
 |
ໃນພິທີ, ທ່ານ ນາງ ຟາງ ຮົງ ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປ ຈີນ ປະຈໍາ ສປປ ລາວ ໄດ້ກ່າວເນັ້ນເຖິງຜົນສຳເລັດອັນຍິ່ງໃຫຍ່ຂອງ ສປ ຈີນ ຕະຫຼອດ 77 ປີຜ່ານມາ ພາຍໃຕ້ການນຳພາອັນສະຫຼາດສ່ອງໃສຂອງພັກກອມມູນິດຈີນ (ຊຶ່ງປີນີ້ຄົບຮອບ 105 ປີ). ຈີນໄດ້ປ່ຽນ ແປງຕົນເອງຈາກປະເທດທີ່ທຸກຍາກ ກາຍເປັນເສດຖະກິດໃຫຍ່ອັນດັບ 2 ຂອງໂລກ, ຍອດຜະລິດຕະພັນພາຍໃນ (GDP) ໃນປີ 2025 ບັນລຸເຖິງ 140.2 ຮ້ອຍລ້ານຢວນ, ສຳເລັດ “ແຜນການ 5 ປີ ຄັ້ງທີ 14” ຢ່າງຈົບງາມ ແລະ ເລີ່ມຕົ້ນ “ແຜນການ 5 ປີ ຄັ້ງທີ 15” ດ້ວຍອັດຕາການເຕີບໂຕ 4.7% ໃນເຄິ່ງປີທຳອິດ. ພ້ອມທັງໄດ້ຢືນຢັນເຖິງຄວາມມຸ່ງໝັ້ນໃນການເປີດກວ້າງຕະຫຼາດ ແລະ ແບ່ງປັນໂອກາດການພັດທະນາໃຫ້ກັບທຸກປະເທດໃນໂລກ.
 |
ທ່ານ ນາງ ຟາງ ຮົງ ຍັງກ່າວຕື່ມວ່າ: ສຳລັບສາຍພົວພັນ ຈີນ-ລາວ, ໃນເດືອນມິຖຸນາ ປີນີ້, ສະຫາຍເລຂາທິການໃຫຍ່ ປະທານປະເທດ ສີ ຈິ້ນຜິງ ແລະ ສະຫາຍເລຂາທິການໃຫຍ່ ປະທານປະເທດ ທອງລຸນ ສີສຸລິດ ໄດ້ເຫັນດີເປັນເອກະພາບໃນການສ້າງ “ຄູ່ຮ່ວມຊາຕາກຳ ຈີນ-ລາວ ທີ່ເຂັ້ມແຂງໜຽວ ແໜ້ນໃນທຸກສະພາບການຂອງຍຸກໃໝ່”. ໝາກຜົນຂອງການຮ່ວມມືຕົວຈິງໄດ້ປະກົດໃຫ້ເຫັນຢ່າງຈະແຈ້ງ ເຊັ່ນ: ໂຄງການລົດໄຟ ລາວ-ຈີນ: ທີ່ຊ່ວຍອຳນວຍຄວາມສະດວກດ້ານການຄົມມະນາຄົມ ແລະ ສ້າງອາຊີບທີ່ໝັ້ນຄົງໃຫ້ຊາວໜຸ່ມລາວ, ການຫຼຸດຜ່ອນຄວາມທຸກຍາກ: ການຖ່າຍທອດເຕັກນິກການປູກຝັງຢູ່ບ້ານດອກຄຳ (ນະຄອນຫຼວງວຽງຈັນ) ເພື່ອຍົກລະດັບລາຍໄດ້ຂອງຊາວບ້ານ, ດ້ານສາທາລະນະສຸກ: ໂຄງການ “ແສງສະຫວ່າງ” ປິ່ນປົວຕາຕໍ້ໃຫ້ປະຊາຊົນລາວຫຼາຍພັນຄົນ ແລະ ການບໍລິການການແພດຢູ່ໂຮງໝໍມະໂຫສົດ, ດ້ານພະລັງງານ: ການເປີດນຳໃຊ້ໂຄງການເຊື່ອມຕໍ່ສາຍສົ່ງໄຟຟ້າ 500 ກິໂລໂວນ ຈີນ-ລາວ ທີ່ເພີ່ມຄວາມສາມາດແລກປ່ຽນໄຟຟ້າໄດ້ 1.5 ລ້ານກິໂລວັດ ແລະ ຊ່ວຍຫຼຸດຜ່ອນການປ່ອຍກາສກາກໂບນິກໄດ້ເຖິງ 2.5 ລ້ານໂຕນ, ໃນເວທີສາກົນ, ສອງປະເທດໄດ້ຮ່ວມມືກັນຢ່າງເຄັ່ງຮ້ອນໃນກົນໄກຫຼາຍຝ່າຍ ເຊັ່ນ: ສະຫະປະຊາຊາດ, ຈີນ-ອາຊຽນ ແລະ ການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ. ພ້ອມນີ້, ສປປ ລາວ ຍັງໄດ້ເຂົ້າຮ່ວມເປັນສະມາຊິກຜູ້ກໍ່ຕັ້ງອົງການຮ່ວມມືປັນຍາປະດິດໂລກ (WAICO) ໃນເດືອນກໍລະກົດ ປີນີ້ ຊຶ່ງເປັນການເພີ່ມພະລັງງານດ້ານບວກໃຫ້ກັບສັນຕິພາບ ແລະ ການພັດທະນາຂອງພາກພື້ນ.
ງານລ້ຽງໄດ້ປິດລົງດ້ວຍບັນຍາກາດອັນອົບອຸ່ນ, ເຕັມໄປດ້ວຍໄມຕີຈິດມິດຕະພາບ, ບັນດາຜູ້ເຂົ້າຮ່ວມໄດ້ຮ່ວມກັນຕຳຈອກອວຍພອນໃຫ້ ສປ ຈີນ ແລະ ສປປ ລາວ ມີຄວາມຈະເລີນຮຸ່ງເຮືອງ, ຮ່ວມກັນປົກປັກຮັກສາສັນຕິພາບ ແລະ ສ້າງສາອະນາຄົດອັນສົດໃສຮ່ວມກັນ. ຫຸ່ນຍົນ, ປັນຍາປະດິດສ້າງໃໝ່ ຊຶ່ງເປັນສາມຜະລິດຕະພັນໃໝ່ຂອງເສດຖະກິດການຄ້າຕ່າງປະເທດຈີນ ໄດ້ມີຊື່ສຽງໂດ່ງດັງໄປທົ່ວໂລກ.
(ຂ່າວ: ແສງຈັນ)
ຄໍາເຫັນ