 |
ທ່ານ ເດດສັກດາ ມະນີຄຳ ຮອງປະທານຄະນະກຳມະການປົກຄອງແຂວງຄໍາມ່ວນ ກ່າວໃນພິທີວ່າ: ການຈັດງານກິດຈະກຳນີ້ເປັນການທ້າທາຍທີ່ສອດຄ່ອງກັບສະພາບທຳມະຊາດ ແລະ ຈິດໃຈນັກກິລາ.“ຝົນບໍ່ແມ່ນອຸປະສັກ ແຕ່ເປັນສ່ວນໜຶ່ງຂອງບັນຍາກາດການແຂ່ງຂັນ. ພວກເຮົາຈະສູ້ຊົນໄປນຳກັນ ເພື່ອໃຫ້ກິດຈະກຳນີ້ປະສົບຜົນສຳເລັດ.”
ທ່ານກ່າວຕື່ມວ່າ: ການຈັດງານຄັ້ງນີ້ເປັນນິມິດໝາຍທີ່ດີໃນການສ້າງກະແສສົ່ງເສີມການທ່ອງທ່ຽວພາຍໃນແຂວງຄຳມ່ວນ ໂດຍເກີດຈາກການປະສານງານຂອງພະແນກວັດທະນະທຳ ແລະ ການທ່ອງທ່ຽວ, ຄະນະຈັດງານ, ພາກເອກະຊົນ ແລະ ບັນດາຜູ້ສະໜັບສະໜູນ ພ້ອມຍົກຍ້ອງບົດບາດຂອງທ່ານ ອິນທີ ເດືອນສະຫວັນ ໃນການຜັກດັນໃຫ້ກິດຈະກຳນີ້ເກີດຂຶ້ນ. ຫວັງວ່າການແຂ່ງຂັນຂີ່ລົດຖີບ ຮູບແບບນີ້ຈະກາຍເປັນກິດຈະກຳປະຈຳປີຂອງແຂວງຄຳມ່ວນ ແລະ ເມືອງທ່າແຂກ ເພື່ອສ້າງແຮງຈູງໃຈໃຫ້ນັກທ່ອງທ່ຽວ, ສົ່ງເສີມການອອກກຳລັງກາຍ ແລະ ພັດທະນາກິລາຄວບຄູ່ໄປກັບການທ່ອງທ່ຽວ.
ທ່ານ ອິນທີ ເດືອນສະຫວັນ ໃນນາມຜູ້ຈັດງານ ກ່າວວ່າ: ກິດຈະກຳນີ້ບໍ່ໄດ້ເນັ້ນການເອົາຊະນະພຽງຢ່າງດຽວ ແຕ່ເປັນເວທີໃຫ້ນັກຂີ່ລົດຖີບ ໄດ້ທົດສອບຂີດຄວາມສາມາດຂອງຕົນເອງ ຜ່ານເສັ້ນທາງທ້າທາຍໃນໄລຍະ 50, 100 ແລະ 200 ກິໂລແມັດ.
“ນອກຈາກການສົ່ງເສີມສຸຂະພາບແລ້ວ ງານນີ້ຍັງເປັນການໂຄສະນາການທ່ອງທ່ຽວຂອງແຂວງຄຳມ່ວນ ແລະ ສະແດງໃຫ້ເຫັນຄວາມທ້າທາຍຂອງເສັ້ນທາງທີ່ນັກຂີ່ລົດຖີບຈະໄດ້ພົບ.”
ທ່ານຍັງໄດ້ສະແດງຄວາມຂອບໃຈຕໍ່ນັກປັ່ນທີ່ເດີນທາງມາຈາກນະຄອນຫຼວງວຽງຈັນ, ແຂວງຈຳປາສັກ, ສະຫວັນນະເຂດ ລວມເຖິງນັກກິລາຈາກປະເທດຝຣັ່ງ, ຟີລິບປິນ ແລະ ໄທ ທີ່ເດີນທາງມາຮ່ວມກິດຈະກຳ ຊຶ່ງສະທ້ອນໃຫ້ເຫັນເຖິງການເຕີບໂຕຂອງວົງການຂີ່ລົດຖີບໃນລາວ ແລະ ຄວາມສົນໃຈຈາກນານາຊາດ.
ກິດຈະກຳນີ້ຈະເປັນຈຸດເລີ່ມຕົ້ນທີ່ສຳຄັນ ເພື່ອໃຫ້ໃນອະນາຄົດ ແຂວງຄຳມ່ວນສາມາດຕ້ອນຮັບນັກກິລາຂີ່ລົດຖີບຈາກທົ່ວປະເທດ ແລະ ນາໆຊາດໃຫ້ຫຼາຍຂຶ້ນ .ການຈັດງານ “ທ່າແຂກ ໄບລ໌ຄິງ ຊາເລນຈ໌ ຄັ້ງນີ້ ຈຶ່ງບໍ່ພຽງແຕ່ເປັນເວທີທົດສອບຄວາມສາມາດຂອງນັກຂີ່ລົດຖີບເທົ່ານັ້ນແຕ່ຍັງເປັນກົນໄກສຳຄັນໃນການຍົກລະດັບການທ່ອງທ່ຽວແບບກິລາ (Sports Tourism) ຂອງແຂວງຄຳມ່ວນ ພ້ອມເປັນພື້ນຖານໃຫ້ກາຍເປັນງານລະດັບນານາຊາດທີ່ຈັດຂຶ້ນເປັນປະຈຳໃນອະນາຄົດ.ຂ່າວ: ກອງຄໍາ
ຄໍາເຫັນ