ທ່ານ ໄກນະຄອນ ທຳມະວອນ ຮອງຫົວໜ້າຫ້ອງການຄະນະກຳມະການສົ່ງເສີມ ແລະ ຄຸ້ມຄອງການລົງທຶນ ນວ ໄດ້ລາຍງານສະພາບການພັດທະນາ, ການສົ່ງເສີມ ແລະ ການຄຸ້ມຄອງການລົງທຶນ ຢູ່ ນວ ໃນໂອກາດທີ່ແຂກຖືກເຊີນເຂົ້າຮ່ວມກອງປະຊຸມໃຫຍ່ ຄັ້ງທີ XII ຂອງພັກ ໄດ້ລົງຢ້ຽມຢາມເຂດພັດທະນາກວມລວມໄຊເສດຖາ ໃນວັນທີ 7 ມັງກອນນີ້ວ່າ: ປັດຈຸບັນ, ນວ ມີການລົງທຶນໃນເຂດເສດຖະກິດພິເສດທັງໝົດ 5 ແຫ່ງ; ມີເນື້ອທີ່ດິນຕາມສັນຍາສຳປະທານລວມ 2,360 ເຮັກຕາ. ນັບແຕ່ການສ້າງຕັ້ງຈົນເຖິງປັດຈຸບັນ ເຂດເສດຖະກິດພິເສດ ທັງ 5 ແຫ່ງ ສາມາດດຶງດູດການລົງທຶນຈາກພາຍໃນ ແລະ ຕ່າງປະເທດທັງໝົດ 300 ບໍລິສັດ; ໃນນັ້ນ, ບໍລິສັດຕ່າງປະເທດ 229 ບໍລິສັດ, ບໍລິສັດພາຍໃນ 46 ບໍລິສັດ ແລະ ບໍລິສັດຮ່ວມລົງທຶນພາຍໃນ–ຕ່າງປະເທດ 25 ບໍລິສັດ. ການລົງທຶນປະກອບມີຂະແໜງອຸດສາຫະກຳ 85 ບໍລິສັດ, ຂະແໜງການຄ້າ 99 ບໍລິສັດ ແລະ ຂະແໜງບໍລິການ 116 ບໍລິສັດມີທຶນລົງທຶນລວມ 6.7 ຕື້ກວ່າໂດລາ ແລະ ທຶນຈົດທະບຽນ 1.2 ຕື້ກວ່າໂດລາ. ພ້ອມນັ້ນ, ເຂດເສດຖະກິດພິເສດ ສາມາດປະຕິບັດພັນທະເຂົ້າງົບປະມານຂອງລັດ ໄດ້ 573 ຕື້ກວ່າກີບ; ມີແຮງງານທັງໝົດ 11,232 ຄົນ; ໃນນັ້ນ, ແຮງງານລາວ 7,953 ຄົນ ແລະ ແຮງງານຕ່າງປະເທດ 3,279 ຄົນ. ນອກຈາກນັ້ນ, ຍັງສາມາດສົ່ງອອກສິນຄ້າມູນຄ່າ 1.4 ຕື້ກວ່າໂດລາ ເຊັ່ນ: ເຄື່ອງເອເລັກໂຕຣນິກ, ເຄື່ອງນຸ່ງຫົ່ມ, ອຸປະກອນການແພດ, ຜະລິດຕະພັນຢາ, ອຸປະກອນໄຟຟ້າ, ຫົວອາຫານສັດ, ອາຫານສຳເລັດຮູບ, ເຄື່ອງດື່ມ ແລະ ອື່ນໆ.
ນອກຈາກການລົງທຶນໃນເຂດເສດຖະກິດພິເສດ, ຍັງມີການລົງທຶນໃນຂະແໜງສໍາປະທານ ແລະ ບັນຊີຄວບຄຸມຈຳນວນ 396 ໂຄງການ; ໂດຍໄດ້ເຊັນສັນຍາສຳປະທານ 42 ໂຄງການ (ຂັ້ນສູນກາງຄຸ້ມຄອງ 18 ໂຄງການ; ຂັ້ນ ນວ ຄຸ້ມຄອງ 24 ໂຄງການ). ນອກຈາກນັ້ນ, ນວ ຍັງໄດ້ເຊັນບົດບັນທຶກຄວາມເຂົ້າໃຈ ທັງໝົດ 35 ໂຄງການ; ກິດຈະການໃນບັນຊີຄວບຄຸມ ແລະ ໄດ້ອະນຸຍາດລົງທຶນຈໍານວນ 354 ໂຄງການ, (ຂັ້ນສູນກາງຄຸ້ມຄອງມີ 197 ໂຄງການ ແລະ ຂັ້ນ ນວ ຄຸ້ມຄອງ ມີ 157 ໂຄງການ).
ທ່ານ ໄກນະຄອນ ທຳມະວອນ ໃຫ້ຮູ້ຕື່ມວ່າ: ທິດທາງໃນຕໍ່ໜ້າຈະເນັ້ນສົ່ງເສີມການຜະລິດກະສິກຳສະອາດ ເພື່ອສະໜອງພາຍໃນ ແລະ ສົ່ງອອກ; ນໍາໃຊ້ເຕັກໂນໂລຊີທັນສະໄໝ, ການຜະລິດແນວພັນພືດ-ສັດ, ເບ້ຍໄມ້ຕ່າງໆ, ການຜະລິດຝຸ່ນ-ປຸ໋ຍ ທີ່ມີຄຸນນະພາບສູງ ແລະ ສົ່ງເສີມໃຫ້ສ້າງອຸດສາຫະກຳເບົາ, ສ້າງຕັ້ງໂຮງຈັກ-ໂຮງງານ ທັນສະໄໝ ເປັນມິດກັບສິ່ງແວດລ້ອມ; ສົ່ງເສີມໃຫ້ມີລະບົບຂົນສົ່ງໂລຈິສຕິກ ທີ່ທັນສະໄໝ ເພື່ອອໍານວຍຄວາມສະດວກໃຫ້ການແລກປ່ຽນສິນຄ້າ, ສ້າງກິດຈະການທ່ອງທ່ຽວທີ່ຫຼາກຫຼາຍ ແລະ ການບໍລິການທ່ອງທ່ຽວທີ່ມີ, ສົ່ງເສີມໃຫ້ມີການລົງທຶນ ແລະ ພັດທະນາໃນເຂດເສດຖະກິດພິເສດ ທັງ 5 ແຫ່ງ ຕາມແຕ່ລະກິດຈະການ ທີ່ໄດ້ລະບຸໃນສັນຍາສໍາປະທານ ເປັນຕົ້ນອະສັງຫາລິມະຊັບ, ອຸດສາຫະກຳສະອາດ, ໂຮງຮຽນ, ໂຮງແຮມ, ໂຮງໝໍ, ການຄ້າ, ການບໍລິການຕ່າງໆ; ສົ່ງເສີມການເປີດໂອກາດ ໃຫ້ຜະລິດຕະພັນສິນຄ້າຂອງລາວ ເຂົ້າໄປໃນຕະຫຼາດ ສປ ຈີນ ໃຫ້ມີຄວາມຫຼາກຫຼາຍຍິ່ງຂຶ້ນ.
(ຂ່າວ-ພາບ: ບຸນອູ້ມ)
ຄໍາເຫັນ