ທ່ານ ຫຸມແພງ ສີສົມບັດ ເລຂາຄະນະບໍລິຫານງານຊາວໜຸ່ມ ນວ ຫົວໜ້າອະນຸກໍາມະການກິດຈະກໍາເຍົາວະຊົນ ນວ ໄດ້ໃຫ້ສໍາພາດຕໍ່ສື່ມວນຊົນກ່ຽວກັບການກະກຽມກິດຈະກໍາຕັ້ງຄ້າຍເຍົາວະຊົນທົ່ວປະເທດ ໃນວັນທີ 4 ພະຈິກນີ້ ທີ່ຫ້ອງວ່າການ ນວ ວ່າ: ພາຍຫຼັງໄດ້ຮັບຂໍ້ຕົກລົງຂອງທ່ານເຈົ້າຄອງ ນວ ປະທານຈັດງານແຂ່ງຂັນກິລາມະຫະກຳແຫ່ງຊາດຄັ້ງທີ XII ລົງວັນທີ 16 ມັງກອນ 2025. ດັ່ງນັ້ນ, ຄະນະຮັບຜິດຊອບກິດຈະກໍາເຍົາວະຊົນ ກໍໄດ້ແຕ່ງຕັ້ງໜ່ວຍງານຝ່າຍຕ່າງຂຶ້ນ ເພື່ອແບ່ງໜ້າທີ່ຄວາມຮັບຜິດຊອບໃຫ້ໜ່ວຍງານ. ພ້ອມນີ້, ໜວ່ຍງານວິຊາສະເພາະ ກໍໄດ້ປະສານສົມທົບກັບກົມເຍົາວະຊົນສູນກາງຊາວໜຸ່ມ ເພື່ອຄົ້ນຄວ້າການກະກຽມດຳເນີນຕັ້ງຄ້າຍເຍົາວະຊົນທົ່ວປະເທດ. ຫຼັງຈາກນັ້ນ, ໄດ້ເປີດກອງປະຊຸມເພື່ອເອກະພາບເນື້ອໃນຮູບການການກະກຽມດຳເນີນຕັ້ງຄ້າຍເຍົາວະຊົນທົ່ວປະເທດຮ່ວມກັບ 17 ແຂວງ ໂດຍໄດ້ກໍານົດເນື້ອໃນກິດຈະກໍາມີ 2 ເນື້ອໃນກິດຈະກໍາຄື: ກິດຈະກໍາແຂ່ງຂັນປະກອບມີ 4 ກິດຈະກໍາເຊັ່ນ: ແຂ່ງຂັນປະດັບຄ້າຍເຍົາວະຊົນທັນວາ, ແຂ່ງຂັນຕີກອງດຸລິຍາງແປເປັນຕົວອັກສອນ, ແຂ່ງຂັນແຕ້ມຮູບ, ແຂ່ງຂັນການໂຕ້ວາທີ; ກິດຈະກຳແລກປ່ຽນປະກອບມີ 14 ກິຈະກໍາຄື: ກິດຈະກໍາຊອກຫາເພືອນແທ້ ແລະ ແນະນໍາຕົວເອງຂອງເຍົາວະຊົນ, ຮ້ອງເພງ, ຂັບລໍາ, ຟ້ອນລວມໝູ່, ສະແດງລະ ຄອນສັ້ນ, ກິລາແລ່ນ 3 ຂາ, ກິລາດຶງເຊືອກ, ຫັດກາຍຍະບໍລິຫານທຸກໆເຊົ້າ, ສວນສະໜາມພິທີເປີດ-ປິດ, ທັດສະນະສຶກສາຫໍມູນເຊື້ອຊາວໜຸ່ມ ແລະ ເຍົາວະຊົນ, ຫໍພິພິຕະພັນສິລະປະລາວ, ຫໍພິພິທະພັນປະ ທານໄກສອນ ພົມວິຫານ, ເຂດເສດຖະກິດພິເສດໄຊເສດຖາ, ສະຖານີດາວທຽມ ແລະ ສະຖານທີ່ເປັນເອກະລັກຂອງນວ, ເຂົ້າຢ້ຽມຂໍ່ານັບທ່ານ ທອງລຸນ ສີສຸລິດ ເລຂາທິການໃຫຍ່ ປະທານປະເທດແຫ່ງ ສປປ ລາວ, ຈັດກອງປະຊຸມຖອດຖອນບົດຮຽນໃນການຈັດງານພົບປະ-ຕັ້ງຄ້າຍເຍົາວະຊົນທັນວາ, ພິທີບາສີສູ່ຂວັນ ແລະ ຈັດພາເຂົ້າສາມັກຄີ ແລະ ກິດຈະກຳແຄ້ມໄຟ. ສໍາລັບເປົ້າໝາຍຜູ້ເຂົ້າຮ່ວມຄະນະປະທານ 22 ທ່ານ, ຄະນະຊີ້ນໍາລວມ 8 ທ່ານ, ຄະນະຮັບຜິດຊອບຈັດງານ ແລະ ສະມາຊິກເຍົາວະຊົນ432 ທ່ານ, ຄະນະກໍາມະການໃຫ້ຄະແນນໃນການຕັດສິນໃນການແຂ່ງຂັນ 12 ທ່ານ, ມີເຍົາວະຊົນແລະຜູ້ປົກຄອງເຂົ້າຮ່ວມທັງໝົດ 1,000 ກວ່າຄົນ.
ທ່ານ ຫຸມແພງ ສີສົມບັດ ກ່າວຕື່ມວ່າ: ຄາດຄະເນຜົນໄດ້ຮັບກິດຈະກໍາຄັ້ງນີ້, ເຍົາວະຊົນໄດ້ຮູ້ແບບແຜນ, ການເຄື່ອນໄຫວ, ໄດ້ແລກປ່ຽນຄວາມຮູ້ ຊຶ່ງກັນ ແລະ ກັນ, ມີຄວາມສາມັກຄີຮັກແພງ, ຮູ້ແບບແຜນການດຳລົງຊີວິດ, ມີແບບແຜນການເຄື່ອນໄຫວລວມໝູ່, ຮູ້ມູນເຊື້ອປະຫວັດສາດ ແລະ ໄດ້ຍົກລະດັບທາງດ້ານວິຊາການຂອງພະນັກງານຮັບຜິດຊອບວຽກງານເຍົາວະຊົນ-ອະນຸຊົນສູງຂຶ້ນ; ໄດ້ແລກປ່ຽນບົດຮຽນ, ສິລະປະ, ການແຂ່ງຂັນກິລາຂອງນ້ອງໆເຍົາວະຊົນ ແລະ ປະສົບການຕົວຈິງຂອງການນຳພາວຽກງານເຍົາວະຊົນ-ອະນຸຊົນ ລະຫວ່າງຜູ້ຮັບຜິດຊອບແຕ່ລະແຂວງ; ໄດ້ເຍົາວະຊົນດີເດັ່ນ, ເຍົາວະຊົນຕົວແບບຮຽນດີ-ຮຽນເກັ່ງ, ຝຶກຝົນຫຼໍ່ຫຼອມໃຫ້ໄດ້ພັດທະນາທາງດ້ານມັນສະໝອງມີແນວຄວາມຄິດເອື້ອເພື້ອເພື່ອແພ, ເປັນຄົນດີມີສິນທຳ ແລະ ຮໍ່າຮຽນແບບແຜນການດຳລົງຊີວິດຂອງຜູ້ນຳ; ໄດ້ເຍົາວະຊົນມີພອນສະຫວັນດີເດັ່ນ, ເກັ່ງທາງດ້ານທັກສະການປາກເວົ້າ, ການໂຄສະນາ, ການອະທິບາຍ ແລະ ມີແນວຄິດສ້າງສັນ.
ຂ່າວ-ພາບ: ວັນເພັງ
ຄໍາເຫັນ