 |
ໃນພິທີ, ສະຫາຍ ນາງ ວຽງພອນ ແກ້ວຄູນສີ ຄະນະບໍລິຫານງານພັກ ເລຂາໜ່ວຍພັກຮາກຖານ ຫົວໜ້າໂຮງຮຽນການເມືອງ ແລະ ການປົກຄອງ ນວ, ໄດ້ຜ່ານບົດສະຫຼຸບກ່ຽວກັບການຈັດຕັ້ງປະຕິບັດການຮຽນ-ການສອນທິດສະດີການເມືອງຂັ້ນກາງ ຮຸ່ນ ທີ 6 ຊຶ່ງໄດ້ເລີ່ມການຮຽນ-ການສອນມາແຕ່ວັນທີ 2 ກຸມພາ 2026 ໂດຍມີນັກສຶກສາເຂົ້າຮ່ວມ 57 ຄົນ ຍິງ 22 ຄົນ ທີ່ມາຈາກ 29 ພາກສ່ວນ ພາຍໃນ ນວ ມີ 13 ກຸ່ມວິຊາຮຽນ ແລະ ການລົງທັດສະນະສຶກສາ ແລະ ປ້ອງກັນບົດຈົບຊັ້ນ, ຜ່ານການຄົ້ນຄ້ວາຮໍ່າຮຽນ, ນັກສຶກສາສາມາດຍາດໄດ້ຜົນງານ ດ້ານການຮໍ່າຮຽນ ຊຶ່ງສະແດງອອກໃນການປະເມີນຜົນທັງໝົດ 15 ຄັ້ງ ເຫັນວ່າ ນັກສຶກສາທີ່ໄດ້ຄະແນນດີເລີດມີ 720 ຄະແນນ, ຄະແນນດີຫຼາຍ ມີ 283 ຄະແນນ ແລະ ໄດ້ຄະແນນດີ ມີ 13 ຄະແນນ ແລະ ຜົນງານດ້ານອື່ນໆ.
 |
ການຮຽນ-ການສອນຄັ້ງນີ້ ເພື່ອຍົກລະດັບຄວາມຮູ້ທິດສະດີການເມືອງ, ແນວຄິດ ໄກສອນ ພົມວິຫານ, ແນວທາງນະໂຍບາຍຂອງພັກ, ການຄຸ້ມຄອງຂອງລັດ ເຮັດໃຫ້ຜູ້ເຂົ້າຮຽນມີທັດສະນະຫຼັກໝັ້ນຊົນຊັ້ນກຳມະກອນ, ເຊື່ອໝັ້ນຕໍ່ການນຳພາຂອງພັກ, ເຊື່ອໝັ້ນຕໍ່ອຸດົມການ ກໍຄືພາລະກິດປົກປັກຮັກສາ ແລະ ສ້າງສາປະເທດຊາດ ກໍຄືພັດທະນາ ນວ ພ້ອມທັງສ້າງໃຫ້ພະນັກງານ-ລັດຖະກອນ ຢູ່ສູນກາງ ແລະ ນວ ໃຫ້ມີຄຸນທາດການເມືອງທີ່ໜັກແໜ້ນ, ມີຄວາມສາມາດໃນການຄຸ້ມຄອງ ແລະ ຈັດຕັ້ງປະຕິບັດຕາມແນວທາງນະໂຍບາຍຂອງພັກ ໃຫ້ມີຜົນສຳເລັດຢ່າງແທ້ຈິງ.
 |
ໃນໂອກາດດັ່ງກ່າວ ຍັງໄດ້ຜ່ານຂໍ້ຕົກລົງອະນຸມັດເປີດຊຸດຮຽນທິດສະດີການເມືອງຂັ້ນກາງ ຮຸ່ນທີ 7 ແລະ ມະຕິຕົກລົງເປີດຊຸດຮຽນທິດສະດີການເມືອງຂັ້ນຕົ້ນ ຮຸ່ນທີ 16, 18 ແລະ ຫົວຂໍ້ສະເພາະ ໜ່ວຍພັກຮາກຖານບ້ານ ຮຸ່ນທີ 14, 19 ພາຍໃນ ນວ ພ້ອມທັງຮັບຟັງທິດຊີ້ນຳຈາກ ສະຫາຍ ອານຸພາບ ຕຸນາລົມ ຊຶ່ງໄດ້ກ່າວສະແດງຄວາມຊົມເຊີຍຕໍ່ຜົນສໍາເລັດທີ່ຍາດມາໄດ້ ຕະຫຼອດໄລຍະການຮໍ່າຮຽນ, ຝຶກຝົນຫຼໍ່ຫຼອມດ້ານທິດສະດີ, ການຮຽນແມ່ນບັນຫາພື້ນຖານໃນການດໍາລົງຊີວິດຂອງພວກສະຫາຍ, ຂ້າພະເຈົ້າມີຄວາມເຊື່ອໝັ້ນວ່າ ພວກສະຫາຍຈະໄດ້ມີການປ່ຽນແປງພຶດຕິກໍາຕ່າງໆໃນການປະຕິບັດໜ້າທີ່ວຽກງານ, ສາມາດປ່ຽນແປງຈິນຕະນາການເກົ່າ ໄປສູ່ຈິນຕະນາການໃໝ່ທີ່ດີຍິ່ງໆຂຶ້ນ ເປັນຕົ້ນຈາກທີ່ບໍ່ເຄີຍເວົ້າຈາປາໄສຫຼ່ຽນໄຫຼ ຈະກາຍເປັນຜູ້ເວົ້າຈາປາໄສທີ່ຫຼ່ຽນໄຫຼເກັ່ງ ແລະ ໜ້າຟັງ ພ້ອມທັງມີທັກສະທີ່ດີຂຶ້ນ.
(ຂ່າວ: ແສງຈັນ)
ຄໍາເຫັນ