 |
ໃນພິທີໄດ້ຜ່ານບົດສະຫຼຸບ ຜົນງານການຈັດຕັ້ງປະຕິບັດວຽກງານການສຶກສາ ແລະ ກິລາ ໃນສົກຮຽນ 2025-2026 ທົ່ວ ນວ ມີໂຮງຮຽນທັງໝົດ 1,170 ແຫ່ງ, ມີນັກຮຽນ 215,833 ຄົນ. ຜົນການສອບເສັງຈົບຊັ້ນໃນສົກຮຽນທີ່ຜ່ານມາ, ສາມາດບັນລຸໂຕເລກທີ່ດີເດັ່ນ ຊັ້ນ ປ.5 ມີນັກຮຽນເສັງໄດ້ 99.85% (ໄດ້ຄະແນນ 9 ຂຶ້ນໄປ 839 ຄົນ), ຊັ້ນ ມ.4 ມີນັກຮຽນເສັງໄດ້ 99.98% (ໄດ້ປະກາສະນິຍະບັດແດງ 138 ຄົນ), ຊັ້ນ ມ.7 ມີນັກຮຽນເສັງໄດ້ 99.98% (ໄດ້ປະກາສະນິຍະບັດແດງ 96 ຄົນ), ນັກຮຽນເກັ່ງລະດັບຊາດ (ມ.4 ແລະ ມ.7) ຍາດໄດ້ 5 ຫຼຽນຄຳ, 4 ຫຼຽນເງິນ, 1 ຫຼຽນທອງແດງ ແລະ ລາງວັນຊົມເຊີຍ 4 ຄົນ. ນອກຈາກນີ້, ຍັງສາມາດສ້າງໂຮງຮຽນຕົວແບບຄຸນນະພາບໄດ້ 11 ແຫ່ງ, ໂຮງຮຽນຂຽວສະອາດ ແລະ ສິ່ງແວດລ້ອມດີ 67 ແຫ່ງ, ຈັດການແຂ່ງຂັນກິລານັກຮຽນທົ່ວນະຄອນຫຼວງວຽງຈັນ ຄັ້ງທີ III, ງານແຂ່ງຂັນສິລະປະ, ພ້ອມທັງສຳເລັດການສອບເສັງ ບັນຈຸລັດຖະກອນຄູໃໝ່ໄດ້ທັງໝົດ 527 ຄົນ (ລວມທັງໂກຕ້າປົກກະຕິ ແລະ ທົດແທນ).
 |
ຜ່ານການຈັດຕັ້ງປະຕິບັດ 13 ຄາດໝາຍທີ່ສະພາຮັບຮອງ ແມ່ນສາມາດບັນລຸໄດ້ 6 ຄາດໝາຍ ເປັນຕົ້ນແມ່ນ ອັດຕາການເຂົ້າຮຽນຂອງເດັກ 5 ປີ (101.91%), ອັດຕາເຂົ້າໃໝ່ ປ.1 (101.2%), ອັດຕາເຂົ້າຮຽນ ມ.ຕົ້ນ (100.1%) ແລະ ການສອນ ICT (95.61%). ເຖິງຢ່າງໃດກໍດີ ຍັງມີ 3 ຄາດໝາຍທີ່ບໍ່ທັນບັນລຸ (ອັດຕາປະລະ ປ.1 ແລະ ມ.ຕົ້ນ, ອັດຕາເລື່ອນຊັ້ນ ປ.5 ຂຶ້ນ ມ.1) ແລະ ອັດຕາປະລະຂອງນັກ ຮຽນຊັ້ນມັດທະຍົມຕອນຕົ້ນ ປະຕິບັດໄດ້ 5.35 % (ຄາດໝາຍໃຫ້ຕໍ່າກວ່າ 4.5 % ແລະ ອີກ 4 ຄາດ ໝາຍທີ່ເກັບກຳຂໍ້ມູນ.
ສຳລັບການກະກຽມເປີດສົກຮຽນໃໝ່ 2026-2027, ພະແນກ ສກ. ນວ ໄດ້ສຸມໃສ່ 12 ກິດຈະກຳໃຫຍ່ ເປັນຕົ້ນແມ່ນການສັບຊ້ອນຄູສອນ, ການເຜີຍແຜ່ນິຕິກຳ, ການຝຶກອົບຮົມຄູ, ການປຸກລະດົມຜູ້ປົກຄອງນຳເອົາລູກຫຼານເຂົ້າຮຽນ, ການປັບປຸງອາຄານສະຖານທີ່-ສິ່ງອຳນວຍຄວາມສະດວກ, ການກວດກາສື່ການຮຽນ-ການສອນ, ພ້ອມທັງເນັ້ນໃສ່ການຕ້ານປະກົດການຫຍໍ້ທໍ້ໃນສະຖານການສຶກສາ ເຊັ່ນ: ຢາສູບໄຟຟ້າ, ນ້ຳກະທ້ອມ ແລະ ການໃຊ້ໂທລະສັບໃນຊົ່ວໂມງຮຽນ.
 |
ໃນພິທີຕາງໜ້ານັກຮຽນ ແລະ ຄູ-ອາຈານ ທົ່ວ ນວ ໄດ້ຂຶ້ນສະແດງຄວາມຮູ້ສຶກ ແລະ ປະຕິຍານຕົນ ຈາກນັ້ນ, ຫົວໜ້າຫ້ອງການສຶກສາທິການ ແລະ ກິລາ 9 ເມືອງ, ບັນດາຫົວໜ້າຂະແໜງ ແລະ ໂຮງຮຽນທີ່ຂຶ້ນກັບໄດ້ຈັບມືແຂ່ງຂັນ ເພື່ອສຸມໃສ່ຈັດຕັ້ງປະຕິບັດໃຫ້ບັນລຸ 13 ຄາດໝາຍ ທີ່ສະພາປະຊາຊົນຮັບຮອງ.
ໂອກາດນີ້, ທ່ານ ອາດສະພັງທອງ ສີພັນດອນ ໄດ້ໃຫ້ກຽດມີຄຳເຫັນໂອ້ລົມເນັ້ນໃຫ້ຂະແໜງການສຶກສາ ເອົາໃຈໃສ່ພັດທະນາ ແລະ ສະໜອງຄູໃຫ້ພຽງພໍ, ແກ້ໄຂບັນຫາຄູຂາດແຄນ; ປັບປຸງພື້ນຖານໂຄງລ່າງ, ສະພາບແວດລ້ອມ ແລະ ກຽມຄວາມພ້ອມຮອງຮັບການປັບລະບົບການສຶກສາໃໝ່ (6+3+3) ໂດຍສະເພາະຫ້ອງ ປ.6.; ຍົກສູງຄຸນນະພາບການສຶກສາ ໂດຍຫັນເປັນທັນສະໄໝ ແລະ ດີຈີຕອນ (ການສ້າງຫ້ອງ ICT, ຫ້ອງທົດລອງ, STEM); ຊຸກຍູ້ການສຶກສາ ສາມັນວິຊາຊີບ, ວິຊາຊີບ ແລະ ການສຶກສາຊັ້ນສູງ ແລະ ສົ່ງ ເສີມການກິລາ-ສິລະປະ ເພື່ອໃຫ້ຮ່າງກາຍແຂງແຮງ, ຫ່າງໄກຈາກສິ່ງເສບຕິດ ແລະ ສ້າງໂຮງຮຽນສີຂຽວ-ນິເວດ.
ຂ່າວ-ພາບ: ບົວລະພາ
ຄໍາເຫັນ