ນວ ວາງຫຼາຍແຜນວຽກຈຸດສຸມ ເພື່ອພັດທະນາການສຶກສາ ແລະ ກິລາ ໃຫ້ບັນລຸຕາມຄາດໝາຍທີ່ວາງໄວ້

ທ່ານ ສົມພອນ ສອນດາລາ ຫົວໜ້າພະແນກສຶກສາທິການ ແລະ ກິລານະຄອນຫຼວງວຽງຈັນ (ນວ) ໄດ້ລາຍງານໃຫ້ຮູ້ເມື່ອບໍ່ດົນມານີ້ວ່າ: ນວ ໄດ້ວາງແຜນພັດທະນາການສຶກສາ ແລະ ກິລາປະຈຳສົກຮຽນ 2024-2025 ດັ່ງນີ້: ແຜນວຽກຈຸດສຸມທີ 1. ການສຶກສາກ່ອນໄວຮຽນ: ລົງທຶນໃສ່ການສຶກສາກ່ອນໄວຮຽນແມ່ນເປັນບຸລິມະສິດທີ່ສໍາຄັນເພື່ອປັບປຸງຄຸນນະພາບການສຶກສາກ່ອນໄວຮຽນ, ສົ່ງເສີມການຈະເລີນເຕີບໂຕຂອງເດັກໃຫ້ມີພັດທະນາການຮອບດ້ານ ໂດຍການຈັດສັນງົບປະມານຜ່ານຫຼາຍຮູບແບບ ແລະ ກົນໄກ ເປັນຕົ້ນແມ່ນການຮ່ວມມືຂອງພາກລັດ-ເອກະຊົນ ແລະ ສັງຄົມໃນການສະໜອງການບໍລິການທີ່ຈໍາເປັນ ເພື່ອຮັບປະກັນຄຸນນະພາບການຮຽນໃນຊັ້ນລ້ຽງເດັກ ແລະ ອະ ນຸບານ, ສົ່ງເສີມໃຫ້ຜູ້ປົກຄອງມີທັກສະໃນການລ້ຽງດູເບິ່ງແຍງເດັກໃຫ້ຖືກຕ້ອງຕາມຫຼັກການຮຽນຮູ້ຂອງເດັກ ແລະ ມີສ່ວນຮ່ວມໃນການພັດທະນາເດັກເພື່ອກຽມຄວາມພ້ອມກ່ອນເຂົ້າຮຽນໃນຊັ້ນປະຖົມໃຫ້ໄດ້ຮັບຜົນດີ.

ແຜນວຽກຈຸດສຸມທີ 2. ການສຶກສາຊັ້ນປະຖົມສຶກສາ: ສຸມໃສ່ການປັບປຸງການອ່ານອອກ-ຂຽນໄດ້ ແລະ ທັກສະການຄິດໄລ່ເລກພື້ນຖານ, ຍົກສູງຄຸນນະພາບການຈັດການຮຽນ-ການສອນຫຼັກສູດໃໝ່ຊັ້ນປະຖົມສຶກສາໃໝ່ແຕ່ ປ.1 ຮອດ ປ.5; ສົ່ງເສີມທັກສະການຮຽນຮູ້ແບບສັດຕະວັດທີ 21 ກໍຄືທັກສະການແກ້ໄຂບັນຫາ, ທັກສະດ້ານສະຕິປັນຍາ, ການຮ່ວມມື-ການສື່ສານ, ຄວາມຄິດສ້າງສັນ-ນະວັດຕະກຳ, ຄວາມຮັບຜິດຊອບສ່ວນບຸກຄົນ, ຄວາມສາມາດທາງດ້ານສັງຄົມ ແລະ ວັດທະນະທຳນາໆຊາດ.

ແຜນວຽກຈຸດສຸມທີ 3. ການສຶກສາຊັ້ນມັດທະຍົມສຶກສາ: ຍົກລະດັບຄູສອນ ແລະ ອຳນວຍການໂຮງຮຽນ

ຢ່າງເປັນລະບົບ, ສະໜອງອຸປະກອນຮັບໃຊ້ການຮຽນ-ການສອນ, ສ້າງຄວາມເຂັ້ມແຂງວຽກງານຄຸ້ມຄອງໂຮງຮຽນໂດຍມີການປະເມີນຜົນ, ຕິດຕາມ ແລະ ກວດກາ; ສືບຕໍ່ສ້າງນັກຮຽນເກັ່ງຂັ້ນນະຄອນຫຼວງວຽງຈັນ, ຂັ້ນລະດັບຊາດ ແລະ ລະດັບສາກົນໃຫ້ກາຍເປັນຊັບພະຍາກອນມະນຸດທີ່ມີຄວາມຮູ້-ຄວາມສາມາດເພື່ອຈະໄດ້ບຸກຄະລາກອນທີ່ດີໃນອະນາຄົດ.

ແຜນວຽກຈຸດສຸມທີ 4. ສົ່ງເສີມການຮຽນຮູ້ຕະຫຼອດຊີວິດ: ສືບຕໍ່ແຜນງານລຶບລ້າງຄວາມບໍ່ຮູ້ໜັງສື ແລະ ບຳ ລຸງຍົກລະດັບການສຶກສາໃຫ້ແກ່ຜູ້ທີ່ປະລະການຮຽນໃນລະບົບ ໂດຍເລັ່ງໃສ່ຜູ້ທີ່ມີອາຍຸ 15-24 ປີ ພ້ອມທັງສະໜອງການຝຶກອົບຮົມວິຊາຊີບຂັ້ນພື້ນຖານໃຫ້ແກ່ເຂົາເຈົ້າ ເພື່ອໃຫ້ເຂົາເຈົ້າມີອາຊີບ ແລະ ສາມາດຊອກວຽກເຮັດງານທຳໄດ້; ສົ່ງເສີມການນຳໃຊ້ໄອຊີທີເຂົ້າໃນການຮຽນ-ການສອນ; ສືບຕໍ່ລົງແນະແນວວິຊາຊີບໃຫ້ກວ້າງຂວາງຂຶ້ນຕື່ມ ເພື່ອໃຫ້ຜູ້ປົກຄອງ ແລະ ນັກຮຽນໄດ້ເຂົ້າໃຈແຈ້ງຕໍ່ລະບົບການສຶກສາສາຍອາຊີວະ ແລະ ສາຂາວິຊາຊີບ ໂດຍລົງໂຄສະ ນາໃຫ້ເຂົ້າເຖິງຜູ້ປົກຄອງ ແລະ ນັກຮຽນໃຫ້ຫຼາຍຂຶ້ນ; ເຊື່ອມໂຍງກັບພາກທຸລະກິດທີ່ເປັນຜູ້ວ່າຈ້າງໂດຍກົງເພື່ອໃຫ້ນັກຮຽນທີ່ຮຽນຈົບສາມາດມີວຽກເຮັດງານທຳຫຼາຍຂຶ້ນ; ສົມທົບກັບພາກສ່ວນທີ່ກ່ຽວຂ້ອງເພື່ອວິເຄາະຄວາມຕ້ອງການຂອງຕະຫຼາດແຮງງານ;

ແຜນວຽກຈຸດສຸມທີ 5. ວຽກກິລາ-ກາຍະກຳ: ເສີມຂະຫຍາຍວຽກງານກິລາ-ກາຍະກຳຂອງ ນວ ໃຫ້ໄດ້ມາດຕະຖານ ສາມາດຍາດໄດ້ລາງວັນໃນລະດັບປະເທດ ແລະ ສາກົນໃຫ້ສູງຂຶ້ນ; ກະກຽມຄວາມພ້ອມທາງດ້ານບຸກຄະລາກອນ, ສະໜາມແຂ່ງຂັນ, ການຝຶກແອບ, ຝຶກຊ້ອມ ແລະ ງົບປະມານເພື່ອກຽມເຂົ້າຮ່ວມງານມະຫະກຳກິລາແຫ່ງຊາດຄັ້ງທີ XII ແລະ ກິລາພາລາເກມຄັ້ງທີ IV ທີ່ ນວ ຈະເປັນເຈົ້າພາບໃນປີ 2025.

ແຜນວຽກຈຸດສຸມທີ 6. ວຽກງານການບໍລິຫານຄຸ້ມຄອງ: ປັບປຸງສັບຊ້ອນຄູ, ຍົກລະດັບຜູ້ບໍລິຫານການສຶກສາທົ່ວ ນວ ໃຫ້ມີປະສິດທິພາບສອດຄ່ອງກັບສະພາບຕົວຈິງ; ແນະນຳໃຫ້ຜູ້ບໍລິຫານການສຶກສາຂັ້ນເມືອງ, ຂັ້ນໂຮງຮຽນແຕ່ລະຂັ້ນຂຶ້ນແຜນພັດທະນາໂຮງຮຽນຂອງຕົນປະຈຳປີ ຮ່ວມກັບສະມາຄົມພໍ່ແມ່ນັກຮຽນ ແລ້ວໄປຜ່ານຫ້ອງການສຶກສາທິການ ແລະ ກິລາເມືອງເພື່ອນຳສະເໜີອົງການປົກຄອງເມືອງຮັບຮອງແຜນພັດທະນາໂຮງຮຽນ, ສືບຕໍ່ກວດກາການສັບຊ້ອນຈັດສັນຄູສອນໃນແຕ່ລະຊັ້ນສາຍລາຍວິຊາ ພ້ອມປະເມີນເປັນແຕ່ລະໄລຍະ, ສຸມໃສ່ແກ້ໄຂປະກົດການຫຍໍ້ທໍ້ທີ່ຈະເກີດຂຶ້ນໃນສະຖານການສຶກສາ ໂດຍສະເພາະບັນຫາແອອັດ, ຄວາມບໍ່ເປັນລະບຽບຮຽບຮ້ອຍ ແລະ ອື່ນໆ, ກະກຽມຄວາມພ້ອມທາງດ້ານວັດຖຸ, ອຸປະກອນ, ສື່ການຮຽນ-ການສອນ, ຕາຕະລາງສອນຂອງຄູ, ປັບປຸງຂໍ້ກໍານົດກົດລະບຽບຕ່າງໆໃນການເປີດສົກຮຽນ 2024-2025 ນີ້, ສືບຕໍ່ເກັບກຳສະຖິຕິການສຶກສາປະຈຳປີເພື່ອວິເຄາະ-ວິໄຈສະ ພາບການສຶກສາຂອງ ນວ ເພື່ອສຸມໃສ່ແກ້ໄຂບັນດາຄາດໝາຍທີ່ຍັງບໍ່ທັນບັນລຸ.