ໜ່ວຍພັກໜັງສືພິມປະຊາຊົນ ຈັດກອງປະຊຸມກວດກາໜ່ວຍພັກປອດໃສ ເຂັ້ມແຂງ ໜັກແໜ້ນ

ກອງປະຊຸມກວດກາໜ່ວຍພັກ-ສະມາຊິກພັກ ປອດໃສ ເຂັ້ມແຂງໜັກແໜ້ນ ປະຈໍາປີ 2023 ຂອງໜ່ວຍພັກໜັງສືພິມປະຊາຊົນ ໄດ້ຈັດຂຶ້ນໃນວັນທີ 16 ພະຈິກນີ້ ທີ່ຫ້ອງປະຊຸມຂອງສຳນັກງານໜັງສືພິມປະຊາຊົນ ໂດຍການເປັນປະທານຂອງ ສະຫາຍ ວັນໄຊ ຕະວິນຍານ ກຳມະການຄະນະພັກ ຮອງຫົວໜ້າ ຄະນະໂຄສະນາອົບຮົມສູນກາງພັກ (ຄອສພ) ເລຂາໜ່ວຍພັກ ຫົວໜ້າບັນນາທິການໃຫຍ່ ໜັງສືພິມປະຊາຊົນ; ມີ ສະຫາຍ ນາງ ພວງມະລີ ອັກຄະມຸນຕີ ຫົວໜ້າກົມກວດກາ ຄອສພ ພ້ອມດ້ວຍບັນດາສະຫາຍຄະນະໜ່ວຍພັກ ແລະ ສະມາຊິກພັກ ພາຍໃນໜັງສືພິມປະຊາຊົນ ເຂົ້າຮ່ວມຢ່າງພ້ອມພຽງ.
ສະຫາຍ ວັນໄຊ ຕະວິນຍານ ໄດ້ກ່າວເປີດກອງປະຊຸມວ່າ: ການກວດກາພັກ ເປັນວຽກງານປົກກະຕິ ຊຶ່ງພັກປະຊາຊົນປະຕິວັດລາວເຮົາ ກໍໄດ້ລະບຸແຈ້ງວ່າ “ບ່ອນໃດມີການກວດກາ ບ່ອນນັ້ນມີການນໍາພາ-ຊີ້ນໍາຂອງພັກ, ບ່ອນໃດບໍ່ມີການກວດກາ ບ່ອນນັ້ນກໍບໍ່ມີການນໍາພາ-ຊີ້ນໍາຂອງພັກ”; ເພື່ອໃຫ້ການດຳເນີນການກວດກາໜ່ວຍພັກຄັ້ງນີ້ ມີຄວາມໜັກແໜ້ນ, ຮັດກຸມ ແລະ ກະທັດຮັດດ້ານເວລາ ພວກເຮົາຕ້ອງເອົາໃຈໃສ່ດຳເນີນການກວດກາຕາມ 5 ມາດຖານ, ເອົາບັນຫາຕ່າງໆມາສົມທຽບ, ຕີລາຄາ,ສະຫຼຸບ ແລະ ປະກອບຄໍາເຫັນຢ່າງສ້າງສັນ, ຖືເອົາການຕໍານິສົ່ງຂ່າວ ເປັນການກໍ່ສ້າງຊຶ່ງກັນ ແລະ ກັນ ປະກອບຄໍາເຫັນຢ່າງຈິງໃຈ ກົງໄປກົງມາ ໂດຍຖືເອົາຄວາມສາມັກຄີ ໃນການຈັດຕັ້ງຜັນຂະຫຍາຍ ປະຕິບັດແນວທາງນະໂຍບາຍຂອງພັກ ໃຫ້ປະກົດຜົນເປັນຈິງ ແລະ ເກີດປະໂຫຍດໃຫ້ແກ່ປະເທດຊາດ.
ຈາກນັ້ນ, ສະຫາຍ ພູວຽງຄໍາ ພົນອາສາຄະນະໜ່ວຍພັກ ປະທານກວດກາໜ່ວຍພັກ ຮອງຫົວໜ້າພະແນກການເມືອງ-ເສດຖະກິດ ກໍໄດ້ຂຶ້ນຜ່ານບົດສະຫຼຸບ ກວດກາໜ່ວຍພັກ ປະຈໍາປີ 2023 ຊຶ່ງມີເນື້ອໃນສໍາຄັນບາງຕອນວ່າ: ໜ່ວຍພັກ ໜັງສືພິມ ປະຊາຊົນ ແມ່ນໜ່ວຍພັກໜຶ່ງ ທີ່ຂຶ້ນກັບ ອົງຄະນະພັກ ຄອສພ; ເປັນອົງການຈັດຕັ້ງດ້ານວິຊາການ ໃນໂຄງປະກອບການຈັດຕັ້ງຂອງ ຄອສພ ຊຶ່ງມີພາລະບົດບາດເປັນກະບອກສຽງຂອງສູນກາງພັກ ປະຊາຊົນ ປະຕິວັດລາວໃນການເຜີຍແຜ່ແນວທາງນະໂຍບາຍຂອງພັກ,ລະບຽບກົດໝາຍຂອງລັດ, ເຫດການຕ່າງໆທີ່ເກີດຂຶ້ນຢູ່ພາຍໃນ ແລະ ຕ່າງປະເທດ, ເປັນຂົວເຊື່ອມຕໍ່ລະຫວ່າງ ມະຫາຊົນກັບພັກ-ລັດ.ຕະຫຼອດໄລຍະ 1 ປີ ຜ່ານມາ, ໜັງສືພິມ ປະຊາຊົນ ໄດ້ເສີມຂະຫຍາຍບົດບາດ ເຮັດໜ້າທີ່ເປັນກະບອກສຽງຂອງສູນກາງພັກ, ເປັນເຄື່ອງມືອັນແຫຼມຄົມຂອງພັກ, ເປັນເວທີຂອງມະຫາຊົນ, ເປັນສາຍໃຍຜູກພັນ ລະຫວ່າງ ມະຫາຊົນກັບພັກ, ສາມາດນຳເອົາແນວງທາງ, ນະໂຍບາຍຂອງພັກ, ລັດ ລົງສູ່ມະຫາຊົນ ແລະ ນຳເອົາຄວາມຄິດເຫັນຂອງປະຊາຊົນຊັ້ນຄົນຕ່າງໆ ສ່ອງແສງໃຫ້ພັກ, ລັດ ຮັບຊາບຢ່າງທັນການ. ຄຸນນະພາບຂອງ ໜັງສືພິມ ຄ່ອຍໆໄດ້ຮັບການປັບປຸງໃຫ້ດີຂຶ້ນເທື່ອລະກ້າວ.
ປັດຈຸບັນ, ທົ່ວສໍານັກງານ ໜັງສືພິມ ປະຊາຊົນ ມີພະນັກງານ-ລັດຖະກອນ ທັງໝົດ 40 ຄົນຍິງ 21 ຄົນ. ລະດັບວິຊາສະເພາະ ປະລິນຍາໂທ 7 ຄົນຍິງ 2 ຄົນ, ປະລິນຍາຕີ 27 ຄົນຍິງ 17 ຄົນ, ຊັ້ນສູງ 9 ຄົນຍິງ 4 ຄົນ, ຊັ້ນກາງ 2 ຄົນ. ລະດັບທິດສະດີການເມືອງ-ການປົກຄອງ ຊັ້ນສູງ 6 ຄົນຍິງ 3 ຄົນ, ຊັ້ນກາງ 1 ຄົນ, ບໍາລຸງໄລຍະ 3 ເດືອນ 4 ຄົນຍິງ 2 ຄົນ, ບຳລຸງ 45 ວັນ 14 ຄົນຍິງ 5 ຄົນ. ໜ່ວຍພັກ ໜັງສືພິມ ປະຊາຊົນ  ມີສະມາຊິກພັກທັງໝົດ 46 ສະຫາຍຍິງ 20 ສະຫາຍ, ບໍານານ 15 ສະຫາຍຍິງ 5 ສະຫາຍ, ສໍາຮອງ 3 ສະຫາຍຍິງ 2 ສະຫາຍ. ໃນໄລຍະ 1 ປີຜ່ານມາ, ໄດ້ເລື່ອນສະມາຊິກພັກສໍາຮອງຂຶ້ນສົມບູນ 1 ສະຫາຍ, ຮັບມະຫາຊົນກ້າວໜ້າເຂົ້າສໍາຮອງ 3 ສະຫາຍຍິງ 2 ສະຫາຍ, ຕິດຕາມມະຫາຊົນກ້າວໜ້າ ທີ່ໄດ້ຮຽນກົດລະບຽບພັກ 3 ສະຫາຍຍິງ 1 ສະຫາຍ. ມີສະມາຊິກພັກ 3 ສະຫາຍ ທີ່ຍົກຍ້າຍມາດຳເນີນຊີວິດຢູ່ໜ່ວຍພັກ ໜັງສືພິມປະຊາຊົນ ຈາກໜ່ວຍພັກຫ້ອງການ ຄອສພ.
ໄລຍະ 1 ປີຜ່ານມາ, ໜັງສືພິມ ປະຊາຊົນ ໄດ້ຮັບການປັບປຸງ ທັງທາງດ້ານເນື້ອໃນ ແລະ ຮູບການ ໃຫ້ສອດຄ່ອງກັບສະພາບ ແລະ ເງື່ອນໄຂໃນປັດຈຸບັນ ໂດຍໄດ້ກຳນົດໜ້າບົດ, ຂ່າວ ແລະ ຄໍລຳຕ່າງໆ ຢ່າງລະອຽດ ມີຂ່າວ-ບົດ ອຸດົມສົມບູນຂຶ້ນ. ພ້ອມທັງເພີ່ມບົດນໍາ-ບົດຄວາມ ໃຫ້ຫຼາຍຂຶ້ນ, ເຮັດໃຫ້ຄຸນນະພາບຂອງໜັງສືພິມ ປະຊາຊົນ ມີເນື້ອໃນໜັກແໜ້ນ ແລະ ສີສັນດີຂຶ້ນກວ່າເກົ່າ. ສໍາລັບເວັບໄຊຂອງ                           ໜັງສືພິມ ປະຊາຊົນ ກໍໄດ້ຮັບການປັບປຸງຂຶ້ນ ສາມາດເຂົ້າເບິ່ງໄດ້ງ່າຍ. ການອອກຂ່າວທາງເວັບໄຊ ແລະ ເຟສບຸກ ສະເລ່ຍປະມານ 20-25 ຂ່າວ/ມື້, ເຮັດໃຫ້ມີຜູ້ເຂົ້າເບິ່ງເພີ່ມຂຶ້ນ. ປັດຈຸບັນ, ມີຜູ້ເຂົ້າເບິ່ງເວັບໄຊ 16.565.280 ເທື່ອຄົນ, ສະເລ່ຍ 2.600 ກວ່າເທື່ອຄົນຕໍ່ມື້, ເຟສບຸກ ມີຜູ້ເຂົ້າອ່ານ 21.398 ເທື່ອຄົນ, ສະເລ່ຍ 445 ເທື່ອຄົນຕໍ່ມື້.ປັດຈຸບັນ, ສະບັບເຈ້ຍ ແມ່ນພິມປົກກະຕິ 12 ໜ້າ; ໃນນັ້ນ, 7 ໜ້າ ແມ່ນເນື້ອໃນ, ສ່ວນອີກ 5 ໜ້າ ແມ່ນໜ້າໂຄສະນາ ເພື່ອສ້າງລາຍຮັບໃຫ້ສໍານັກງານ. ເນື່ອງຈາກວ່າ ໜັງສືພິມ ປະຊາຊົນ ຕ້ອງກຸ້ມຕົນເອງດ້ານລາຍຈ່າຍ (ນອກຈາກລາຍຮັບເງິນເດືອນ) ໂດຍມີຍອດພິມຈຳໜ່າຍ 1.300 ສະບັບຕໍ່ວັນ ແລະ ໃນ 1 ປີຜ່ານມາ, ໜັງສືພິມ ປະຊາຊົນ ໄດ້ອອກຂ່າວພາຍໃນ ແລະ ຕ່າງປະເທດ ໄດ້ທັງໝົດ 188.760 ຂ່າວ, ບົດປະເພດຕ່າງໆໄດ້ 1.000 ກວ່າບົດ, ຮູບປະກອບ 150.000 ແຜ່ນສະເລ່ຍມື້ໜຶ່ງອອກຂ່າວ 15 ຂ່າວ/ມື້, ບົດໄດ້ 8 ບົດ/ມື້, ຮູບປະກອບບົດ ແລະ ຂ່າວ 20 ແຜ່ນ. ບົດ-ຂ່າວຕ່າງປະເທດ 1.320, ສະເລ່ຍ ໄດ້ອອກ 1 ບົດ ແລະ 5 ຂ່າວ/ມື້. ບົດຄວາມ, ບົດນຳ 2-3 ບົດຕໍ່ອາທິດ.
ໃນກອງປະຊຸມ, ສະຫາຍ ວັນໄຊ ຕະວິນຍານ ຍັງໄດ້ຜ່ານບົດສໍາຫຼວດການ ນຳພາ-ຊີ້ນຳລວມ. ຈາກນັ້ນ, ສະຫາຍ ນາງ ພວງມະລີ ອັກຄະມຸນຕີໃນນາມຄະນະຮັບຜິດຊອບຊຸກຍູ້ຕິດຕາມ ການສ້າງໜ່ວຍພັກ ປອດໃສ ເຂັ້ມແຂງ ໜັກແໜ້ນ ຂອງ ຄອສພກໍໄດ້ຂຶ້ນແນະນໍາກ່ຽວກັບການລົງຄະແນນໃສ່ ຕາມ 5 ມາດຖານ ໂດຍໃຫ້ພິຈາລະນາຕາມຄວາມເປັນຈິງ ເບິ່ງການຈັດຕັ້ງປະຕິບັດໜ້າທີ່ວຽກງານຕົວຈິງ ຫຼີກລ່ຽງອັກຄະຕິ ແລະ ບັນດາສະມາຊິກພັກແຕ່ລະສະຫາຍ ກໍໄດ້ພ້ອມກັນລົງຄະແນນ.
(ຂ່າວ: ສຸກສະຫວັນ, ພາບ: ສໍານານ)