ໄດ້ເປີດຂຶ້ນໃນວັນທີ 14 ພະຈິກນີ້ ໂດຍການເປັນປະທານຂອງ ສະຫາຍ ວັນໄຊ ຕະວິນຍານ ກຳມະການຄະນະພັກ ຮອງຫົວໜ້າຄະນະໂຄສະນາອົບຮົມສູນກາງພັກ ເລຂາໜ່ວຍພັກ ຫົວໜ້າບັນນາທິການໃຫຍ່ໜັງສືພິມປະຊາຊົນ; ຊຶ່ງມີ ທ່ານ ນາງ ຫຼ້າຊ້ອຍ ກອງແກ້ວມະນີວົງ ຄະນະໜ່ວຍພັກກົມກວດກາ ຮອງຫົວໜ້າກົມກວດກາ ຄອສພ, ບັນດາສະຫາຍຄະນະພັກ ແລະ ສະມາຊິກພັກພາຍໃນໜັງສືພິມປະຊາຊົນ ພ້ອມດ້ວຍບັນດາສະຫາຍຈາກພາກສ່ວນກ່ຽວຂ້ອງເຂົ້າຮ່ວມ.
ສະຫາຍ ວັນໄຊ ຕະວິນຍານ ໄດ້ກ່າວເປີດກອງປະຊຸມວ່າ:ການຕິດຕາມກວດກາແມ່ນໜຶ່ງໃນພາລະບົດບາດຕົ້ນຕໍແຫ່ງການນໍາພາຂອງພັກ, ບໍ່ມີການກວດກາກໍໝາຍຄວາມວ່າບໍ່ມີການນໍາພາຂອງພັກ, ວຽກຕິດຕາມກວດກາເປັນວຽກທີ່ສອດຫ້ອຍເຂົ້າໃນທຸກຂົງເຂດວຽກງານ, ເປັນວຽກທີ່ຕ້ອງເຮັດເປັນປົກກະຕິ ແລະ ຂາດບໍ່ໄດ້ສຳລັບການນໍາພາຂອງພັກ ແລະ ການຄຸ້ມຄອງບໍລິຫານລັດ, ການຈັດຕັ້ງພັກ-ລັດທຸກຂັ້ນ, ພະນັກງານສະມາຊິກພັກທຸກສະຫາຍຕ້ອງຢູ່ພາຍໃຕ້ການຕິດຕາມ ແລະ ກວດກາຂອງພັກ ຄະນະພັກແຕ່ລະຂັ້ນເປັນຜູ້ຊີ້ນໍາໂດຍກົງ ທັງເປັນຜູ້ຕິດຕາມ ກວດກາທຸກການເຄື່ອນໄຫວ ຂອງການຈັດຕັ້ງຂອງພະນັກ ງານ-ສະມາຊິກພັກທີ່ຢູ່ໃຕ້ການຄຸ້ມຄອງຂອງຕົນ.ເພື່ອເຮັດໃຫ້ກອງປະຊຸມກວດກາໜ່ວຍພັກ, ສະມາຊິກພັກຂອງໜັງສືພິມປະຊາຊົນ ປະຈໍາປີ 2024 ຖືກຕ້ອງຕາມກົດລະບຽບຂອງພັກ ທັງໄດ້ຮັບຜົນດີຕາມລະດັບຄາດໝາຍທີ່ວາງໄວ້, ຮັກສາໄດ້ຄວາມສາມັກຄີຮັກແພງ ກໍໄດ້ສະເໜີໃຫ້ບັນດາສະຫາຍສະມາຊິກພັກຂອງໜ່ວຍພັກໜັງສືພິມປະຊາຊົນ ຈົ່ງຍົກສູງຄວາມຮັບຜິດຊອບຕໍ່ໜ້າທີ່ການເມືອງຂອງຕົນ ຕິດຕາມຮັບຟັງການລາຍງານບົດສະຫຼຸບປະຈໍາປີ, ບົດສໍາຫຼວດການນໍາພາຂອງໜ່ວຍພັກ ເພື່ອປະກອບຄໍາເຫັນຢ່າງກົງໄປກົງມາ ແລະ ມີຄວາມຄົບຖ້ວນສົມບູນຕາມສະພາບຄວາມເປັນຈິງຢ່າງພາວະວິໄສ.
ສະຫາຍ ສີວັນ ຫອມໄຊຍະເດດ ຮອງເລຂາໜ່ວຍພັກ ຮອງຫົວໜ້າບັນນາທິການໃຫຍ່ ໜັງສືພິມປະຊາຊົນ ໄດ້ຂຶ້ນຜ່ານສະຫຼຸບປະຈໍາປີ ໃຫ້ຮູູ້ວ່າ: ໃນໄລຍະ 1 ປີຜ່ານມາ, ໜັງສືພິມປະຊາຊົນປະສົບກັບຄວາມຫຍຸ້ງຍາກນາໆປະການ; ແຕ່ເຖິງຢ່າງໃດກໍຕາມ, ໜ່ວຍພັກໜັງສືພິມປະຊາຊົນໄດ້ບຸກບືນຜ່ານຜ່າຄວາມຫຍຸ້ງຍາກນາໆປະການ, ໄດ້ຕັ້ງໜ້າເສີມຂະຫຍາຍມູນເຊື້ອອັນດີງາມຂອງຕົນ, ເປັນເຈົ້າການນໍາພາປະຕິບັດໜ້າທີ່ການເມືອງຂອງຕົນແລະມີຜົນສໍາເລັດພົ້ນເດັ່ນການນໍາພາດ້ານການເມືອງ ເຮັດໃຫ້ພະນັກງານ-ສະມາຊິກພັກໜັງສືພິມປະຊາຊົນມີຫຼັກໝັ້ນການເມືອງທີ່ໜັກແໜ້ນ, ມີຫຼັກໝັ້ນຊົນຊັ້ນກໍາມະກອນ-ຊາວຜູ້ອອກແຮງງານ, ສາມາດຈໍາແນກໄດ້ມິດແລະສັດຕູຢ່າງຈະແຈ້ງ,ມີຄວາມຈົງຮັກພັກດີຕໍ່ພັກປະຊາຊົນປະຕິວັດລາວຢ່າງຕາຍໃຈ, ເດີນຕາມແນວທາງຂອງພັກ, ຢຶດໝັ້ນແນວຄິດທິດສະດີມາກ-ເລນິນ, ແນວຄິດໄກສອນພົມວິຫານເປັນເຂັມທິດເຍືອງທາງ, ຕ້ານແນວຄິດຫຼາຍພັກຫຼາຍເຄົ້າ, ຕ້ານເລ່ຫຼ່ຽມກົນອຸບາຍຂອງສັດຕູແລະຕ້ານພະຍາດອາດຍາສິດຢ່າງຕັ້ງໜ້າ; ການນໍາພາດ້ານແນວຄິດໄດ້ນໍາພາ-ຊີ້ນໍາສຶກສາອົບຮົມການເມືອງ-ແນວຄິດໃຫ້ພະນັກງານ-ສະມາຊິກພັກເປັນປົກກະຕິເຮັດໃຫ້ສະພາບແນວຄິດຂອງພະນັກງານ-ສະມາຊິກພັກມີຄວາມສະຫງົບໂດຍພື້ນຖານ; ດ້ານການຈັດຕັ້ງປະຊາຊົນໄດ້ສົມທົບກັບກົມຈັດຕັ້ງພະນັກງານ (ຄອສພ) ເພື່ອນໍາພາໜັງສືພິມປະຊາຊົນປັບປຸງການຈັດຕັ້ງຢ່າງຖືກຕ້ອງສອດຄ່ອງ; ດ້ານແບບແຜນການນໍາພາໄດ້ຢຶດໝັ້ນແບບແຜນວິທີນໍາພາຕາມຫຼັກການລວມສູນປະຊາທິປະໄຕ, ເຮັດວຽກເປັນໝູ່ຄະນະ, ບຸກຄົນຮັບຜິດຊອບ, ຄະນະໜ່ວຍພັກແຕ່ລະສະຫາຍໄດ້ນຳພາ-ຊີ້ນໍາແຕ່ລະພະແນກ; ນໍາພາການປະຕິບັດໜ້າທີ່ການເມືອງສາມາດອອກຂ່າວພາຍໃນໄດ້ທັງໝົດ 7,333 ຂ່າວ, ຂ່າວຕ່າງປະເທດ 1,059 ຂ່າວ, ບົດປະເພດຕ່າງໆ 585 ບົດ, ຮູບປະກອບ 3,361ແຜ່ນ. ສໍາລັບເວັບໄຊຂອງໜັງສືພິມປະຊາຊົນກໍໄດ້ຮັບການປັບປຸງດີຂຶ້ນໂດຍໄດ້ຮັບການຊ່ວຍເຫຼືອຈາກໜັງສືພິມເຍີນເຢີນສສຫວຽດນາມຊຶ່ງສາມາດເຂົ້າເບິ່ງໄດ້ງ່າຍ. ການລົງຂ່າວທາງເຟສບຸກໝົດປີມີຄົນເຂົ້າເບິ່ງທັງໝົດ 671,524 ເທື່ອຄົນ, ສະເລ່ຍມື້ໜຶ່ງມີ 2,238 ເທື່ອຄົນ, ມີຜູ້ເຂົ້າເບິ່ງເວັບໄຊສ 24,124,318 ເທື່ອຄົນ, ສະເລ່ຍ 15,598 ກວ່າເທື່ອຄົນຕໍ່ມື້.
ຈາກນັ້ນ, ກໍໄດ້ມີການຜ່ານບົດສໍາຫຼວດການນຳພາ-ຊີ້ນຳລວມຂອງຄະນະໜ່ວຍພັກໜັງສືພິມປະຊາຊົນປະຈໍາປີ 2024 ແລະ ຜູ້ຕາງໜ້າຈາກກົມກວດກາ ຄອສພ ກໍໄດ້ຂຶ້ນແນະນໍາກ່ຽວກັບວິທີການໃຫ້ຄະແນນ, ຄະນະພັກໜ່ວຍ, ສະມາຊິກພັກແຕ່ລະສະຫາຍ ກໍໄດ້ຜ່ານບົດສຳຫຼວດ ແລະ ມີການສ່ອງແສງຕໍານິສົ່ງຂ່າວກໍ່ສ້າງຊຶ່ງກັນ ແລະ ກັນ; ພ້ອມນີ້, ກໍໄດ້ມີການໃຫ້ຄະແນນ ແລະ ຕີລາຄາຈັດປະເພດໃຫ້ທຸກສະຫາຍ.
(ຂ່າວ-ພາບ: ສຸກສະຫວັນ)
ຄໍາເຫັນ