ຍາມໃດ! ລັດຖະບານກໍ່ຖືເອົາວຽກງານການສຶກສາໄປກ່ອນວຽກງານອື່ນບາດກ້າວໜຶ່ງ

 ເຊິ່ງທ່ານໄດ້ກ່າວວ່າ: ລັດຖະບານຍາມໃດ? ກໍໄດ້ຖືວຽກງານການສຶກສາເປັນວຽກງານໜຶ່ງທີ່ສໍາຄັນ, ເອົາການສຶກສາໄປກ່ອນວຽກງານອື່ນບາດກ້າວໜຶ່ງ,ເອົາຄົນເປັນເປົ້າໝາຍ ແລະ ເປັນໃຈກາງໃນການພັດທະນາເສດຖະກິດ-ສັງຄົມຂອງຊາດ, ການສຶກສາເປັນການພັດທະນາຊັບພະຍາກອນມະນຸດສ້າງຄົນເຮົາໃຫ້ມີຄວາມຮູ້-ຄວາມສາມາດ, ມີຄຸນສົມບັດສິນທໍາປະຕິວັດ, ມີສຸຂະພາບແຂງແຮງທາງດ້ານຮ່າງກາຍ ແລະ ຈິດໃຈ, ຮັກຄວາມກ້າວໜ້າ ແລະ ມີວິທະຍາສາດເພື່ອກາຍເປັນກໍາລັງແຮງງານທີ່ມີຄຸນນະພາບ ຕອບສະໜອງຄວາມຮຽກຮ້ອງຕ້ອງການຂອງການພັດທະນາປະເທດຊາດໃນໄລຍະໃໝ່. ໃນສົກຮຽນຜ່ານມາເຖິງວ່າຈະມີຄວາມຫຍຸ້ງຍາກຫຼາຍຢ່າງທີ່ສົ່ງຜົນກະທົບໂດຍກົງຕໍ່ການປະຕິບັດວຽກງານການສຶກສາ, ວິທະຍາສາດ ແລະ ກິລາກໍຕາມ ແຕ່ຂະແໜງການສຶກສາ, ວິທະຍາສາດ ແລະ ກິລາ ກໍໄດ້ສຸມທຸກເຫື່ອແຮງ, ສະຕິປັນຍາ ປະຕິບັດໜ້າທີ່ຂອງຕົນດ້ວຍຄວາມຮັບຜິດຊອບສູງ ສາມາດຂັບເຄື່ອນ ປະຕິບັດແຜນພັດທະນາການສຶກສາ ແລະ ກິລາມີຜົນສໍາເລັດສໍາຄັນຫຼາຍດ້ານ, ການຈັດຕັ້ງປະຕິບັດຜ່ານມາໄດ້ຮັບຜົນສໍາເລັດທີ່ພົ້ນເດັ່ນຄື: ໄດ້ຂະຫຍາຍການຈັດການຮຽນ-ການສອນສາຍສາມັນວິຊາຊີບ 9 ແຫ່ງຄື: ໂຮງຮຽນ ມໍປາຍ ທ່າແຂກ, ໂຮງຮຽນສາມັນມິດຕະພາບ ຄໍາມ່ວນ-ກວາງບິ່ງ, ໂຮງຮຽນກິນນອນຊົນເຜົ່າ, ໂຮງຮຽນ ມສ ນາໂດນ, ໂຮງຮຽນ ມສ ມ່ວງສຸມ, ໂຮງຮຽນ ມສ ດົງໃຕ້, ໂຮງຮຽນ ມສ ຫົວນາ, ໂຮງຮຽນ ມສ ດົງກະແສນ ແລະ ໂຮງຮຽນ ມສ ຂົວໂດນ. ໄດ້ຈັດຕັ້ງການຮຽນ-ການສອນໃຫ້ແກ່ນັກຮຽນຊັ້ນມັດທະຍົມສຶກສາ ມ3, ມ4, ມ5 ແລະ ມ6 ເຂົ້າຮຽນໃນຫຼັກສູດສາມັນວິຊາຊີບໃນຮູບແບບພັກສິ້ນປີຮຽນໃນໄລຍະ 3 ເດືອນ ໃນຫຼັກສູດຊັ້ນຕົ້ນລະດັບ C1 ທີ່ວິທະຍາໄລເຕັກນິກວິຊາຊີບ ແຂວງຄໍາມ່ວນ ຈໍານວນ 8 ສາຂາວິຊາຊີບຄື: ຊ່າງກໍ່-ໂບກ, ການປຸງແຕ່ງອາຫານ, ຕັດຫຍິບ, ສ້ອມແປງລົດຈັກ, ໄຟຟ້າໃນອາຄານ, ສ້ອມແປງເຄື່ອງເຢັນ ແລະ ພື້ນຖານຄອມພິ້ວເຕີ້. ນອກນັ້ນ, ກໍໄດ້ເຂົ້າຮ່ວມງານມະຫາກໍາກິລາແຫ່ງຊາດຄັ້ງທີ XII ທີ່ນະຄອນຫຼວງວຽງຈັນ ເປັນເຈົ້າພາບ.

ທ່ານ ນາງ ສຸກຂະເສີມ ສິດທິເດດ ໄດ້ກ່າວຕື່ມວ່າ: ໃນສົກຮຽນ 2024 – 2025 ຜ່ານການຈັດຕັ້ງປະຕິບັດຕົວຈິງເຫັນວ່າໃນ 15 ຄາດໝາຍທີ່ກໍານົດໄວ້ໃນມະຕິສະພາມີ 9 ຄາດໝາຍທີ່ສາມາດບັນລຸໄດ້ ແລະ ມີ 6 ຄາດໝາຍທີ່ບໍ່ບັນລຸໄດ້. ໃນນັ້ນ, ຈໍານວນ 9 ຄາດໝາຍທີ່ບັນລຸໄດ້ປະກອບມີ: ອັດຕາເຂົ້າຮຽນໃໝ່ ສຸດທິ ປ1 ທຽບໃສ່ເດັກ 6 ປີ ປະຕິບັດໄດ້ 96.1% (ແຜນປີ 2025 ແມ່ນ 95.5%) ລື່ນຄາດໝາຍ 0.6%; ອັດຕາປະລະການຮຽນຂອງນັກຮຽນຂັ້ນ ປ1 ປະຕິບັດໄດ້ 7.2% (ແຜນປີ 2025 ແມ່ນ 7.5%) ລື່ນຄາດໝາຍ 0.3%; ອັດຕາປະລະການຮຽນຊັ້ນປະຖົມສຶກສາ ປະຕິບັດໄດ້ 5% (ແຜນປີ 2025 ແມ່ນ 5%) ບັນລຸຄາດ ໝາຍ; ດັດສະນີ້ຄວາມສະເໝີພາບຍິງ-ຊາຍ ອັດຕາເລື່ອນຊັ້ນ ປ5 ຫາ ມ1 (ທຽບໃສ່ນັກຮຽນຕົ້ນປີ ປ5) ປະຕິບັດໄດ້ 1.03% (ແຜນປີ 2025 ແມ່ນ 0.97-1.03) ມີຄວາມສະເໝີພາບຍິງ-ຊາຍ ; ປະຊາກອນໜຸ່ມ ແລະ ຜູ້ປະລະການຮຽນໃຫ້ໄດ້ບໍາລຸງຜ່ານການສຶກສານອກໂຮງຮຽນ ແລະ ຝຶກອົບຮົມວິຊາຊີບປະຕິບັດໄດ້ 1,417 ຄົນ (ແຜນປີ 2025 ແມ່ນ 1,046 ຄົນ) ລື່ນຄາດໝາຍ 371 ຄົນ; ຄູຊັ້ນປະຖົມ ແລະ ມັດທະຍົມສຶກສາໄດ້ຮັບການຝຶກອົບຮົມ ປະຕິບັດໄດ້ 40.9% (ແຜນປີ 2025 ແມ່ນ 31%) ລື່ນຄາດໝາຍ 9.9%; ອັດຕາປະລະການຮຽນ ຊັ້ນປະຖົມສຶກສາ ປະຕິບັດໄດ້ 5% (ແຜນປີ 2025 ແມ່ນ 5%) ບັນລຸຄາດໝາຍ; ອັດຕາສ່ວນນັກຮຽນຈົບຊັ້ນມັດທະຍົມຕອນປາຍເຂົ້າຮຽນຕໍ່ລະດັບຕ່າງໆພາຍໃນ ແລະ ຕ່າງປະເທດ ປະຕິບັດໄດ້ 54.4% (ແຜນປີ 2025 ແມ່ນ 54%) ລື່ນຄາດໝາຍ 0.4%; ສູ້ຊົນໃຫ້ນັກຮຽນທີ່ຈົບຊັ້ນມັດທະຍົມຕອນຕົ້ນ ໄດ້ເຂົ້າຮຽນຕໍ່ໃນສາຍ ອາຊີວະສຶກສາ ແລະ ຝຶກອົບຮົມວິຊາຊີບ ປະຕິບັດໄດ້ 14.6% (ແຜນປີ 2025 ແມ່ນ 1.2%) ລື່ນຄາດໝາຍ 13.4%; ສົ່ງເສີມໃຫ້ມວນຊົນທຸກເພດ, ທຸກໄວໄດ້ເຂົ້າຮ່ວມການຫັດກາຍະບໍລິຫານ, ການອອກກໍາລັງກາຍ ແລະ ການຫຼິ້ນກິລາເພື່ອສຸຂະພາບ, ເຂົ້າຮ່ວມການສ້າງຂະບວນການເຄື່ອນໄຫວ ຈັດກິດຈະກຳການແຂ່ງຂັນກິລາປະຈໍາປີ, ກິລາວັນບຸນປະເພນີ ແລະ ກິລາວັນບຸນສໍາຄັນຕ່າງໆຂອງຊາດ ແລະ ສາກົນ ປະຕິບັດໄດ້ 37.4 (ແຜນປີ 2025 ແມ່ນ 36) ລື່ນຄາດໝາຍ 1.4%

ສ່ວນວ່າ 6 ຄາດໝາຍທີ່ບໍ່ສາມາດບັນລຸໄດ້ຕາມແຜນອັດຕາເຂົ້າຮຽນຂອງເດັກອາຍຸ 5 ປີໃນຊັ້ນການສຶກສາກ່ອນໄວຮຽນ ປະຕິບັດໄດ້ 79.3% (ແຜນປີ 2025 ແມ່ນ 89%) ຫຼຸດຄາດໝາຍ 6.2%; ອັດຕາເຂົ້າຮຽນໃໝ່ລວມ ປ5 ປະຕິບັດໄດ້ 93.8% (ແຜນປີ 2025 ແມ່ນ 97.5%) ຫຼຸດຄາດໝາຍ 3.7%; ອັດຕາຈົບຊັ້ນປະຖົມ (ອັດຕາເລື່ອນຂັ້ນ-ຈົບຊັ້ນປະຖົມ) ປະຕິບັດໄດ້ 93.1% (ແຜນປີ 2025 ແມ່ນ 94%) ຫຼຸດຄາດໝາຍ 0.9%; ອັດຕາການເລື່ອນຊັ້ນປ5 ຂຶ້ນ ມ1 (ທຽບໃສ່ນັກຮຽນຕົ້ນປີ) ປະຕິບັດໄດ້ 80.1% (ແຜນປີ 2025 ແມ່ນ 82%) ຫຼຸດຄາດໝາຍ 1.9%; ອັດຕາເຂົ້າຮຽນໃໝ່ລວມ ມ4 ປະຕິບັດໄດ້ 52.2% (ແຜນປີ 2025 ແມ່ນ 64%) ຫຼຸດຄາດໝາຍ 11.8%; ອັດຕາປະລະການຮຽນຂອງນັກຮຽນຊັ້ນມັດທະຍົມຕອນຕົ້ນ ປະຕິບັດໄດ້ 15% (ແຜນປີ 2025 ແມ່ນ 12.9%) ຫຼຸດຄາດໝາຍ 2.1% .