 |
ໂອກາດນີ້, ທ່ານ ພຸດ ສິມມາລາວົງ ກ່າວວ່າ: ກິດຈະກຳຄັ້ງນີ້ ນອກຈາກຈະສ້າງຂະບວນການສະເຫຼີມສະຫຼອງວັນໂອແລັມປິກສາກົນ ຄົບຮອບ 131 ປີແລ້ວ ກໍຍັງເປັນການປະກອບສ່ວນເຂົ້າໃນຂະບວນການຕ້ອນຮັບ 3 ວັນປະຫວັດສາດຂອງຊາດລາວເຮົາ ຄື: ວັນຄົບຮອບ 70 ປີ ການສ້າງຕັ້ງພັກປະຊາຊົນ ປະຕິວັດລາວ, 50 ປີ ວັນສ້າງຕັ້ງ ສປປ ລາວ ແລະ ວັນເກີດປະທານ ໄກສອນ ພົມວິຫານ ຄົບຮອບ 105 ປີ ພ້ອມທັງເປັນການສ້າງຂະບວນການຕ້ອນຮັບການເປັນເຈົ້າພາບຂອງນະຄອນຫຼວງວຽງຈັນ ໃນການຈັດງານມະຫະກຳກິລາແຫ່ງຊາດ ຄັ້ງທີ 12 ໃນທ້າຍປີນີ້ອີກດ້ວຍ.
ທ່ານກ່າວອີກວ່າ: ຄືດັ່ງທີ່ຮູ້ກັນແລ້ວວ່າ ກິລາ ແລະ ການພັດທະນາແມ່ນມີການພົວພັນຊຶ່ງກັນ ແລະ ກັນ ຢ່າງສະໜິດແໜ້ນ. ດັ່ງນັ້ນ, ຈຶ່ຝໃຫ້ພວກເຮົາພ້ອມພາກັນຈັດຕັ້ງງານກິລາໄປຄຽງຄູ່ກັບການປົກປັກຮັກສາສະພາບແວດລ້ອມໃຫ້ມີຄວາມສວຍງາມເປັນທຳມະຊາດ, ອະນຸລັກຮັກສາຮີດຄອງປະເພນີທີ່ດີງາມ ພ້ອມກັນເປັນເຈົ້າພາບທີ່ດີ, ໃຫ້ບໍລິຫານທີ່ດີ ແລະ ຂໍໃຫ້ຊາວນະຄອນຫຼວງວຽງຈັນ ອອກກຳລັງກາຍ ແລະ ຫຼິ້ນກິລາໃຫ້ຫຼາຍຂຶ້ນເພື່ອຍົກສູງຄຸນນະພາບຊີວິດໃຫ້ນັບມື້ດີຂຶ້ນ.
ໃນກິດຈະກຳກໍຍັງມີການຜ່ານປະຫວັດຄວາມເປັນມາຂອງວັນໂອແລັມປິກສາກົນ ຈາກທ່ານ ແສງພອນ ພົນອາມາດ ຮອງປະທານ-ເລຂາທິການ ຄອລ ແລະ ອ່ານສານຂອງປະທານໂອແລັມປິກສາກົນ ຈາກທ່ານ ກິ່ງມະໂນ ພົມມະຫາໄຊ ຮອງລັດຖະມົນຕີກະຊວງສຶກສາທິການ ແລະ ກິລາ ທັງເປັນຮອງປະທານ ຄອລ. ຫຼັງຈາກນັ້ນ, ບັນດາຄະນະນຳພາ ແລະ ມວນຊົນຊາວນະຄອນຫຼວງວຽງຈັນ ກໍໄດ້ຮ່ວມກັນຍ່າງເພື່ອສຸຂະພາບ ຈຸດເລີ່ມຕົ້ນປະຕູໄຊ ໄປຫາ 4 ແຍກໄຟແດງ ຖະໜົນ 3 ແສນໄທ ກໍກັບຄືນສູ່ປະຕູໄຊ ຊຶ່ງພາຍໃນງານກໍຍັງມີບັນດາກິດຈະກຳຕ່າງໆຈາກບັນດາພາກສ່ວນພາຍໃນງານອີກດ້ວຍ.
ຂ່າວ: ຕຸໄລເພັດ
ຄໍາເຫັນ