ໜັງສືພິມ Kyodo News ລາຍງານວ່າ: ປະເທດຍີ່ປຸ່ນໄດ້ປະສົບກັບມື້ທີ່ອາກາດຮ້ອນຫຼາຍ "Moshobi" ຫຼື ມື້ທີ່ມີອຸນຫະພູມສູງເກີນ 35 ອົງສາ ເປັນຄັ້ງທໍາອິດຂອງປີ 2026 ແລະ ຖືເປັນຄັ້ງທີ່ເກີດໄວທີ່ສຸດອັນດັບສາມທີ່ເຄີຍມີການບັນທຶກມາ. ກ່ອນໜ້ານີ້ ປະເທດຍີ່ປຸ່ນໄດ້ປະສົບກັບ Moshobi ໄວກວ່ານີ້ພຽງສອງຄັ້ງ, ໃນວັນທີ 13 ພຶດສະພາ 1993, ແລະ 17 ພຶດສະພາ 2023.
ອົງການອຸຕຸນິຍົມວິທະຍາຍີ່ປຸ່ນລາຍງານວ່າ: ເມືອງຮິຕະ ແຂວງໂອອິຕະ ແລະ ເມືອງໂທໂຍໂອກະ ແຂວງຮຽວໂງະ ມີອຸນຫະພູມສູງເຖິງ 35.3 ອົງສາ ແລະ ຮຽກຮ້ອງໃຫ້ປະຊາຊົນລະມັດລະວັງອາການເປັນລົມແດດ.
ສຳນັກຂ່າວ Yonhap ລາຍງານວ່າ: ສ ເກົາຫຼີ ໄດ້ປະສົບກັບຄວາມຮ້ອນຮຸນແຮງໃນຫຼາຍພື້ນທີ່, ໂດຍເມືອງກິມຊອນ ຊຶ່ງຕັ້ງຢູ່ຫ່າງຈາກເຊອູນ ໄປທາງທິດຕາເວັນອອກສ່ຽງໃຕ້ປະມານ 190 ກິໂລແມັດ ມີອຸນຫະພູມເພີ່ມຂຶ້ນເຖິງ 36 ອົງສາ ຊຶ່ງເກີນຂອບເຂດຄື້ນຄວາມຮ້ອນຂອງປະເທດ.
ໃນເມືອງຄະຢອງຈູ ຊຶ່ງຢູ່ທາງທິດຕາເວັນອອກສ່ຽງໃຕ້ມີອຸນຫະພູມສູງເຖິງ 35.9 ອົງສາ ຊຶ່ງເປັນສະຖິຕິໃໝ່ສຳລັບອຸນຫະພູມກາງເດືອນພຶດສະພາ ນັບຕັ້ງແຕ່ເລີ່ມເກັບກຳຂໍ້ມູນໃນເດືອນສິງຫາ 2010.
ສ່ວນເມືອງແທກູ ມີອຸນຫະພູມ 34.7 ອົງສາ ແລະ ເມືອງກວາງຈູ 32.4 ອົງສາ ຊຶ່ງເປັນສະຖິຕິໃໝ່ສຳລັບອຸນຫະພູມກາງເດືອນພຶດສະພາ.
ຄໍາເຫັນ