ຍົກສູງບົດບາດການນຳພາທີ່ເຂັ້ມແຂງຂອງພັກ

ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດແຫ່ງສປປ ລາວ, ລາຍງານການເມືອງຂອງຄະນະບໍລິຫານງານສູນກາງພັກປະຊາຊົນ ປະຕິວັດລາວ ສະໄໝທີ XI ຕໍ່ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກປະຊາຊົນ ປະຕິວັດລາວ ໄດ້ຍົກໃຫ້ເຫັນວ່າ: ທິດທາງ, ໜ້າທີ່ຕົ້ນຕໍ ໃນຕໍ່ໜ້າຮອດປີ 2055 ຕ້ອງເພີ່ມທະວີມານະຈິດປະຕິວັດຂອງທົ່ວພັກ, ທົ່ວປວງຊົນ, ເສີມຂະຫຍາຍກໍາລັງແຮງສັງລວມພາຍໃນຊາດ ແລະ ສົມທົບກັບກໍາລັງແຮງຂອງຍຸກສະໄໝເພື່ອສູ້ຊົນພັດທະນາສປປ ລາວ ເປັນປະເທດກຳລັງພັດທະນາ, ມີລາຍຮັບປານກາງສູງຍັບເຂົ້າໃກ້ປະເທດທີ່ມີລາຍຮັບສູງ.

ໃນນັ້ນ, ໄລຍະແຕ່ປີ 2026 ເຖິງ 2035 ສືບຕໍ່ດໍາເນີນການສ້າງ, ປັບປຸງ ແລະ ຍົກລະດັບບັນດາປະຖົມປັດໄຈຕົ້ນຕໍໃຫ້ການບູລະນະລະບອບ ປະຊາທິປະໄຕປະຊາຊົນໃຫ້ໜັກແໜ້ນ, ຍົກສູງຄວາມເປັນເຈົ້າຕົນເອງ ສືບຕໍ່ສ້າງພື້ນຖານໃນການພັດທະນາ; ຮັບປະກັນສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ, ຍຸຕິທໍາ, ອົງການລັດປະຕິບັດພາລະບົດບາດ, ໜ້າທີ່ຕາມກົດໝາຍຢ່າງເຂັ້ມແຂງ, ມີປະສິດທິພາບ, ຍົກສູງຄວາມສາມາດໃນການຄຸ້ມຄອງມະຫາພາກຂອງສູນກາງ ແລະ ຄວາມເປັນເຈົ້າການຂອງທ້ອງຖິ່ນ, ການພັດທະນາເສດຖະກິດ-ສັງຄົມມີຈຸດສຸມ, ມີຄຸນນະພາບ, ໜັກແໜ້ນຕາມທິດສີຂຽວ ແລະ ຍືນຍົງ, ເສດຖະກິດມະຫາພາກມີສະຖຽນລະພາບ, ຄວບຄຸມເງິນເຟີ້, ຫຼຸດຜ່ອນພາລະໜີ້ສິນສາທາລະນະ, ລັດວິສາຫະກິດເປັນກໍາລັງແຮງຮ່ວມກັບພາກສ່ວນເສດຖະກິດອື່ນໆໃນພື້ນຖານເສດຖະກິດແຫ່ງຊາດ; ພັດທະນາແຫຼ່ງຊັບພະຍາກອນມະນຸດທີ່ມີຄວາມສາມາດໃຫ້ການພັດທະນາເພີ່ມຂຶ້ນ, ຍົກສູງຄຸນນະພາບຊີວິດຂອງປະຊາຊົນ, ຍູ້ແຮງການນໍາໃຊ້ວິທະຍາສາດ-ເຕັກໂນໂລຊີ ແລະ ການຫັນເປັນດີຈີຕອນໃນຂົງເຂດຕ່າງໆ, ການພັດທະນາມີຄວາມກົມກຽວ, ສົມດູນ, ຫຼຸດຜ່ອນຄວາມສ່ຽງຈາກໄພທຳມະຊາດ ແລະ ຮັບມືກັບການປ່ຽນແປງຂອງດິນຟ້າອາກາດຢ່່າງມີປະສິດທິຜົນ, ການເຊື່ອມໂຍງ-ເຊື່ອມຈອດກັບປະເທດໃກ້ຄຽງ, ພາກພື້ນ ແລະ ສາກົນໄດ້ຮັບການຈັດຕັ້ງປະຕິບັດເປັນຮູບປະທໍາເປັນກ້າວໆ. ໃນຂະນະດຽວກັນ, ໃນ 5 ປີຕໍ່ໜ້າ (2026-2030), ສືບຕໍ່ຮັບປະກັນສະຖຽນລະພາບດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບ, ມີຄວາມສາມັກຄີເປັນປຶກແຜ່ນໃນທົ່ວປວງຊົນ, ເອກະລາດ, ອໍານາດອະທິປະໄຕ ໄດ້ຮັບການປົກປັກຮັກສາໄວ້ໄດ້ຢ່າງໝັ້ນຄົງ, ປະເທດຊາດຫຼຸດພົ້ນອອກຈາກສະຖານະພາບປະເທດດ້ອຍພັດທະນາ, ລະບົບການເມືອງໄດ້ຮັບການປັບປຸງໃຫ້ປອດໃສ, ເຂັ້ມແຂງ, ໜັກແໜ້ນ; ສູ້ຊົນເຮັດໃຫ້ຄວາມຫຍຸ້ງຍາກດ້ານເສດຖະກິດ-ການເງິນໄດ້ຮັບການແກ້ໄຂຢ່າງເລິກເຊິ່ງ, ບໍ່ສ້າງໜີ້ສິນໜັກໜ່ວງ; ພັດທະນາເສດຖະກິດໃຫ້ມີຄວາມເຂັ້ມແຂງ, ເປັນເຈົ້າຕົນເອງ, ສຸມໃສ່ 7 ຂະແໜງເສດຖະກິດປາຍແຫຼມ, ການຄຸ້ມຄອງ-ບໍລິຫານເສດຖະກິດດໍາເນີນໄປຖືກຕ້ອງຕາມກົດໝາຍ; ການພັດທະນາຂະຫຍາຍຕົວໄວ, ຕໍ່ເນື່ອງ, ສູ້ຊົນໃຫ້ອັດຕາການເຕີບໂຕຂອງລວມຍອດຜະລິດຕະພັນພາຍໃນ (GDP) ໃຫ້ເພີ່ມຂຶ້ນສະເລ່ຍ 6% ຕໍ່ປີຂຶ້ນໄປ, ຄຸນນະພາບຊີວິດຂອງປະຊາຊົນໄດ້ຮັບການຍົກສູງຂຶ້ນ; ວັດທະນະທໍາອັນດີງາມ ແລະ ເປັນເອກະລັກຂອງຊາດໄດ້ຮັບການເສີມຂະຫຍາຍ, ຊັບພະຍາກອນມະນຸດໄດ້ຮັບການກໍ່ສ້າງ ແລະ ພັດທະນາຢ່າງມີຈຸດສຸມ ແລະ ມີຄຸນນະພາບ, ສປປ ລາວ ເຄື່ອນໄຫວການຕ່າງປະເທດຢ່າງເປັນເຈົ້າການ, ໄດ້ຮັບຄວາມເຊື່ອໝັ້ນຈາກເພື່ອນມິດສາກົນ ແລະ ສືບຕໍ່ເຮັດໃຫ້ ສປປ ລາວ ມີບົດບາດພົ້ນເດັ່ນຂຶ້ນ.

ໃນນັ້ນ, ເພື່ອເຮັດໃຫ້ທິດທາງແຕ່ນີ້ຮອດປີ 2030 ໄດ້ຮັບການຈັດຕັ້ງປະຕິບັດໃຫ້ເປັນຮູບປະທໍາ, ພວກເຮົາ ຕ້ອງສືບຕໍ່ບຸກທະລຸທັງສີ່ດ້ານໃຫ້ແຂງແຮງ, ເລິກເຊິ່ງ ແລະ ເປັນຮູບປະທຳ ໂດຍສືບຕໍ່ເຊື່ອມສານ ແລະ ຜັນຂະ ຫຍາຍ-ຕໍ່ຍອດວຽກງານຈຸດສຸມໃນວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ (2022-2025) ໃຫ້ນຳເຂົ້າໃນແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ X ໃຫ້ກາຍເປັນແຜນປົກກະຕິ ເພື່ອຊີ້ນໍາການຈັດຕັ້ງປະຕິບັດໃຫ້ເຂົ້າສູ່ລວງເລິກ, ມີປະສິດທິຜົນ ແລະ ໃຫ້ຂາດຕົວໃນບາງດ້ານດ້ວຍມາດຕະການສຳຄັນ, ເລັ່ງດ່ວນຈຳນວນໜຶ່ງດັ່ງນີ້: ປະຕິຮູບລະບອບ-ລະບຽບການຕ່າງໆໃຫ້ໂປ່ງໃສ, ຫຼຸດຜ່ອນຂອດຂັ້ນ ແລະ ຍົກສູງປະ ສິດທິພາບ ແລະ ຄວາມສາມາດໃນການບໍລິຫານປະເທດ ຕິດພັນກັບການຊຸກຍູ້ການຫັນທັນສະໄໝ-ຫັນເປັນດີຈີຕອນ ການແບ່ງຂັ້ນຄຸ້ມຄອງ, ແບ່ງສິດໃຫ້ຈະແຈ້ງ, ຂາດຕົວ ແລະ ສ້າງສະພາບແວດລ້ອມການລົງທຶນ, ການດໍາເນີນການຜະລິດ-ທຸລະກິດໃຫ້ມີຄວາມສະດວກ, ວ່ອງໄວ ແລະ ມີຄວາມສາມາດສູງຂຶ້ນໃນການແຂ່ງຂັນ, ປຸກລະດົມ ແລະ ຍູ້ແຮງຂະບວນການພັດທະນາປະເທດຊາດຂຶ້ນສູ່ລະດັບສູງ, ຍົກສູງຈິດໃຈເອກະລາດ, ຄວາມເປັນເຈົ້າຕົນເອງ, ສ້າງຄວາມເຂັ້ມແຂງດ້ວຍຕົນເອງ, ບຸກບືນສູ້ຊົນເຮັດໃຫ້ປະຊາຊົນຮູ້ທຳມາຫາກິນແບບໃໝ່, ມີວິຖີຊີວິດແບບ ໃໝ່ກ້າວຂຶ້ນ ແລະ ສ້າງໃຫ້ວິສາຫະກິດຂອງລັດ ແລະ ເອກະຊົນເຂັ້ມແຂງ, ຮັ່ງມີຂຶ້ນ; ນຳພາຊຸກຍູ້ການປະຕິບັດແນວທາງການກໍ່ສ້າງເສດຖະກິດເອກະລາດເປັນເຈົ້າຕົນເອງຢ່າງແຂງແຮງ, ສ້າງທ່ວງທ່າການພັດທະນາທີ່ຍືນຍົງ ແລະ ເຊື່ອມໂຍງກັບສາກົນ, ຫັນປ່ຽນຈາກສັງຄົມຊົມໃຊ້ໄປສູ່ສັງຄົມແຫ່ງການຜະລິດໃຫ້ໄດ້ເປັນຮູບປະທຳ, ປ່ຽນ ແປງໃໝ່ຢ່າງຮອບດ້ານ, ວຽກງານຄຸ້ມຄອງ ແນໃສ່ຍົກສູງປະສິດທິຜົນການຂຸດຄົ້ນ ແລະ ນໍາໃຊ້ແຫຼ່ງຊັບພະຍາ ກອນທຳມະຊາດ ເປັນຕົ້ນແມ່ນໃນຂົງເຂດບໍ່ແຮ່, ຊັບພະຍາກອນນໍ້າ, ທີ່ດິນໃຫ້ກາຍເປັນການຜະລິດທີ່ຍືນຍົງ; ຕັ້ງໜ້າຜະລິດພະລັງງານໄຟຟ້າດ້ວຍຫຼາຍທາງເລືອກ ລວມທັງພະລັງງານນ້ຳ, ແສງຕາເວັນ, ລົມ ແລະ ພະລັງງານ ນິວເຄລຍ ເພື່ອຊົມໃຊ້ພາຍໃນ ແລະ ເພື່ອການສົ່ງອອກ, ເພີ່ມທະວີການບໍລິຫານທີ່ດີ, ສ້າງຄວາມໂປ່ງໃສ, ຕ້ານ ແລະ ສະກັດກັ້ນການສໍ້ລາດບັງຫຼວງ, ອັດຊ່ອງວ່າງການຮົ່ວໄຫຼ, ເພີ່ມແຫຼ່ງລາຍຮັບງົບປະມານເພື່ອສ້າງກໍາລັງແຮງໃຫ້ການຊຸກຍູ້ການພັດທະນາເສດຖະກິດ-ສັງຄົມໃຫ້ໄວຂຶ້ນ, ໝັ້ນທ່ຽງ ແລະ ມີຄວາມຍືນຍົງ.

(ຂ່າວ: ສຳນານ; ພາບ: ຕຸໄລເພັດ+ພູວຽງຄຳ)