 |
ຕະຫຼອດໄລຍະຜ່ານມາເຖິງວ່າພວກເຮົາຈະພົບກັບຄວາມຫຍຸ້ງຍາກ ແລະ ມີຂໍ້ຈຳກັດໃນຫຼາຍດ້ານໃນການພັດທະນາເສດຖະກິດ-ສັງຄົມ ເວົ້າລວມກໍຄືການພັດທະນາການສຶກສາ ເວົ້າສະເພາະພາຍໃຕ້ການຊີ້ນຳ-ນຳພາຂອງພັກປະຊາຊົນ ປະຕິວັດລາວ ການສຶກສາໄດ້ຮັບການພັດທະນາໃຫ້ກ້າວໜ້າຂະຫຍາຍຕົວເປັນລຳດັບມາ. ມວນມະນຸດໄດ້ມີການພັດທະນາຕົນເອງໃຫ້ກ້າວໜ້າຂຶ້ນຢ່າງບໍ່ຢຸດຢັ້ງ ຊຶ່ງໄດ້ເຮັດໃຫ້ສັງຄົມມະນຸດມີການປ່ຽນແປງຈາກລະບອບສັງຄົມນີ້ໄປສູ່ລະບອບສັງຄົມອື່ນ, ໃນຂະບວນວິວັດພັດທະນາການດັ່ງກ່າວ ຄູໄດ້ມີບົດບາດປະກອບສ່ວນສຳຄັນທີ່ບໍ່ມີໃຜ ແລະ ຊັ້ນຄົນໃດຈະປະຕິເສດໄດ້, ຄູໝາຍເຖິງຄົນທີ່ມີຄວາມຮູ້ ແລະ ປະສົບການຊຶ່ງສາມາດນຳໄປຖ່າຍທອດຄວາມຮູ້ ແລະ ປະສົບການນັ້ນໄປສູ່ຜູ້ອື່ນໆ. ຮູບການຖ່າຍທອດຄວາມຮູ້ຈາກຜູ້ຮູ້ໄປສູ່ຜູ້ບໍ່ຮູ້ເອີ້ນວ່າ ການສອນ ແລະ ການຮຽນ. ການສອນ ແລະ ການຮຽນເປັນປັດໄຈສຳຄັນໜຶ່ງໃນການຕັດສິນໃຈຄຸນນະພາບຂອງການສຶກສາ ກໍຄືການພັດທະນາມະນຸດ. ທຸກຄົນມີຄວາມຮູ້ໂດຍຜ່ານຂະບວນການສອນຂອງຄູ ແລະ ທຸກຄົນລ້ວນແຕ່ມີຄູສອນຕົນເອງ. ການຈັດຕັ້ງໃຫ້ມີວັນຄູແຫ່ງຊາດລາວຈຸດປະສົງເພື່ອໃຫ້ພົນລະເມືອງລາວທຸກເຜົ່າທຸກຊັ້ນຄົນໃນວົງສາຄະນາຍາດແຫ່ງຊາດລາວ ໄດ້ທົບທວນຂະບວນການວິວັດທະນາການແຫ່ງຊີວິດໂດຍລິເລີ່ມຈາກຊີວິດໃນຍາມເປັນເດັກຢູ່ໃນການລ້ຽງດູຂອງພໍ່ແມ່, ຊີວິດຂອງຕົນທີ່ເຄື່ອນໄຫວສຶກສາຮ່ຳຮຽນຈົນມາເຖິງປັດຈຸບັນ ໄດ້ຮັບການຖ່າຍທອດຄວາມຮູ້ຫຍັງແດ່ຈາກພໍ່ແມ່, ຄູ-ອາຈານ. ທັງນີ້ເພື່ອໃຫ້ທຸກຄົນໄດ້ສະແດງຄວາມກະຕັນຍູຮູ້ບຸນຄຸນຄູ-ອາຈານ. ການຈັດຕັ້ງໃຫ້ມີວັນຄູແຫ່ງຊາດຍັງເປັນການເຊີດຊູກຽດສັກສີ, ຖານະບົດບາດຂອງຄູຕໍ່ສັງຄົມ, ຄຸນປະໂຫຍດ ແລະ ຄຸນງາມຄວາມດີຂອງຄູທີ່ມີຕໍ່ປະເທດຊາດ. ວັນຄູແຫ່ງຊາດຍັງເປັນວັນໜຶ່ງທີ່ສຳຄັນໃນປະຫວັດສາດຂອງຊາດລາວເຮົາ ເພາະວ່າບໍ່ພຽງແຕ່ໄດ້ປະກອບສ່ວນເຂົ້າໃນວຽກງານການສຶກສາເທົ່ານັ້ນ ຍັງໄດ້ປະກອບສ່ວນຢ່າງຕັ້ງໜ້າເຂົ້າໃນພາລະກິດແຫ່ງການຕໍ່ສູ້ເພື່ອຄວາມເປັນເອກະລາດ ແລະ ຄວາມວັດທະນາຖາວອນຂອງປະເທດຊາດ. ວັນຄູແຫ່ງຊາດເປັນວັນແຫ່ງຄວາມເອກອ້າງທະນົງໃຈຕໍ່ກຽດສັກສີ, ຕໍ່ອາຊີບຄູ ແລະ ເປັນວັນແຫ່ງເສີມຂະຫຍາຍມູນເຊື້ອຂອງຄູຄຳຜູ້ທີ່ມີຄວາມດຸໝັ່ນຂະຫຍັນພຽນ ແລະ ໄດ້ອຸທິດສະຕິປັນຍາ, ເລືອດເນື້ອ ແລະ ເຫື່ອແຮງຂອງຕົນເພື່ອພາລະກິດການສຶກສາແຫ່ງຊາດລາວຂອງພວກເຮົາ.
ຄືດັ່ງທີ່ຮູ້ນຳກັນແລ້ວວ່າ: ໃນໄລຍະທີ່ຜ່ານມາບໍ່ວ່າຢູ່ໃນໄລຍະການປະຕິວັດຊາດປະຊາທິປະໄຕກໍຄືໄລຍະການປົກປັກຮັກສາ ແລະ ສ້າງສາປະເທດຊາດ, ກະຊວງສຶກສາທິການ ແລະ ກິລາ, ອົງການປົກຄອງທ້ອງຖິ່ນ, ຜູ້ບໍລິຫານການສຶກສາແຕ່ລະຂັ້ນທັງພາກລັດ-ເອກະຊົນໄດ້ມີຄວາມພະຍາຍາມສູງໃນການເອົາໃຈໃສ່ພັດທະນາການສຶກສາທາງດ້ານປະລິມານ ແລະ ຄຸນນະພາບ, ໄດ້ຂະຫຍາຍຕາໜ່າງການສຶກສາໄປທົ່ວທຸກທ້ອງຖິ່ນ ລວມທັງເຂດພູດອຍຫ່າງໄກສອກຫຼີກ, ປະຊາຊົນໄດ້ມີລະດັບຄວາມຮູ້ຈົບປະຖົມ ແລະ ມັດທະຍົມສຶກສາຕອນຕົ້ນບຳລຸງ ໂດຍທົ່ວໄປກວມຈຳນວນປະຊາກອນສ່ວນຫຼາຍ, ຄຸນນະພາບຂອງການສຶກສາໄດ້ຮັບການພັດທະນາດີຂຶ້ນເທື່ອລະກ້າວ. ຍ້ອນການປະກອບສ່ວນຂອງພະນັກງານຄູ-ອາຈານທີ່ໄດ້ທຸ້ມເທເຫື່ອແຮງ, ສະຕິປັນຍາຂອງຕົນຢ່າງບໍ່ຮູ້ອິດຮູ້ເມື່ອຍເຂົ້າໃນວຽກງານດັ່ງກ່າວຢ່າງສຸດຄວາມສາມາດ.
ໃນໂອກາດອັນສະຫງ່າລາສີນີ້, ຂໍອວຍພອນໄຊອັນປະເສີດແດ່ການນຳທຸກທ່ານ, ພະນັກງານບຳນານອາວຸໂສ ຕະຫຼອດຮອດຄູ-ອາຈານໃນຂອບເຂດທົ່ວປະເທດ ຈົ່ງມີສຸຂະພາບແຂງແຮງພ້ອມກັນສືບຕໍ່ປະກອບສ່ວນເຂົ້າໃນການກໍ່ສ້າງຊັບພະຍາກອນມະນຸດຂອງຊາດໃຫ້ມີຄຸນນະພາບສູງ ເຂັ້ມແຂງ ຍືນຍົງ.
ຄໍາເຫັນ